Sabti, Maarso, 10, 2018 (HOL) – Madaxweynaha dowladda Soomaaliya Maxamed Cabdullaahi Farmaajo oo khudbad ka jeediyay furitaankii Kalfadhiggii saddexaad ee labada Aqal ee Soomaaliya ayaa soo hadal qaaday arrimo dhowr ah, isaga oo digniin u diray dowladdaha iyo Shikaddaha Shisheeye.
Madaxweyne Farmaajo oo soo
hadal qaaday madaxbannaanida Soomaaliya ayaa sheegay in aan la ogolaan doonin in
lagu xad gudbo midnimada Umadda Soomaaliyeed, waxaana uu sheegay in Soomaaliya
ay diyaar u tahay in ganacsi iyo maalgashi lagu sameyso balse ay muhiim tahay
in ogolaansho looga haysto hay’adaha dastuuriga ah ee dalka.
“Soomaaliya waxey diyaar u tahay maal-gashi iyo ganacsi ay la wadaagto caalamka, cid kastoo dooneysa iney
maal gashato Soomaaliya waa iney ogolasho ka hesho hey’adaha sharciga ah ee
dowladda, waxaan uga digayaa wadamada iyo shirkadaha shisheeyey ineysan ku
xadgudbi karin Qarannimada iyo midnimada umadda Soomaaliyeed, waxaa ay ka faa'ideysanaayeen in aan kala qeysannahay, waxey ka faa'ideysanaayaan in aan taagdaran-nahay, laakiin walaahi Soomaali ma yaqaannaan, Soomaali waa dad qab leh, Soomaali waa dad damiir leh” ayuu sii raaciyey
madaxweyne Farmaajo.
Madaxweynaha oo dhinaca kale soo hadal qaaday Wada hadaladda Soomaaliland ayaa yiri''Waxaan dhawaan bilaabi doonaa Wada hadala aan la
leenahay Somaliland, dadka Soomaaliyeed waa dad walaalo ah oo aan kala maarmin,
wixii khilaaf ah waxaan ku dhameyn
doonaa miiska wada hadalka'' ayuu yiri madaxweynaha dalka.
Mar uu ka hadlayay ahmiyada ay
leedahay in la bixiyo canshuurta ayuu sheegay in looga kaaftoomi karo kaalmaha
shisheeye iyo in dowladdu bixiso mushaaraadka shaqaalaha dowladda iyo ciidamada.
“Canshuurta waxaan uga
kaaftoomi karnaa kaalmada shisheeye hadii la bixiyo waxaa noo fududaaneysa
bixinta mushaaraadka shaqaalaha iyo ciidamada, iyo sidoo kale inan al-Shabaab ka
saarno meelaha ay heystaan” sidaasi waxaa yiri madaxweynaha dalka.
Inkastoo khudbada madaxweynuhu
aheyd mid siweyn loo wada sugayay gaar ahaan la filayay in uu ku soo qaado
khilaafka ka soo cusboonaaday dhinaca Imaaraadku ayuu madaxweynuhu muuqday in
uusan si toos ah arintaa u abaarin.
C/raxmaan Diini, Hiiraan Online
[email protected]
