9/23/2019
Today from Hiiraan Online:  _
Wararka Maanta- Khamiis, Aug 1 , 2019
Warbixin kooban doorkii Siyaasadda ee Alle ha u naxariisteen Eng Yariisoow


 

Khamiis, Augusto, 01 2019 (HOL)- Guddoomiyihii hore ee gobolka Banaadir iyo Duqii Muqdisho Alle ha u naxariisteen Eng Cabdiraxmaan Cumar Cismaan Yariisoow waxaa uu siyaasada dalka ku soo jiray si toos ah laga soo bilaabo 2006dii, waxaana uu ku noolaa waqtigaa magaalada London ee dalka Britain.

Ku dhawaad 13 sanadood oo toos ah ayuu siyaasadda iyo dowladdihii dalka isaga danbeeyay siyaabo kala duwan ula soo shaqeeyay, isaga oo soo qabtay xilalka, Labo Wasiir, Afhayeenkii madaxtooyada Soomaaliya iyo La taliye sare oo dhinaca warbaahinta.

Maanta ayuu ku geeriyooday magaalada Doha ee dalka Qatar oo loo qaaday Khamiistii toddobaadkii hore kaddib markii uu dhaawac culus soo gaaray weerar Ismiidaamin ah oo ka dhacay xarunta gobolka Banaadir, waxaana weerarkaa ku dhintay saddex guddoomiye degmo, saddex Agaasime iyo waliba la taliye sare oo dhinaca sharciga.

Xilalka uu soo qabtay Yariisoow mudadii uu siyaasadda ku soo jiray waxaa ka mid ahaa Wasiirkii Lacagta iyo Wasiirka Warfaafinta, sidoo kale waxaa uu la taliye sare oo dhinaca Warbaahinta uu u ahaa madaxweynihii hore ee Soomaaliya Xassan Sheekh Maxamuud.

Inta aan loo magacaabin guddoomiyaha gobolka Banaadir oo uu hadda ahaa waxaa uu dowladda uu hoggaamiyo Xassan Cali Kheyre ka soo noqday Wasiirka Warfaafinta.

Wuxuu billaabay in arrimaha siyaasadda uu ka shaqeeyo xilligii uu ku noolaa magaalada London ee dalka Britain.

Wuxuu sannadkii 1986-dii ka qalanjebiyay jaamacadda Umadda Soomaaliyeed, isagoo bartay culuumta handasada.

Markii uu jaamacadda dhammeeyay illaa sannadkii 1991 wuxuu ka shaqeeyay Wasaaraddii howlaha guud iyo guriyeynta iyo wasaaraddii Maaliyadda oo uu u ahaa Injineer iyo maamule mashaariic.

Intii uu London ku sugnaa, Eng. Yariisow wuxuu bartay maareynta ganacsiga, culuumta kumbuutarada iyo maamulka iyo maareynta guriyeynta oo 2004 uu shahaadada mastarka ka qaatay jaamacadda Westminster.

Wuxuu London ka noqday hoggamiye bulsho iyo Maamule iskuullo. Wuxuu sidoo kale ka mid ahaa qabanqaabiyihii kulankii weynaa ee qurba joogta Soomaalida UK ee 2007-dii lagu qabtay magaalada Leicester.

Wuxuu noqday guddoomiyihii ururka u dooda xuquuqda Soomaalida UK ee Somali Concern Group, muddadii u dhexeysay 2004 illaa 2008.

Dadka sida dhaw ula shaqeeyay Yariisoow ee aqoonta wanaagsan ulaa waxaa ay ku si sifeeyeen in uu ahaa shaqsi deggan oo kalsoonaan in uu ka shaqeeyo dalka waqti adag, waxaana uu siyaabo kala duwan ula jaanqaaday dowladihii dalka isaga danbeeyay, taasoo muujineysa sida uu ugu wanaagsanaa ku shaqeynta hadba marxalada la joogo ee siyaasadeed.

C/raxmaan Diini, Hiiraan Online
[email protected]    










Click here
8/1/2019 3:01 PM EST
Khamiis, Augusto, 01 2019 (HOL)- Ra’iisul Wasaaraha Xukuumadda Federaalka Soomaaliya Xasan Cali Kheyre ayaa Guddi ka kooban Afar iyo Toban Xubnood u magacaabay Aaska Qaranka ee loo sameynayo Guddoomiyahii gobolka Banaadir ahna Duqii Muqdisho Marxuum Cabdiraxmaan Cumar Cismaan Yariisoow oo maanta ku geeriyooday dalka Qatar, Waxaana guddigaan guddoomiye u ah Ra’iisul wasaare ku-xiggeenka XFS.

