Gen Shuute : Kiisaska ugu badan ee maxkamada ciidamadu qaaday sanadkii tagay waa kuwo la xiriira argagixisada
Jimco, Janaayo, 11, 2018 (HOL)- Guddoomiyaha
maxkamada Darrada Koowaad ee ciidamada qalabka sida Gen Xassan Cali Shuute ayaa
faah faahin ka bixiyay kiisaska ugu badan ee maxkamada soo gaaray sanadkii la
soo dhafay.
Wuxuu sheegay in kiisaska ugu
badan ee loo soo gudbiyo yihiin kuwo la xiriira Argagixisada sida uu hadalka u
dhigay, gaar ahaan Al-shabaab iyo Daacish, waxaana uu intaa ku daray in labadan
Urur ku sii kala badan yihiin dacwadaha soo gaara maxkamada.
‘’Labadan Urur fal danbiyeed-yada
ay galaan waa kuwa ugu badan ee maxkamada soo gaara, gaar ahaan Ururka
Al-shabaab oo ah kan ugu sii badan dacwadaha aan qaado’’ ayuu yiri Gen Shuute.
Gudoomiyaha Shuute ayaa sheegay in wali ay taagan
tahay halista labada Urur, gaar ahana waxaa uu farta ku fiiqay Daacish tahay
mid ka halis badan Ururka Al-shabaab dhinaca afkaarta.
‘’Marka labadooda leys bar bar dhiggo Daacish ayaa ka halis badan Ururka
Al-shabaab, maxaa yeelay Daacish Al-shabaab iyo shacabka Soomaaliyeed intooda
kale waxey u arkaan in ay yihiin kuwo Diinta ka baxay ayuu yiri ‘’ guddoomiyaha
maxkamada ciidamada.
Maxkamada ayaa xukunno isugu jira
xabsi ciidan, xabsi daa’in iyo dilal ku riday rag u badan dhalinyarro oo ka
tirsanaa labadan Urur waxaa ugu danbeeyay labo dhalinyarro ah oo ku eedeysnaa
dilka mid ka mid ah nabaddoonnada Soomaaliyeed.
C/raxmaan Diini, Hiiraan Online
[email protected]