Saraakiisha Xoogagga Maxkamadaha Islaamiga oo ballan qaaday in ay dibadda uga baxayaan Magaalada Beledweyne

Axad, 13, July, 2008 (HOL)  Kulan Saacado badan qaatay oo dhaxmaray odayaasha dhaqanka Gobalka Hiiraan iyo Saraakiisha Maxkamadaha Islaamiga ee gacanta ku haya Magaalada Beledweyne ayaa ugu danbeytii laysku afgrtay in dibadda loo saaro Ciidamada Maxkamadaha ee jooga Magaalada.
 
Kulanka oo dhinaca Saraakiisha Maxkamaduhu ay ka joogeen Shiikh Xuseen Gaagaale iyo Col. Cumar Xaashi Aadan oo ah Xoghayaha Arrimaha Gudaha Isbaheysiga Dib u xoreynta ayaa si weyn looga dooday xiisadda ka aloosan Magaalada iyo fariimaha isdaba jooga ah ee odayaasha ugu imaanaya dhinaca  Saraakiisha Ciidamada Itoobiya ee fadhigoodu yahay xerada duleedka bariee Jante-kuundisho.
 
Nabadoon Dacar Xirsi Xooshow oo ah madaxa Golaha Odayaasha Dhaqanka Gobalka Hiiraan ayaa warbixin kooban ka siiyay Saraakiisha Maxkamadaha wax yaabahii lays kula soo qaaday kulan ay la yeesheen Odayaasha Saraakiisha Ciidamada Itoobiya, waxaana uu sheegay Nabadoon Dacar in ay soo jeediyeen Ciidamada Itoobiya muddo kooban gudahood in Ciidamada Maxkamaduhu uga baxaan Magaalada haddii kale ay gudaha u soo gali doonaan, isagoo intaa raaciyay in la soo siiyay mudo 4 casho ah lagana sugayo jawaab la xiriirta farriinta loo soo dhiibay.
 
Nabaddoon Dacar ayaa u jeediyay dhinaca Saraakiisha Maxkamadaha codsi ah in ay dibadda uga baxaan Magaalada si markaas loo bad baadiyo shacabka, gaar ahaan waxaa uu farta ku fiiqay meelaha ay degan yihiin dadka rayidka ah ee Ciidamada hada fariisinka u ah.
 
Intaas kadib Col. Cumar Xaanshi Aadan ayaa sheegay in aysan marnaba dhinacoodu diyaar u ahayn in lagu dul dagaalamo dadka rayidka, isagoo intaas ku daray in laga bilaabo maanta Ciidamada Maxkamaduhu dibadda ka tagi doonaan Magaalada, " Annaga oo fiirineyna Nabad-galyada dadka rayidka ah waan aqbalnay in aynu dibada Ciidamada u saarno, laakiin dhinaca Odayaasha Dhaqanka ma adinka ayaa damaan qaadaya in aysan soo gali doonin Ciidamada Itoobiya marka ay baxaan kuwa Maxkamadaha”ayuu hadalkiisa sii daba dhigay Col. Cumar Xaashi.
 
Nabadoon Dacar ayaase sheegay in arintaas ay ka wada hadleen dhinaca Saraakiisha Itoobiya isla markaana ay ka ballanqaadeen in aysan soo gali doonin Magaalada, lana sameyn doono ayuu yiri Ciidamo madani ah.
 
Si kastaba arrintu ha ahaatee, kulanka  waxaa uu ahaa mid si furan u dhacay iyadoo dhinacyadii ka qeyb-galayna ay isla garwaaqsadeen dhibaatada heysta dadka rayidka ah ee ka bara baxay gulufka dagaal ee maalmaha ka jiray Magaalada, waxaana haddii ay ka dhabeeyaan dhinaca Maxkamaduhu ballanqaadkooda ah in ay isaga baxaan Magaalada waxay rajo soo laabasho galin doontaa dadka rayidka ah ee ku dhibaateysa goobihii ay ku barkaceen.
 
C/raxmaan Diini, Hiiraan Online
[email protected]
Beledweyn, Somalia