Koox looga shakisan yahay Al Shabaab oo shan askari oo Police ah ku dilay dalka Kenya
Arbaco, Augusto, 16, 2017 (HOL) –Ugu yaraan shan askari oo Police ah ayaa
lagu dilay weerar gaadmo ahaa oo gelinkii dambe ee shalay ka dhacay gobolka
waqooyi-bari ee dalka-Kenya.
Koox hubeysan oo loo maleynayo Al Shabaab ayaa weerarkaasi ku qaaday
deegaanka ay ku sugnaayeen ciidamada, waxaana ay bili-liqeysteen dhammaan
hubkii ciidamada iyo gawaaridii u yaallay halka lagu magacaabo Alijize oo ku
taalla Garisssa.
“Qiyaastii 100 dagallanyahanno oo ka tirsan kooxda Al Shabaab ayaa weerarka
kusoo qaaday deegaanka, waxaana ay qaateen dhammaan waxii ay heli kareen”,
sidaasi waxaa sheegay qaar kamid ah dadkii ka badbaaday weerarka.
Madaxweynaha dalka Kenya Uhuru Kenyatta ayaa intii uu ku jiray Ololihiisa
doorashada, waxaa uu booqday Gobolka Lamu, waxaana uu halkaasi ka iclaamiyey
hawl-gal ballaaran oo dhanka amniga ah kaasi oo lagula dagaalamayo Al-Shabaab.
Mr Uhuru, ayaa intii uu ku sugnaa Lamu waxaa uu soo hadal qaaday dagaalka ay
kula jiraan xarakadda Al Shabaab, waxaana uu u sheegay ciidanka KDF-ta Kenya in
ay dilaan dabadeedna la aaso Al Shabaab haddii lagu arko degaannada Lamu.
Hiiraan Online,
Hassan Istiila
[email protected]
Mogadishu,Somalia