Faysal Cali Waraabe“Kililka shanaad in cadaalad lagu maamulo ayuu u baahan yahay “
Isniin, August, 13, 2018 (HOL)– Gudoomiyaha xisbiga
mucaaradka ah ee UCID Eng:Faysal Cali Waraabe ayaa Madaxweynihii hore ee
Kililka shanaad ku eedeeyey inuu tacadiyo ka sameeyeen deegaanka, isla markaana
ugu baaqay in dhulka cadaalad lagu maamulo, maadaama oo shantii soomaaliyeedba
deegaanka ku wada nool yihiin.
Faysal Waxa uu sidaas ka sheegay mar uu ka
warbixinayey safar uu ku tagay Kenya oo uu kula kulmay qaadhaanbixiyeyaasha
Somaliland ka caawiya doorashooyinka.
Sidoo kale, waxa uu madaxweyne Biixi ka dalbaday
in aanay dib u dhicin doorashadii Baarlamaanka iyo golaha deegaanka oo uu la
xaajoodda xisbiga WADDANI si aanay ceeb ugu noqon Somaliland inay mar kale dib
uga dhacdo doorashadaasi.
Waxa kale oo uu kahadlay taliye ka goostay
ciidanka Somaliland oo Puntland saldhig uu ciidan ku ururiyo ka samaystay,
waxaanu taliyaha usoo jeediyey inuu wada hadalka ogolaado oo uu dawladda la
heshiiyo.
“Arrinta Taliye Caare waxay ahayd arrin la
quudhsaday, waxay ahayd in lagu daro arrintii Ceel afweyne nabada laga
waday, nabadii la waday in lagu daray ayey ahayd, Caarre waxaan leeyahay
Somaliland way jiraysa oo nin kolba dhinac u dusdusayaa ma burburin karo, waa
inaad qaadata wada hadalka laguu furey, maalintaad kaligaa ahayd aniga idhi
yaan la taaban oo madaxweynaha u tagay oo ku idhi ninkaasi yaan la taaban
arrintiisa ha loo kaadiyo tolkiisii baa qaban doonnee, Somaliland waxba ma
yeeli kartid ee adiga uun baa is ceebaynaya”ayuu yidhi Faysal oo arrinta
taliyaha goostay ka hadlayey.
Faysal Cali Waraaabe waxa uu hambalyeeyey
gudoomiyaha cusub ee loo doortay xisbiga dimuqraadiga soomaalida Itoobiya Axmed
Shide oo uu ku tilmaamay nin aqoonyahan ah oo xilkaasi qaban kara.
Mar uu ka hadlayey dawlad deegaanka Soomaalidda
Itoobiya waxa uu yidhi “Soonaha shanaad 60% baa dadkeena ku nool,
dhulkaasi waa dhul shantii soomaaliyeedba ku jiraan, illaa mooyaale ilaa Lawyo
caddo, koone ilaa koone ayaa wada degga, dhulkaasi waxa lagu noolaan
karaa iyadoo si cadaalad ah lagu xukumo, qoloodii hore ee Cabdi Maxamed
Cumar wuxuu ahaa xukun tacadi badan keenay oo taariikhda aan lagu hayn
meel uu dunidda uu ka dhacay tacadiga ka dhacay deegaankaasi soomaalidda”
Sidoo kale waxa uu soo jeediyey in xidhiidh
wanaagsan lala sameeyo soomaalida Itoobiya oo uu tilmaamay in aan marna la kala
maarmi Karin, waxaanu xusay in Jabhaddii ONLF uu la kulma oo uu Hargeysa ku
casuumay.
Barkhad-ladiif M. Cumar,
Hiiraan Online
[email protected]
Hargeysa, Somaliland.