8/1/2019 11:52 AM EST
Khamiis, Augusto, 01 2019 (HOL)- Kulanka oo isugu jiray tacsi loo dirayo eheladda dadkii ku dhintay qaraxii toddobaadkii hore ka dhacay xarunta maamulka gobolka Banaadir iyo maqaamka caasimada Muqdisho ayaa waxaa ka qeybgalay, xildhibaanno, odayaal dhaqameed waxgarad ka soo jeeda gobolka Banaadir.

8/1/2019 10:31 AM EST
Khamiiis, Augusto 01, 2019 (HOL)-Ra’iisul Wasaaraha xukuumadda federaalka Soomaaliya Xasan Cali Khayre ayaa magacaabay guddi ka kooban golaha wasiirrada oo ka shaqeynaya aaska guddoomiyihii gobalka Banaadir, Eng. Cabdiraxmaan Cumar Cusmaan (Yariisow) oo ku geeriyooday Isbitaal kuyaala magaalada Dooxa ee dalka Qatar.

8/1/2019 10:16 AM EST
Khamiiis, Augusto 01, 2019 (HOL)- Madaxweynaha Soomaaliya Maxamed Cabdullaahi Farmaajo ayaa tacsi tiiraanyo leh u diray qoyskii, qaraabadii iyo dhammaan shacabka Soomaaliyeed ee uu ka baxay Marxuum Cabdiraxmaan Cusmaan Cumar (Eng. Yariisow) oo goor dhaw ku geeriyooday dalka Qatar.


8/1/2019 8:31 AM EST
Khamiiis, Augusto 01, 2019 (HOL)- Dowlad-gobolleedka Puntland ee Soomaaliya ayaa maanta u dabaal-deggay sannad-guurradii 21aad ee ka soo wareegatay xilligii la aas aasay.

8/1/2019 6:21 AM EST
Khamiis, Augusto, 01, 2019 (HOL)-Aadan Maxamed Cali oo ka tirsanaa Daacish ayaa lagu Xukumay Dil Toogasha ah, kadib markii Maxkamadda Ciidamada qalabka sida ku heshay inuu geystay dilal ka kala dhacay Boosaaso iyo Muqdisho.

8/1/2019 5:22 AM EST
Khamiiis, Augusto 01, 2019 (HOL)- Madaxtooyadda Soomaaliya ayaa goor dhow shaacisay in Madaxweyne Maxamed Cabdullaahi Farmaajo uu celiyay jinsiyaddiisii labaad ee uu ka qaatay dalka Marekanka.

8/1/2019 4:27 AM EST
Khamiiis, Augusto 01, 2019 (HOL)- Ra’iisul Wasaaraha Soomaaliya, Xasan Cali Khayre, ayaa dhammaan qeybaha kala duwan ee bulshada Dowlad Gobaleedka Puntland ugu hambalyeeyay munaasabadda xuska 1da August oo ku beegan 21 sano guurada kasoo wareegtay maalintii dhidibada loo taagay.

8/1/2019 4:14 AM EST
Khamiiis, Augusto 01, 2019 (HOL)- Deegaannada Puntland ayaa maanta looga dabaal-deggaya xilligii la aasaasay dowlad-gobolleedka.

8/1/2019 2:00 AM EST
Khamiiis, Augusto 01, 2019 (HOL)- Madaxweynaha dowlad gobolleedka Jubbaland Axmed Maxamed Islaam [Axmed Madoobe] ayaa ugu baaqay laamaha Amniga Jubbaland in jawaaab deg deg ah laga bixiyo sida uu hadalka u dhigay dilka Suldaan Rashiid Dhurre.

8/1/2019 1:31 AM EST
Khamiiis, Augusto 01, 2019 (HOL)- Wasiirka Gaashandhigga Xukumadda Federaalka Soomaaliya, Xasan Maxamed Cali, ayaa garoonka diyaaradaha ee Aadan Cadde kusoo dhoweeyay cutubka ka tirsan ciidamada xoogga dalka oo tababar ku soo qaatay dalka Turkiga

8/1/2019 1:21 AM EST
Khamiiis, Augusto 01, 2019 (HOL)- Wararka ka imanaya gobolka Bakool ee Koonfurta Soomaliya ayaa sheegayaa in saacadihii ugu danbeeyay uu halkaa dagaal culus ku dhaxmaray xoogag taabacsan Mukhtaar Rooboow iyo dagaalamayaasha Al-shabaab.