11/11/2019
Today from Hiiraan Online:  _
Wararka Maanta- Talaado, Jun 18, 2013
Kenya oo Qorsheynaysa inay Adeegsato Diyaaradaha aan Duuliyaha lahayn si ay isaga difaacdo Weerarrada Al-shabaab



Talaado, Juun 18, 2013 (HOL) — Dowladda Kenya ayaa qorsheynaysay inay isticmaasho diyaaradaha aan duuliyaha lahayn si ay uga hortagto weerarada Al-shabaab kusoo qaadayso deegaanno ka tirsan dalkeeda, gaar ahaan kuwa ku dhow xuduudaha ay la wadaagto Soomaaliya.

Madaxa ciidamada Kenya ee ilaalada xuduudaha, Patrick Ocheing ayaa ku tilmaamay arrintan mid sababi karta in shacabka Kenya ay helaan ammaan buuxa, lagana hortago weerarrada xuduudo ka tallowga ah ee ay geystaan Al-shabaab iyo kooxaha kale ee hubeysan.

"Kenya waxa haysta dhibaatooyin dhinaca ammaanka ah oo aan waligeed soo marin, waana arrin aan soo dhaweynayno in diyaaradahan la adeegsado si amniga loo adkeeyo," ayuu yiri Patrick oo warbaahinta la hadlayay, isagoo intaas ku daray: "Ma ahan oo kaliya in khatartu inay tahay mid laga fuliyo gudaha Kenya, balse waxay ka imaanaysaa Al-shabaab.”

Dagaalyahanno taabacsan Al-shabaab ayaa tan iyo sannadkii 2011 waxay ka fulinayeen gudaha Kenya weerarro isugu jira kuwo toos ah, kuwo gaadmo ah iyo kuwo qaraxyo ah oo ay ku dileen dad badan oo isugu jira askar iyo dad rayid ah oo ku noolaa deegaannada ay weerarradu ka dhacayeen.

Saraakiisha amniga Kenya ayaa sheegay in diyaaradahan Drones-ka ay aad casri u yihiin ayna ku rakiban yihiin kambiyuutarro habeenkii wax lagu arki karo, si looga hortago kuwa khatarta ku ah ammaanka Kenya, iyagoo xusay in ciidamada Kenya la siiyay tababar ku saabsan adeegsiga diyaaradahan.

“Xuduud dhererkeedu yahay 800-km ayaan la leennahay Soomaaliya, inta badan waxaa kasoo gala kooxaha dhibaatooyinka geysta, diyaaradahan la doonayo in loo adeegsado ilaalinta xuduudahana waxay kaalmeynayaan ciidamadeenna,” ayuu yiri taliyaha booliiska gobolka Waqooyi-bari ee dalka Kenya, Charlton Mureithi.

Isagoo sii hadlaya ayuu wuxuu yiri: "Waxaan rajaynaynaa in tiknolojiyadan ay la jaan-qaadi doonto wax ka qabashada khatarta ammaanka ee gobolka sababtoo ah diyaaradahan aan duuliyaha lahayn ayaa ilaalin doona meelaha fog-fog ee ay kuwa koontarabaanka wada isticmaalaan iyo kuwa ammaanka wax u dhimaya isticmaalaan.”

Haddii Kenya ay u suurogasho arrintan waxay noqonaysaa waddankii ugu horreeyay oo ku yaalla Bariga Afrika oo isticmaala diyaaradaha aan lahayn duuliyaha si ay ammaanka dalkooda ugu sugaan.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
6/18/2013 11:49 AM EST
Talaado, Juun 18, 2013 (HOL) — Wasaaradda Duulista Hawada Somaliland ayaa maanta markii ugu horreysay u diiday inay madaarka Hargeysa fadhiisato diyaarad ogolaanshiyo kasoo qaadatay dawladda Soomaaliya, isla markaana sheegtay in aanay hawadeedda u soo mari karin diyaarad aan Somaliland fasax ka haysan.

6/18/2013 11:48 AM EST
Talaado, Juun 18, 2013 (HOL) — Jaamacadda Hargeysa, kuuliyaddeeda nabadda iyo khilaafaadka ayaa maanta soo gabagabeeysay shir laba cisho u socday dalalka Somaliland, Soomaaliya, koonfurta Suudan iyo Suudaan, kaas oo lagaga hadlayey dawlad dhisida iyo sida nabadda loo dhaliyo.

6/18/2013 8:16 AM EST
Talaado, Juun 18, 2013 (HOL) — Xukuumadda Somaliland iyo ururkii doorashadda ku hadhay ee XAQSOOR oo hore u qaadacay doorashadii golaha deegaanka ayaa heshiis af garad wada gaadhay, isla markaana sheegay inay ka heshiiyeen in dhinac looga soo wadda jeesto wixii danta guud ah.

6/18/2013 7:36 AM EST
Talaado, Juun 18, 2013 (HOL) — Xukuumadda Soomaaliya ayaa maanta ka furtay magaalada Muqdisho shir heer Qaran ah oo looga arrinsanayo dib-u-habaynta waxbarashada Soomaaliya, shirkaan ayaa lagu wadaa inuu socdo mudo saddex maalmood ah. Waxaana qabanqaabadiisa iska kaashaday wasaaradda horumarinta iyo adeegga bulshada, hay’adaha UNESCO iyo UNICEF.

6/18/2013 7:21 AM EST
Talaado, Juun 18, 2013 (HOL) — Kulan looga hadlayay ammaanka iyo waxbarashada ayaa maanta ka dhacay degmada Kaaraan ee gobolka Banaadir, kaasoo ay ka qayb-galeen mas'uuliyiin maamulka gobolka ka tirsan, waana kulankii ugu horreeyay noociisa oo ka dhaca degmadaas.

6/18/2013 5:52 AM EST
Talaado, Juun 18, 2013 (HOL) — Guddoomiye ku xigeenkii maamulkii KMG ahaa ee magaalada Kismaayo, Yaasiin Nuur Gaas (Raadaar) ayaa goor-dhow lagu dhaawacay gudaha magaalada Kismaayo, kaddib markii kooxo hubeysan ay rasaas ku fureen gaadiid uu watay.

6/18/2013 4:50 AM EST
Talaado, Juun 18, 2013 (HOL) — Qarax xooggan ayaa xaafadda V-afmadow ee magaalada Kismaayo lagula eegtay gaadiid ay wateen ciidamo ka tirsan kuwa Kenya ee qeybta ah howlgalka AMISOM ee ku sugan magaalada Kismaayo.

6/18/2013 2:31 AM EST
Talaado, Juun 18, 2013 (HOL) — Dab khasaare hantiyeed geystay ayaa xalay ka kacay suuq ku yaalla degmada Gaarisa ee gobolka Waqooyi bari ee dalka Kenya, iyadoo la sheegay in dabkaas uu ka dhashay koronto qaraxday.

6/18/2013 2:28 AM EST
Talaado, Juun 18, 2013 (HOL) — Ciidamada dowladda Soomaaliya iyo kuwa AMISOM ayaa la wareegay shalay deegaanno ka tirsan gobolka Shabeellada hoose ee koonfurta Soomaaliya, kuwaasoo ay muddo sanooyin ah gacanta ku haysay Al-shabaab.