Wariyaha Hiiraan Online ee Puntland oo maanta laga sii-daayay xabsi uu ku jiray muddo bil ka badan

Wariye Faysal Maxamed Xasan (Boston)
Axad, July 31, 2011 (HOL) – Wariye Faysal Maxamed Xasan (Boston) oo Hiiraan Online uga soo warrama Puntland ayaa maanta oo Axad ah laga sii-daayay xabsiga Boosaaso, kaddib markii uu cafis u fidiyay madaxweynaha Puntland C/raxmaan Sheekh Maxamed Faroole.

Faysal Boston oo la hadlay HOL ayaa sheegay inuu aad ugu faraxsan yahay sii-dayntiisa, wuxuuna xusay in cafis madaxweyne uu kusoo baxay, haatanna uu la joogo wiil curadkiisa ah oo dhashay intii uu xabsiga ku jiray.

"Aad ayaan ugu faraxsanahay inaan dib xorriyadeyda u helo, 33-kii maalmood ee aan ku jiray xabsiga waxay ii ahayd maalmo mugdi ah," ayuu yiri Faysal oo qoslaya, isagoo sheegay inuu u mahadcelinayo cid walba oo gacan ka geysatay inuu dib u helo xorriyadiisa, gaar ahaan wuxuu mahad u celiyay maamulka Puntland, shaqaalaha HOL iyo ururrada saxafiyiinta gudaha iyo dibadda.

Sidoo kale, wuxuu sheegay in intii uu xabsiga ku jiray uu maqli jiray inay dadaallo lagu sii-daynayo ay wadeen maamulka Hiiraan Online, ururrada suxufiyiinta, isagoo si gaar ah u xusay hay'adda difaaca suxufiyiinta dunida ee CPJ.

Wariye Faysal Boston ayaa waxay booliiska Puntland xabsiga u taxaabeen 28-kii Juun, iyadoo bishan labadeediina ay maxkamadda darajada koowaad ku xukuntay hal sano oo xabsi ah, kaddib markii lagu eedeeyay inuu baahiyay war aan sax ahayn, balse maanta ayuu nasiib-wanaag dib u helay xorriyadiisa.

"Cid walba oo gacan ka geysatay sii-dayntayda aad ayaan ugu mahadcelinayaa, maantana xor ayaan ahay," ayuu yiri wariye Faysal Boston oo sheegay inuu howlihiisa sii wadan doono.

Maamulka Hiiraan Online iyo wariyeyaasha ayaa aad u soo dhaweeyay sii-daynta Wariye Faysal Boton, iyagoo u rajeeyay shaqo wacan.

Maxamed Xaaji Xuseen, Hiiraan Online
[email protected]
Muqdisho, Soomaaliya

More News