11/16/2018
Today from Hiiraan Online:  _
Wararka Maanta- Talaado, May 22, 2012
Dadweynaha Somaliland oo Aragtiyo kala duwan ka bixiyay hadalkii Danjire Mahiga uu ku Naqdiyay Go’aankii Maxkamadda Milatariga


Talaado, May 22, 2012 (HOL) — Dadweynaha Somaliland ayaa siyaabo kala duwan u arkay hadalkii ka soo yeedhay Ergayga Qaramadda midoobay u qaabilsan arrimaha Somalia Danjire Mahiga, kaas oo naqdiyey xukunkii maxkamadda Milatariga Somaliland ku xukuntay koox dabley ahayd oo weerartay Xero Ciidan, halkaasi oo toddoba qof ku dhinteen, tiro intaas ka badana ku dhaawacmay.

Dadweynaha Somaliland ayaa intoodda badani hadalka ka soo yeedhay Ergayga Augustine Mahiga ku tilmaamay inuu yahay mid sharciga iyo madaxbanaanidda ummadaha ka hor imanaya, isla markaana ku xad-gudbay siyaasada arrimaha gudaha ee dalka, waxaaanay sheegeen inuu u dhaqmayo inuu somaliland u yeedhiyo sida uu rabo, halka qaar kalana sheegeen in ergayga QM ay shaqadiisi tahay arrimahani, isla markaana ay tahay inuu ka hadlo maadaama oo uu yahay ergayga xoghayaha Qaramadda midoobay u qaabilsan Somalia.

Sidaasna waxay u sheegeen HOL oo wax ka waydiisay aragtidda ay ka qabaan hadalkaasi uu Danjire Mahiga ku naqdiyey go’aankii ka soo baxay Maxkamadda , iyagoo arrimahaasi aragtiyo kala duwan ka bixinaya waxay u dhacday sidan:

"Dalkeenu wuxuu qaatay dastuur islaami ah oo shareecadda islaamka ka hor imanayn, sidaa darteed wakiilku waxa uu diidan yahay inaynu ku dhaqano shareecadda islaamka waxa uu ka dagaalamayaa waa xukunka dilka ah ee diintu ogoshahay in qofkii qof dila in la dilo, markaa waxa uu cadaystay dagaalku u kula jiro diinta iyo xeerarka dhaqankeenna, dadkan la xukumayna dil bay gaysteen dadna way laayeen"sidaas waxa ku dooday Maxamed Cismaan oo ku nool magaaladda Hargeysa.

Maxamed Xaamud Xirsi oo ka mid ah aqoonyahanada somaliland ayaa isna taageeray hadalka ka soo yeedhay Wakiilka xoghayaha guud ee QM, waxaanu yidhi " Mahiga waa wakiilka QM u qaabilsan Somalia, inuu arrintan ka hadlana waa shaqadiisa, waayo somaliland wali ma helin ictiraaf caalami ah sidaa darteed waxay wali ku hoos jirtaa Somalia markaa inuu arrimaha somaliland soo dhexgalo oo dhacdo jirta uu sida uu arko Ra’yigiisa ka dhiibto waa shaqadda uu u xilsaaran yahay"

"Hadalkaasi ka soo yeedhay ergayga waxaan u arkaa khalad, waayo qaran garsoorkiisu go’aangaadhay in qof dibadda joogaa soo dhexgalo ma haboona, waana ka xumahay in arrimaha gudaha ee dal la soo faro galiyo"sidaasna waxa tidhi Muha Maxamed oo iyana ka mid ah hablaha wax ka barta jaamacadaha dalka.

Mukhtaar Suldaan Xuseen oo ka ah aqoonyahanka somaliland oo arintan aragtidiisa ka dhiibanaya waxa uu yidhi " waa khalad in arrimo wadan u gaar ah inuu Mahiga ka hadlo, waayo isagu waa xubin hay’adeed, sida darteed ma dhexgali karo xeerarka iyo arrrimaha ay ummadduhu ku heshiiyeen ama dhigteen"

"waxaan Mahiga u sheegayaa inay farogalin qaawan tahay in laga hadlo qaanuunka uu dal leeyahay haddii maxkamadda milatari iyo mid caadi ah lagu xumo dadkaasi ku kacay fal dambiyeedkaasi ay tahay mid u gaar ah arrimaha somaliland "sidaasna waxa yidhi Maxamuud Xuseen Jawhar.

