Xoogagga Al-Shabaab oo Geedo ka jaraya inta u dhaxeysa Isgoysyada Cali Kamiin iyo Ifka Xalan
Isniin, January 19, 2009(HOL): Ururka Al-Shabaab ayaa maanta wuxuu ka bilaabay magaalada Muqdisho howlo uu miinooyin kaga baarayo sidoo kalena uu dhirta kaga jirayo meelihii ay ka baxeen Ciidamada Itoobiya ee Magaalada Muqdisho.
Saraakiil iyo Xoogag ka tirsan Dhaqdhaqaaqa Al-Shabaab ayaa maanta waxay howshaas ka bilaabeen Wadada hormarta Garoonka Kubadda Cagta Muqdisho Stadium, gaar ahaan inta u dhaxeysa Isgoysyada Cali Kamiin iyo Ifka Xalan, iyadoo halkaasi lagu arkayay Xoogag ka amar qaata Al-Shabaab oo jaraya geedo Wadada Laamiga ah dhexdeeda ka baxay, isla markaana bacaad-celin ku sameynaya Wadadaas.
 |
| Afhayeenka Al-Shabaab Shiikh Mukhtaar Roobow Cali (Abuu Mansuur) |
Shiikh Mukhtaar Roobow waxaa uu sheegay in howsha ay wadaan ay isugu jirto Miino-saaris, Geedo-jaris iyo Bacaad-celin, wuxuuna caddeeyay in ay jiraan Miinooyin lagu aasay goobihii ay Dagaallada ka dhaceen intii ay Ciidamada Itoobiyaanka ku sugnaayeen Magaalada Muqdisho, kuwaasi oo uu caddeeyay in ay ka saarayaan halkii lagu aasay.
Sidoo kale waxaa halkaas ka hadlay U qeybsanaha Gobolka Banaadir ee dhaqdhaqaaqa Al-Shabaab Shiikh Cabdi Maxamed Xuseen, wuxuuna sheegay in howsha ay maanta bilaabeen ay tahay mid ay ugu adeegayaan shacabka Soomaaliyeed, wuxuuna carrabka ku dhuftay in uu jiro magac loo bixiyay howsha ay wadaan, kaasi oo ah {OLOLAHA ADEEGGA BULSHADA EE WILAAYAD
A GOBOLKA BANAADIR}.
Shiikh Cabdi Maxamed Xuseen waxaa uu sheegay in ay sii wadi doonaan howshan, isla markaana ay ku baahin doonaan meelo badan oo duur isu bedelay intii ay Dagaallada ka soceen Magaalada Muqdisho, wuxuuna ugu baaqay ganacsatada Soomaaliyeed iyo cid kasta oo arrintan gacan ka geysan karta in ay ka qeybqaadato.
Dhaqdhaqaaqa Al-Shabaab tan iyo markii ay Ciidamada Itoobiyaanka ka baxeen Magaalada Muqdisho Xoogaggooda laguma arki jirin meelaha ay Ciidamadaas ka baxeen sida Xoogagga kale ee Islaamiyiinta ah, iyadoo Afhayeenka Al-Shabaab Shiikh Mukhtaar Roobow Abuu Mansuur-na uu sheegay in aysan isku mashquulineynin meelo qabsasho iyo in lagu kala hor-maro meelaha ay Ciidamada Itoobiyaanka ka baxeen.
Afhayeenka Al-Shabaab Abuu Mansuur oo Geed falaya
Mid ka mid ah Xoogagga Al-Shabaab oo bacaad-celin sameynaya
Dadkii Muqdisho ka qaxay labo sano ka hor oo dib ugu soo noqonaya
Salaad Iidow Xasan (Xiis), Hiiraan Online
[email protected]
Mogadishu, Somalia