Axad, Augusto 13, 2017 (HOL) - Wararka naga soo gaaraya magaalada Jowhar ee
gobolka Shabeellaha dhexe ayaa sheegaya in goor dhaw halkaa is casilaad uga
dhawaaqeen 11 wasiir oo ka tirsanaa maamulka gobolleedka Hirshabeelle.
Shir jaraa’id oo ay qabteen ayeey ku sheegeen is casilaaddooda
wax qabad la’aan iyo in maamulku uu ka gaabiyay howlihii loo idmaday sidaa
daraadeed go’aansadeen in ay isaga baxaan.
Hasse ahatee ilo xog-ogaal ah oo ku sugan magaalada
Jowhar ayaa Hiiraan Online u sheegay in is casilaada wasiirradan la xiriirto
magacaabista degmooyin dhowr ah oo ka tirsan gobolka Hiiraan oo dhawaan u
wareegto ku soo saaray madaxweynaha dowlad gobolleedka Hirshabeelle Cali
Cabdullaahi Cosbole.
Laakiin dhinaca kale marka la eego mas’uuliyiintan is casilay shirkooda jaraa’id kuma aysan
sheegin ay ka biyo diidan yihiin magacaabista degmooyinka cusub.
Dhamaan xubnahan ku dhawaaqay in ay iska casileen
xilalkii ay ka hayeen maamulka ayaa
dhinaca kale ah xildhibaanno ka tirsan baarlamaanka Hirshabeelle iyaga oo
guddoonka u gudbiyay mooshin ka dhan ah madaxweyne Cali Cabdullaahi Cosoble.
Horay sidan oo kale xildhibaanno ka tirsan Hirshabeelle
ayaa mooshin ka keenay guddoomiyaha baarlamaanka maamulka Cismaan Barre
Maxamed, hasse ahaatee mooshinkaa ayaa ku dhamaaday wadahadal , iyadoo ugu danbeyntii xildhibaannadii
mooshinka wadday ku dhawaaqeen in ay dib uga laabteen.
C/raxmaan Diini, Hiiraan Online
[email protected]
