Jicmo, December, 08, 2017 (HOL) – Ciidamada Booliiska Kenya ayaa maanta
toogasho ku dilay Ali Khamisi Mtsomo, oo ku eedeeysnaa falal Argagixisanimo, kaas
oo ay in muddo ah ku raad joogeen laamaha Ammaanka.
Ninkan oo markii la dilayay ku sugnaa degaan lagu magacaabo Likoni, ayaa
isku dayay inuu la dagaallamo Askarta, isagoo Seef ku dhaawacay mid ka mid ah
Saraakiisha Boliiska, ka hor intaanan la toogan.
Mtsomo, ayaa la tuhunsan yahay inuu xiriir la lahaa Ururka Al-shabaab ee uu
fadhigiisu yahay Soomaaliya, isagoo la tilmaamay inuu dhallin yaro badan oo ka
soo jeedda dalka Koongada Dimoqraaddiga ah u qoray inay ka mid noqdaan Daacish.
Ururka Al-Shabaab ayaa marar badan weerar dad rayid ah iyo Ciidamo Kenya ka
tirsan lagu dilay waxa ay ku qaadeen Kenya, waxaana ugu darnaa Labadii weerar
ay ku qaadeen xarunta Ganacsiga Westgate Mall iyo Jaamacada Gaarisa.
Al-Shabaab ayaa dalka Kenya weeraro ku qaadayay tan iyo sanadkii 2011 kii
markaas oo ciidanka dowladda Kenya ay gudaha u soo galeen Soomaaliya.
C/raxmaan Diini, Hiiraan Online
[email protected]