Si kastaba ha ahaatee, dadweynaha somaliland ayaa ku kala aragti duwanaa hadalkan ka soo yeedhay wakiilka QM u qaabilsan Arrimaha Somalia Danjire: Mahiga oo naqdiyey go’aankii maxkamadda Milatari oo uu sheegay in dadkaasi la geeyo maxkamad caadi ah.

Barkhad-Ladiif M. Cumar
[email protected]
Hargeysa, Somaliland







Click here
5/22/2012 10:56 AM EST
Xaaji Maxamed Yaasiin oo ah musharaxa u taagan madaxtinimadda Soomaaliya ayaa eedeyn u jeediyay saxiixayaasha Road map-ka sheegayna iney fushanayaan dano gaar ah.

5/22/2012 9:10 AM EST
Talaado, May 22, 2012 (HOL) — Wasiirka ganacsiga xukuumadda Soomaaliya ahna ku simaha ra'iisul wasaaraha, C/wahaab Ugaas Xuseen oo maanta Muqdisho kulan kula yeeshay ururrada bulshada rayidka ah ayaa ka dalbaday inay xukuumadda ka gacan-siiyaan meel marinta Roadmap-ka, ansixinta dastuurka iyo amniga oo lasoo celiyo.

5/22/2012 8:50 AM EST
Talaado, May 22, 2012 (HOL) — Maxkamadeynta lix dhallinyaro Soomaaliyeed ah oo ku eedeysan afduubka dooni kuwa raaxada ah oo ay la socdeen 30 shaqaaalaha doonida ah ayaa ka furantay maanta magaalada Paris ee xarunta dalka Faransiiska.

5/22/2012 7:10 AM EST
Talaado, May 22, 2012 (HOL) — Dowladda KMG Soomaaliya iyo AMISOM ayaa guulo ka sheegtay dagaallo saakay aroortii hore ka qarxay degmada Dayniile, kuwaasoo u dhexeeyay ciidamada dowladda KMG iyo kuwa AMISOM oo dhinac ah iyo xoogagga Al-shabaab.

5/22/2012 3:58 AM EST
Talaado, May 22, 2012 (HOL) — Maxkamada sare ee Somaliland ayaa guddo gashay dhageysiga dacwada u dhaxaysa Guddoomiyaha iyo guddoomiye ku xigeenka xisbiga Mucaaradka ah ee UDUB oo uu dhawaan Guddoomiye ku xigeenka xisbigaasi Maxkamada u gudbiyey eeddo ka dhan ah gudoomiyaha xisbigoodda.

5/22/2012 3:57 AM EST
Talaado, May 22, 2012 (HOL) — Xarakada Al-shabaab ayaa bayaan ay soo saartay ku manuucday in laga ganacsado raashinka hay'adda ay dalka keento hay'adda WFP oo qaramada Midoobay u qaabilsan dhinaca cunnada.

5/22/2012 3:33 AM EST
Talaado, May 22, 2012 (HOL) — Ra'iisul wasaaraha Itoobiya, Meles Zenawi ayaa sheegay in ciidamadiisa jooga Soomaaliya ay qorsheyanayaan sidii ay dhul kale uga qabsan lahaayeen Xarakada Al-shabaab ee ku sugan gobollada dhexe ee kuwa Koonfureed ee Soomaaliya.

5/22/2012 3:15 AM EST
Talaado, May 22, 2012 (HOL) — Dagaallo culus oo u dhexeeya ciidamada DKMG ah oo garabsanaya kuwa AMISOM iyo xoogaga Xarakada Al-shabaab ayaa saakay ka qarxay degmada Dayniile, iyadoo dhinacadu ay isku adeegsanayeen hubka culus iyo midka fudud.