Qaramada Midoobey oo mar kale ku celisay walaaca ay ka qabto ceyrintii wakiilkoodii Soomaaliya
Axad, Janaayo, 06. 2019 (HOL) –Inkastoo xoghayaha guud ee
Qaramada Midoobey Antonio Guterres 04
bisha January uu sheegay in uu wakiil cusub u magacaabayo Soomaaliya, ayaa
haddana dhinaca kale golaha Amaanka Qaramada Midoobey waxaa uu mar kale ku
celiyay walaaca ay ka qabaan go’aankii dowladda Soomaaliya dalka uga saartay
Nicholas Haysom oo ahaa ergeygii QM ee siyaasada Soomaaliya.
Haysom oo ah shaqsi ka soo jeeda dalka Koonfur Africa iyo
qabiir Diblomaasiyadeed ayeey dowladda Soomaaliya amartay in uu dalka isaga
baxo kaddib markii uu su’aal ka keenay doorashadii ka dhacday Baydhabo,
xariggii Mukhtaar Rooboow iyo 15 ruux oo sida uu hadalka u dhiggay lagu dilay
Baydhabo.
Goluhu waxaa uu sheegay in 2019 uu Soomaaliya u
yahay Sanad xasaasi ah waxay-na ugu baaqeen hogaanka dalka in ay wadajir u
shaqeeyaan si ay u horumariyaan isbadaladda Siyaasadeed iyo Amni.
“Golaha Ammaanka wuxuu aad uga xunyahay go’aanka Dowladda Federaalka
Soomaaliya ee la xiriiray Wakiilkii Xoghayaha Guud ee Qaramada Midoobay Haysom’
Wuxuuse xaqiijinayaa xushmenyta madax bannaanida Soomaaliya iyo wadajirka
dhuleed iyaga oo dhiirrigeliyay in lasii dardargeliyo wada shaqeynta heer kaste
ee sanadkan adag ee 2019” ayaa lagu yiri War kasoo baxay Qaramada Midoobey.
Dowladda Britain ayaa qoraal ay soo saartay dhankeeda ku muujisay walaaca
ay ka qabto go’aanka Soomaaliya waxayna taageero u muujisay howlgalka Qaramadda
midoobay ee Soomaaliya.
Laakiin dowladda China ayaa sheegtay in waajibaadka golaha amaanka Qaramada Midoobey uu yahay in la ilaaliyo Madaxbanaanida,
Aqoonsiga dhuleed, Madaxbanaanida siyaasadeed iyo midnimadda Soomaaliya,
Dowladda Soomaaliya ayaa ku adkeysatay mowqifkeedii
ay dalka ka ceyrisay Mr Haysom oo sida ay dowladdu sheegtay ku xadgudubay
nidaamka Diblomaasiyada iyo madaxbannaanida dowladda Soomaaliya.
C/raxmaan Diini, Hiiraan
Online
[email protected]