Xoogagga Dowladda Soomaaliya kasoo horjeeda oo dilay Darawalkii Madaxweynaha Soomaaliya kaasoo lagu aasay dalka Uganda

Isniin, June 14, 2010 (HOL) − Darawalkii Madaxweynaha Soomaaliya Sheekh Shariif Sheekh Axmed oo lagu magacaabi jiray Eriya Kabuye ayaa lagu aasay Magaalada Luwero ee dalka Uganda, sida uu qoray Wargeyska New Vision ee kasoo baxa dalkaas.

Sarkaal sare oo ka tirsan ciidamada Uganda oo lagu magacaabo Lt. Michael Turiraba ayaa u sheegay Wargeyska New Vision sabtidii in Kabuye uu ku dhintay mid ka mid ah Madaafiic lagu weeraray Madaxtooyada horraantii bishan.

"Darawalkii Madaxweyaha Soomaaliya wuxuu ku dhintay Madfac kula dhacay gaarigiisa, waxyar kaddib markii uu Madaxweynaha Soomaaliya geeyay garoonka diyaaradaha Muqdisho bishan 3-deedii" ayuu yiri Lt. Michael Turiraba.

Eriya Kabuye oo ah darawalka dhintay ayaa jiray 33-sano, waxaana shalay oo Axad ahayd lagu aasay Magaaladii uu ku dhashay ee Luwero, isagoo ifka kaga tagay 3-caruur ah iyo hooyadii u dhashay.

Waxaa sidoo kale weerarkaas ku dhintay askari kale oo ka tirsan ciidamada AMISOM kana soojeeday Uganda, waxaana isagana lagu aasay magaaladii uu ku dhashay, waxaana Madaxtooyada oo inta badan lagu weeraro Madaafiic ilaalo ka ah AMISOM.

Magaalada Muqdisho ayaa waxaa ku sugan ciidamo ka socda Uganda iyo Burundi, kuwaasoo huwan magaca AMISOM, waxaana laga dilay 38-askari tan iyo markii ay howlaha nabad ilaalinta ah ka bilaabeen Muqdisho 19-askari oo ciidamadaas ka mid ahna waxay u dhasheen Uganda.

Maxamed Xaaji Xuseen, Hiiraan Online
[email protected]
Muqdisho, Soomaaliya