Jimco, September, 08, 2017 (HOL) - Iyadoo dhawaan qoraal
si wada jir ah ay u soo saareen saaxiibada caalamka ay walaac ka muujiyeen
maamul cusub oo looga dhawaaqo gobolka Hiiraan, ayaa waxaa maanta magaalada
Beledweyne ka dhacay kulan hor dhac u ah dhismaha maamul lagu magacaabo
HiiraanLand oo ka kooban labada gobol Hiiraan iyo Shabeellada Sare.
Odayaal iyo waxgarad ka hadlay kulanka ayaa sheegay in
dhamaanba bulshada ku dhaqan gobolka Hiiraan ku mideysan yihiin dhismaha
maamulkan, iyaga oo sheegay in markii horeba waxgaradka gobolka Hiiraan ka soo horjeedeen dhismaha maamulka
Hirshabeelle ee xaruntiisu tahay Jowhar.
Arimahan oo dhan ayaa imanaya xili dhinaca kale magaalada
Jowhar loo diyaargaroobayo doorashada madaxweynihii labaad ee uu yeesho
maamulka Hirshabeelle wax ka yar sanad, kaddib markii xildhibaannada
baarlamaanku sheegeen in ay kalsoonida kala noqdeen madaxweynihii maamulka Cali
Cabdullaahi Cosobole oo hadda ku sugan magaalada Beledweyne.
Laakiin dhinaca kale beesha caalamka ayaa ku talineysa in
la raaco hanaanka sharci ee loo dejiyan in lagu dhaqmo maamulka Hirshabeelle ,
dastuurka iyo habraaca baarlamaanka ee u degsan, iyaga oo intaa raaciyay in la
ilaaliyo muhiiimada ay leedahay xasilloonida siyaasadeed ee lagama maarmaanka u
ah in horumar dheeraad ah laga gaaro hanaanka dhisidda dowlad goboleedyada iyo
sii xoojinta habka federaalka ka jira Soomaaliya.
C/raxmaan Diini,
Hiiraan Online
[email protected]
