Wararkii ugu dambeeyay ee Xaaladda Magaalada Beleweyne

Jimco, 15, Jen, 2010 (HOL) Xaaladda Magaalada Beledweyne ee xarunta u ah Goballka Hiiraan wali waa mid kacsan waxaana isku hor fadhiya qeybo ka mid ah Magaalada Xoogag ka kala tirsan Culimada Ahlu Sunna Waljameeca iyo Xisbul Islaam iyo Xarakatu Shabaabul Mujaahidiin oo is garabsanaya.
 
Xoogagga Culimada Ahlu Sunna Waljameeca ayaa wali u muuqda  kuwo xoogga saaraya in ay la wareegaan Xaafada wali ay ka gacanta ku hayaan Ciidamada ka soo horjeeda, kuwaas oo dhinacoodana u muuqda in ay iska caabinayaan dhinaca kale ee ka soo horjeeda.
 
Iska horimaadyo goos goos ah oo maanta ka dhacay Magaalada ayaa inta laga war qabo waxaa ku geeriyooday hal ruux oo rayid ah halka labo kalana ay ku dhaawacmeen, waxaana wali ka jira guud ahaan magaalada dareen kacsan iyo cabsi dadku ka qabo in dagaallada sii daba dheeraadaan.
 
Dhinaca kale wararka laga helayo deegaanka Halgan oo ka tirsan Goballka Hiiraan ayaa sheegaya Godoomiyahii Xisbul Islaam ee Goballka Hiiraan Shuuriye Faarax Sabriye oo ay la socdaan gaadiid kuwa dagaalka ah in uu halkaas kulan kula qaatay Odayaal ka tirsan deegaanka Halgan iyagoo isla soo qaaday xaaladda dagaallada ka socda Magaalada Beledweyne.
 
Kulanka Guddoomiyaha Xisbul Islaam iyo Odayaasha dhexmaray ayaa waxa ka soo baxaya warar is khilaafsan, wararka qaar ayaa sheegaya in Odayaasha iyo Guddoomiyuhu ka wada hadleen in la joojiyo dagaallada ka socda Magaalada Beledweyne.
 
Marka laga hadlayo Xaaladda nolosha Magaalada waxaa isaga baxaya inta badan dadkii rayidka ahaa ee ku noolaa, waxaa xiran goobihii ganacsiga, Koranto malaha magaalada, oo xitaa waxaa go’ay Biyihii Magaalada, Waxbarshana warkeeda daa, Waxaana hubaal ah hadii ay xaaladdu sidan sii ahaato in ay sii adkaan doonto xaaladda nolasha inta yare ee ku sii harsan Magaalada kuwaas oo hadda ku nool marxalad aan wanaagsaneyn.
 
C/raxamaan Diini, Hiiraan Online
[email protected]