Shirkadaha Jaadka“Sicir-bararka jira kollay qayb-baanu ka ahayn waa xaqiiq oo ma diiddanin”
Sabti, Feberaayo, 03, 2018 (HOL) - Go’aamaddii
wax lagaga qabanayey sicir bararka waxa ku jiray qodob ah in cashuur libin laab
ah lagu kordhiyo Jaadka ka yimaadda Itoobiya, taasna waxay ka biyo diiday
shirkadaha Jaadka oo ka hor yimid cashuurta badan ee lagu kordhiyey.
Inta badan marka jaadka cashuur lagu
kordhiyo waxa jaadleyaashu soo maraan jidad kale oo si kontorobaan ah ku soo galiyaan
magaaladda, haseyeeshee iyadoo taas laga hortagayo ayaa waxa xukuumaddu
dib u eegtay cabashadoodda, waxaanay ka dhintay qayb kamid ah cashuurtii lagu
soo kordhiyey.
“in Cashuurka Qaadka la
kordhiyo waanu isku ogayn marka hore, laakiin Cashuurta ay kordhiyaan Cashuur
badan bay ahayd, markaa dib ayaanu uga Wada-hadalnay, markaa qaybna way naga
daayeen, qaybna waanu aqbalnay..” ayuu yidhi afhayeenka shirkadaha Qaadka Xasan
Weerar.
Waxaanu intaas ku daray “Cashuurta
la nagu kordhiyey waxay ahayd 2,690 (Shilin SL) halkii Kiilooba, markaa 1,90
(Shilin SL) waa la naga daayey, 1,600 waanu Aqbalnay).”
Afhayeenka Qaadleyaashu wuxuu
sheegay “Markii hore waanu isku dhacnay Xukuumadda, laakiin markii dambe ayaanu
si wanaagsan u wada-hadalnay Madaxweynaha, Madaxweyne ku-xigeenka, Wasiirka
Maaliyadda, Taliyaha Booliiska iyo Wasiirka Arrimaha gudaha, wixii aanu ka
cabanaynay waa la naga daayey, markaa arrinkayagu waa heshiis, Cashuurtaa imika
sare loo qaadayna waa wax aanu isla ogollahay.”
Shirkadaha Jaadku waxay si cad u
cadeeyeen in sicir bararka qayb ka yihiin, waxaanu yidhi “Sicir-bararka
jira kollay qayb-baanu ka ahayn waa xaqiiq oo ma diiddanin haddii aanu nahay
reer Qaad-wale, laakiin waxa meesha taalla siday u fadhiisanaysaa, Waayo?
Lacagta Birta innagu ma lihin, Dollar-kana innagu ma lihin, haddii Bir lagu
qaatana Sicir-barar bay keenaysaa, haddii Dollar lagu qaatana Sicir-barar bay
keenaysaa, markaa Qaadka oo keliya ma sababo (Sicir-bararka) ee waxyaabo badan
baa sababa.”
Jaadleyaashu waxay sicir bararka ku
eedeeyeen lacagta Mobiladda lagu shubto ee suuqa looga adeegto waxaanu
yidhi” shan Milyan waxay habeenkii u hoydaan Zaadka, ku hadalkuna waa
Saddex Milyan, markaa 8-daa Milyan baa u hoyda (Zaadka), laakiin Annaga
habeenkii 3 boqol oo kun oo Dollar baa noo hoyda ama Boqol iyo labaatan, markaa
eedayntu annaga uun maaha ee waxa ugu daran Malcaamadaha Qur’aanka iyo kuwa
Wadaaddada ah ee Qaadka eedeeya, Ilmaha yar waxay ka qaataan 35 Dollar,
Dawladduna Cashuur kama qaaddo, Laydhkaa Dollar laga qaadaa, Xoolaha Dollar baa
lagu iibiyaa, wax lacagta Somaliland qaata Annaga ayaa jirna.”
Shirkadaha jaadka ayaa ku dooday in
iyagu yihiin dadka kaliya ee lacagta wadanka isticmaala,isla markaana
xafiisyadooda ay buuxaan lacagto oo inta badan waxay ku iibiyaan Shiling Somaliland.
Dhinaca kale, dadweynaha ayaa si
weyn usoo dhoweeyey dhamaan go’aamaddii wax lagaga qabanayey sicir bararka oo
dadku u arkayeen inay sabab u yihiin lacagta Mobilada lagu shubto iyo Jaadka oo
habeenkii Dollarka sarifta oo u gudbiya Itoobiya.
Barkhad-ladiif M. Cumar,
Hiiraan Online
[email protected]
Hargeysa, Somaliland.