Human Rights Watch oo dalbatay in la baaro danbiyaddii Mukhtaar Rooboow intii uu ka mid ahaa Al-shabaab
Arbaco, Augusto, 16, 2017 (HOL) – Hay’adda Xuquuqul
Insaanka ee Human Rights Watch ayaa ugu baaqday dowladda federaalka in ay
baarto dambiyadii uu galay Mukhtaar Rooboow Abuu Mansuur, kaddib markii maalintii shalay uu la hadlay warbaahinta.
Laetitia Bader oo ah cilmi bare sare
oo ka tirsan hay’adda Human Rights Watch oo lagu magacaabo Laetitia Bader ayaa
sheegtay in sharciyada caalamiga ay mamnuuc ka tahay in magangelyo la siiyo
dadka gala dambiyada waa weyn, iyadoo Mukhtaar Roobow oo ka mid ahaa
hoggaamiyeyaasha sare ee Al-shababa, intii uu ka mid ahaa uu galay dambiyo.
Waxaa ay sheegtay in Mukhtaar Roobow uu door hoggaamineed ku lahaa weeraro
ay geysatay Al-Shabaab, carruur lagu qasbay in la askareeyo iyo tacadiyo kale.
“Waa in dowladda Soomaaliya ay baaritaan ku sameysaa doorkii Roobow, ayna
xaqiijisaa kuwii ka dambeeyay dambiyadaas tacadiyadii foosha xumaa ee aanay
awooda u laheyn inay ka baxsadaan Cadaaladda”ayay tiri Laetitia Bader oo ka
tirsan Human Rights Watch.
Mukhtaar Roobow oo ayaa maalintii shalay kula hadlayay warbaahinta
magaalad Muqdisho isaga oo sheegay in
uu isaga baxay Al-Shabaab 5 sano ka hor.
C/raxmaan Diini, Hiiraan Online
[email protected]