AMISOM oo jawaab ka bixisay sawirro dad badan ka careysiiyay oo ka soo muuqday baraha bulshada
Isniin, April, 22, 2019 (HOL) – Taliska
howlgalka midowga Africa AMISOM ayaa jawaab ka bixiyay sawir dad badan ka careysiiyay oo 24kii saac ee la
soo dhaafay hadal heyntiisu ku badneyd baraha bulshada.
Sawirka ayaa waxaa ka soo dhax muuqday sarkaal ka tirsan ciidamada
howlgalka midowga Africa AMISOM oo cabiraya qof dumar ah oo Soomaali ah
islamarkaana sidata xijaab, taasoo dad badan ay u arkeen in qofka wax cabiraya
uu yahay Lab [ Nin] hasse ahaatee AMISOM ayaa sheegtay in qofka cabirka
ka qaadaya gabadha Soomaaliyeed tahay haweeneey ka tirsan saraakiisha AMISOM
kana soo jeeda dalka Zimbabwe.
Aragtiyada laga dhiibtay sawirka oo ku baahay baraha bulshada ayeey dadku siweyn ugu kala qeybsameen,
iyadoo qaarkood ay ku doodeen in ay tahay arin xad-gudubna ku ah
Diinta Islaamka iyo Dhaqanka Soomaalida in Askari ka tirsan AMISOM uu taabto jirka qof Dumar ah oo Soomaaliyeed, iyaga u arkayay qofka
sawirka ka dhax muuqda in uu yahay Lab [Nin]
Dadka qaar oo markiiba gartay in
ay tahay qof dumar ah sarkaalka AMISOM ayaa aragidooda ku saleeyay in marka
hore ay haboon tahay in wax la hubsado.
Laakiin sawirrada markii danbe ay
soo bandhigeen taliska AMISOM ayeey dad badan ku xaqiisadeen in qofka cabirka
ka qaadaya gabadha Soomaaliyeed tahay haweeneey ka tirsan AMISOM.
“Qofka Booliiska AMISOM ka tirsan ee cabirka ka
qaaday gabadha Soomaaliyeed waa sarkaal dumar ah oo ka tirsan kooxda Booliska
Zimbabwe ka socda, AMISOM waxay tixgalisaa, illaalisaana dhaqanka Soomaaliyeed,
waligeedna uma xilsaarto sarkaal Rag ah in uu taabto haween Somaali ah” ayaa
lagu yiri qoraal kooban oo la soo dhigay bogga AMISOM ku leedahay Twitterka.
Saraakiisha Booliiska AMISOM isugu jira rag iyo
dumar ayaa u muuqda kuwo hadba si gaar
ah ula shaqeeya cidda ay quseyso , iyadoo saraakiisha dumarka mar walba la
macaamilaan haweenka Soomaaliyeed xiliyada lagu jiro tababarka ciidannimo.
C/raxmaan Diini,
Hiiraan Online
[email protected]