11/16/2018
Today from Hiiraan Online:  _
Wararka Maanta- Arbaco, May 23, 2012
Xukuumadda KMG Soomaaliya oo sheegtay inay baarayso Warbaahinta Qaarkeed oo faafiyay warar ka dhan ah Nabadda


Arbaco, May 23, 2012 (HOL) — War-saxaafadeed ay wasaaradda warfaafinta DKMG ah ee Soomalaiya soo saartay ayaa lagu sheegay in warbaahinta Soomaalida qaar ka mid ah baaritaanno lagu sameynayo kuwasaoo ay sheegeen inay faafiyeen warar lagu aflagaadeynayo madaxda DKMG ah, laguna abuurayo jahwareer ku saabsan nabadda iyo heshiiska Roadmap-ka.

Warkan ayaa lagu sheegay in baaritaanka lagu sameynayo warbaahinta madaxa-bannaan ee Soomaaliya ka jirta, iyadoo aanay jirin cid si gaar ah farta loogu fiiqay, iyadoo la sheegay in warbaahintaas ay leeyihiin dad dano-gaar ah wata.

"Waxaa muhiim ah in la ogaado in dhaqankan uu ku kooban yahay oo kaliya kooxo saxaafadda u adeegsada ujeeddooyin gaar ah, kuwaasoo shacabka marin-habaabin ku haya. Saxaafadda inteeda badan ma ahan kuwo ku sifeysan tilmaamahan, balse intooda badan waxay gutaan waajibka ka saaran ku dhaqanka sharciga saxaafadda ee ka jira dalka oo uu baarlamaanka DFKG ogolaaday sanadkii 2007-da," ayaa lagu yiri warsaxaafadeedkan.

Sidoo kale, warsaxaafadeedka waxaa lagu shegay in shuruucda saxaafadda ay si cad u qeexayso cawaaqibta ka dhalan karta markii ay saxaafadda baahiso warar ku saabsan aflagaaddo, sumcad-dillid, been-abuur iyo xumaan ula kac ah taasoo ka mamnuuc ah in saxaafadda lagu baahiyo.

"Dowladda waxaa ka go’an inay dhowrto saxaafada xorta ah, laakiin in shuruucda u dagsan saxaafadda la dafiro oo been laga abuurto dowladda, shacabka, cuqaasha iyo waxgaradka iyadoo baad la weydiisanayo – ma ahan mid loo dulqaadan karo," ayaa sidoo kale lagu yiri warka kasoo baxay xukuumadda.

Warkan kasoo baxay xukuumadda ayaa wuxuu noqonayaa kii ugu horreeyay oo ay dowladdu ku sheegto inay baaris ku sameysaynayso saxaafadda xorta ah, iyadoo isla warkan lagu sheegay in idaacadaha Muqdisho mid ka mid ah oo laga baahiyay in mas'uul dowladda ka tirsan uu lunsaday ama xaday hantidii dowladda iyadoo aysan jirin wax caddeyn ah oo arintaas loo daliishaday.

"Sharciga wuxuu sheegayaa ma'suuliyad iyo anshaxa wanaagsan in loo hogaansamo markii ay idaacad gudbineyso wararka, si saxaafadda ay xornimadeeda u hanato. Markii shati la siinayo warbaahin, waxaa shuruudaha ka mid ah in idaacadda ay buuxin karto waajibaadka ka saaran bulshada, gaar ahaan in la xaqiijiyo faaf-reebidda waxyaabaha lidka ku ah anshaxa bulshada, beenta, cayda iyo shaqsi-weerarka," ayaa lagu yiri warsaxaafadeedka.

Ugu dambeyn, waxaa lagu sheegay warka kasoo baxay wasaaradda warfaafinta in dalka uu ku talaabsaday jawi nabadeed iyo mid xasilooni, taasoo ay dowladdu ugu gogol-xaareyso dhaqan-galka saxaafad xor ah oo madax-bannaan iyo bulshada buuxisa doorkeeda si loo gaaro dib-u-heshiisiin dhab ah.

Milkiilayaasha idaacadaha ayaa laga dalbaday inay ka digtoonaadaan inay sharciga saxaafadda jabiyaan iyo inay hor-istaagaan hannaanka nabadda iyagoo baahinaya warar carqalad ku ah nabadda.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/23/2012 1:43 PM EST
Arbaco, May 23, 2012(HOL): Hadal ka soo baxay maamulka Gobolka Banaadir ayaa lagu sheegay in howlgal ay sameeyeen Ciidamada Nabadgelyada Degmada C/casiis lagu soo qabqabtay rag watay Khamri kartoomo ku jira oo ka kooban 24 kartoon.

