Wakiilka Qaramada Midoobey oo ku baaqay in la dhaqangaliyo heshiiska Galmudug iyo Ahlu Sunna
Jicmo, December, 08, 2017 (HOL) – Wakiilka Gaarka ah ee Qaramada Midoobay u
qaabilsan Soomaaliya ayaa guul ku tilmaamay saxiixa heshiiska wadaagga awood
qeybsiga ah ee Talaadadii dhexmaray Galmudug iyo Ahlu Sunna Wal-Jamaaca.
Maamulada Galmudug iyo Ahlu Sunna oo Madaxtooyada Soomaaliya heshiis ku gaaray
maalin ka hor ayaa waxaa goob ka ahaa heshiiskaasi Madaxweynaha Soomaaliya,
Ra’iisul Wasaaraha, Madaxda Dowlad Goboleedyada, Guddoomiyaha Gobolka Banaadir
iyo xubno kale.
Mr. Keating wuxuu sidoo kale amaanay doorka ay ka ciyaareen Urur-goboleedka
Horumarinta IGAD ee u fududeeyay kulamada Nairobi iyo Jabuuti ee u dhaxeeyay
Galmudug iyo Ahlusuna, kahor inta aysan heshiiska ku gaarin Muqdisho.
Wakiilka Gaarka ah ayaa ku booriyay dhammaan dhinacyada daneeyayaasha oo ay
ka mid yihiin labada dhinac, Dowladda Federaalka, wakiillada maxaliga ah iyo
mas’uuliyiinta xubnaha Golaha iyo bulshada rayidka ah, si ay u sii wadaan sii
wadida horumarka iyo hirgelinta heshiiska.
Heshiiskan oo ka koobnaa 14 qodob ayaa qodobada ugu muhiimsan waxaa ka mid
ah in hogaamiyaha Ahlu Sunna Sheekh Shaakir uu noqonayo Madaxa Xukuumada dowlad
goboleedka Galmudug iyadoo xilkaasi uu yahay mid aysan hore u lahayn maamul
goboleedyada dalka.