Jaaliyadda Switzerland oo soo dhaweysay doorkii wax qabad ee safiirkoodii hore Faadumo Insaaniya
Axad, April, 28, 2019 (HOL)–Jaaliyadda
Soomaaliyeed ee dalka Switzerland ayaa soo dhaweysay doorkii wax qabad ee
safiirkii hore ee Soomaaliya u joogtay dalkaa Danjire Faadumo Cabdullaahi Insaaniya oo hadda loo
baddalley in ay noqoto safiirka ama danjiraha Soomaaliya ee dalka India.
Qoraal Jaaliyadda ay soo saartay ayaa u dhignaa
sidan :
"Waa ognahay in xilka uu yahay meerto hase
yeeshee Reer Switzerland waxaa ku weynaa oo ay jeclaayeen in aad la joogto
balse taasi ma noqon oo waxaa noo diidey nasiibka". Sidaa waxaa yiri
Jaaliyada Somaaliyeed ee dalka Switzerland.
Waxaa ay sheegeen in aysan iloobi doonin wax-qabadkii
Danjire Faduma Insaaniye maadaama mudadii safiirka ay ahayd ay hagaajisey
xiriirka laba geesoodka ah ee Dowladda Federaalka Soomaaliya iyo Switzerland,
xiriirka bulshada Soomaaliyeed ee ku dhaqan dalka Switzerland iyo xiriirka
hayadaha Qaramada Midoobey iyo dalkeena.
Danjire Faduma Insaaniye waxuu dadaalkeeda u soo
hoyey Soomaaliya in ee marki ugu horeysey ay xubin ka noqoto Golaha Xuquuqda
Aadanaha iyo Ururka Ganacsiga Aduunka oo aan ka noqoney “Observer” kuna socona
in aan noqa xubin joogto ah. waxaa ay kaloo xiriir toos ah ugu sameysey dalka
Ururada Caalamiga ah oo xaruntooda ku taala Geneva.
Mustaf Bashiir Goobdoon oo ku hadlaya magaca
Jaaliyada Soomaaliyeed ee dalka Switzerland ayaa u mahad celiyey Danjire Faduma
Insaaniye oo uu sheegey in aysan marnaba iloobi doonin waayo waxaa uu sheegey
in ay ahayd Danjirihii ugu fiicnaa ee soo mara bulshada Soomaaliyeed ee ku nool
dalka Switzerland isagoo sheegey in ay muujisey in si joogto ah uga warqabto
dadka Soomaaliyeed ee ku nool dalkaas.
Ugu dambeyn, Mustaf waxuu ugu ham-baleeyey
magacaabista xilka Danjire-nimo ee dalka India isagoo Ilaah uga baryey in uu la
garab galo xilkaas uguna rajeeyey in sidii ay ugu adeegtey reer Switzerland in
ay ugu adeegto Jaaliyada Soomaaliya ee dalka India.
Dowladda Soomaaliya ayaa isku badashay dhawaan
safiirradii u kala joogay dalalka Switzerland iyo India Faadumo Cabdullaahi
Maxamuud Insaaniya iyo Abyan Maxamed Saalax.
C/raxmaan Diini,
Hiiraan Online
[email protected]