5/23/2012 11:07 AM EST
Tagitaankayga caasimada Soomaaliya markii iigu horreysay ee noloshayda, waxay ahayd mid dareen gaar ah igu abuurtay.

5/23/2012 10:17 AM EST
Arbaco, May, 23, 2012 (HOL) –Mas’uuliyiinta maamulka gobollka Hiiraan oo uu horkacayay guddoomiyaha maamulka gobollka C/fitaax Xassan Afrax ayaa maanta ku soo dhaweeyay magaalada Beledweyne wafdi ka socday hay’adda USAID iyo hay’addo kale oo isku dhaf ah kuwaasoo ka soo degay garoonka diyaaradaha magaalada Beledweyne.

5/23/2012 10:16 AM EST
Arbaco, May 23, 2012 (HOL)-Ugaaskii ugu horeeyey beelaha degga waqooyiga Magaaladda Hargeysa yeeshaan ayaa maanta lagu caleemo saaray magaaladda Hargeysa, gaar ahaan hotel Maansoor.

5/23/2012 9:28 AM EST
Arbaco, May 23, 2012(HOL): Ku-Simaha Ra’iisul Wasaaraha Soomaaliya ahna Wasiirka ganacsigga Cabdiwahaab Ugaas Xuseen Ugaas Khaliif oo maanta booqday Wasaaradda Waxbarashada ee Xukuumadda Soomaaliya iyo dugsiga H/dhexe iyo Sare ee Xamar Jajab halkaasoo ay wax ka bartaan 590 arday oo warbarasho lacag la’aan ah helay.

5/23/2012 6:43 AM EST
Arbaco, May 23, 2012 (HOL) — Qaxootiga ku jira xerooyinka ku yaal degmada Dhadhaab ee gobolka waqooyi bari Kenya ayaa ka cabanaya dhibaatooyin ba’an oo ay kala kulmaan kooxo burcad ah oo dhac u geysta shacabka iyo ganacsatada ku nool qaar katirsan xerooyinka ku yaal Dhadhaab.

5/23/2012 6:40 AM EST
Arbaco, May 23, 2012 (HOL) — Kulan ay ka qayb-galeen odayaasha-dhaqanka Soomaliyeed loogana hadlayay muuqaalka uu yeelanayo aayaha ummadda Soomaaliyeed iyo wadada loo marayo sidii lagaga gudbi lahaa xilliga KMG ah ayaa lagu qabtay Hotelka Ambassador ee magaalada Muqdisho.

5/23/2012 6:24 AM EST
Arbaco, May 23, 2012 (HOL) — Deegaanka Ceelasha biyaha ee duleedka Muqdisho ayaa waxaa maanta lagu soo bandhigay askari ka mid ah ciidamada AMISOM oo la sheegay in lagu dilay dagaalkii shalay, iyadoo sidoo kale deegaankaas ay dadkii ku noolaa ka barakacayaan.

5/23/2012 6:20 AM EST
Arbaco, May 23, 2012 (HOL) — Qoysaskii dhawaan kasoo barakacay dagaallo iyo duqeymo isbiirsaday oo xoogagga Al-shabaab iyo ciidamada huwanta ah u dhexmarayay deegaanka Hoosingoow ayaa haatan bilaabay in ay dib ugu noqdaan guryahooda.

5/23/2012 3:21 AM EST
Arbaco, May 23, 2012 (HOL) — Ciidamada dowladda KMG Soomaaliya iyo AMISOM ayaa waxay shalay gaareen dhul ku yaalla duleedka Muqdisho, kaddib dagaal culus oo ay la galeen xoogagga Al-shabaab oo gacanta ku haya deegaannada ku yaalla duleedyada Muqdisho.

5/23/2012 3:08 AM EST
Arbaco, May 23, 2012 (HOL) — Taliska AMISOM iyo Xarakada Al-shabaab ayaa ka sheegtay guulo dagaallo culus oo shalay ku dhexmaray duleedka Muqdisho, iyadoo ay xalaadda goobihii lagu dagaalamay maanta yihiin kuwo nabdoon.

5/23/2012 2:46 AM EST
Arbaco, May 23, 2012 (HOL) — Shirka madaxda Soomaalida uga socda magaalada Addis Ababa ee xarunta dalka Itoobiya ayaa weli isku mari dhowr qodob oo ka mid ah dastuurka, iyadoo sidoo kalena uu jiro muran ku saabsan qaabka loo xulayo ergooyinka ansixinta dastuurka iyo kuwa soo xulaya baarlamaanka cusub.