3/28/2024
Today from Hiiraan Online:  _
Wararka Maanta- Axad, Jun 9 , 2013
RA’IISUL WASAARE SAACID: “La isagama harayo in dagaallo la Huriyo dhiigga shacabkana macno-darro lagu daadiyo”


Axad, Juun 09, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa sheegay inaan la isaga hari doonin hurinta colaad ay ku dhintaan dad aan waxba galabsan in si macno-darro ah lagu daadiyo dhiigga shacabka Soomaaliyeed.

Saacid ayaa hadalkan ka sheegay kulan ka dhacay Muqdisho, isagoo xusay in dagaalladii ka dhacayay labadii maalmood ee lasoo dhaafay magaalada Kismaayo ay ahaayeen kuwo aan xaq ahayn oo ay ku dhinteen shacab aan waxba galabsan.

“Dagaalladii Kismaayo ka dhacayay waxay ahaayeen kuwo aan xaq ahayn, hubaalna ay tahay inaan lagu  gaari karin xal, waayo-aragnimo nagu filan waan qabnaa, waxaana u soo jeedinayaa dhinacyada ay khuseyso inay ka tanaasulaan ayna qaataan talooyinka xubnaha dowladda ee Kismaayo ku sugan,” ayuu yiri ra’iisul wasaare Saacid.

Ra’iisul wasaaruhu wuxuu sheegay in dhiigga shacabka Soomaaliyeed oo si micno-darro ah loo daadiyo inay tahay dambi weyn oo aan cidna looga hari doonin, isagoo xusay in hurinta colaaduhuna ay taas la mid yihiin.

“La isagama hari doono hurinta dagaallo sokeeye oo si macno-darro ah loo billlaabo, dad aan waxba galabsanna ay ku dhintaan,” ayuu ra’iisul wasaare Saacid oo intaas ku daray: “Qofkii mas’uuliyad darro dhiig Soomaaliyeed ku daadiya kama hari doonno xisaabteenna way socon doontaa.”

Dhanka kale, ra’iisul wasaaruhu wuxuu ku baaqay in lagu dadaalo inuusan ka dhicin Kismaayo dagaal dambe, khilaafka hadda jirana lagu dhameeyo wadahadal iyo xasillooni, wuxuuna dhinacyada hardamaya ugu baaqay inay ka fogaadaan wax walba oo dagaal hurinaya.

Hadalka ra’iisul wasaaraha Soomaaliya oo u muuqday mid uu ugu doodinayo dhinacyada ku dagaalamaya Kismaayo ayaa wuxuu imaanayaa iyadoo ay ka dhaceen Kismaayo dagaallo ay ku dhinteen dad ka badan 20-qof oo shacab ay ku jireen.

Ra’iisul wasaaruhu kama uusan hadlin hadalkii kasoo yeeray afhayeenka ururka Raaskambooni, C/naasir Seeraar ee ahaa in dagaalladii ka dhacay Kismaayo ay ahaayeen shirqool ay soo abaabushay dowladda Soomaaliya ayna ku guuleysteen inay fashiliyaan.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/9/2013 3:18 PM EST
Axad, Juun 09, 2013 (HOL) — Ugu yaraan 10-qof ayaa ku dhaawacmay qaraxyo kala duwan oo caawa ka kala dhacay magaalada magaalada Mombasa iyo magaalada Nairobi ee xarunta dalka Kenya, sida ay sheegeen saraakiil ka tirsan booliiska Kenya.

6/9/2013 2:38 PM EST
Axad, Juun 09, 2013 (HOL) — Xildhibaan Maxamed Maxamuud Ibraahim (Goodir) oo ka mid ah wafdiga dowladda Soomaaliya ee Kismaayo ku sugan ayaa ku eedeeyay ciidamada Kenya ee qaybta ka ah howgalka AMISOM inay la safteen dhinac ka mid ah dhinacyadii ku dagaalamaya Kismaayo.

6/9/2013 12:02 PM EST
Axad, Juun 09, 2013 (HOL) — Kulan ay isugu yimaadeen qaybaha kala duwan ee odayaasha, siyaasiyinta, xildhibaannada iyo waxgarad kasoo jeeda gobollada Juboboyinka oo maanta ka dhacay Muqdisho ayaa lagu dalbaday in la joojiyo dagaallada kasoo cusboonaaday magaalada Kismaayo.

6/9/2013 9:47 AM EST
Axad, Juun 09, 2013 (HOL) — Bartamaha magaalada Baydhabo gar ahaan agagaarka Hotel Bay ayaa ciidamo ka tirsan kuwa AMSIOM oo ku sugnaa waxaa lagu eegtay maanta bam-gacmeed, iyadoo qaar ka tirsan ciidamada AMSIOM iyo dad shacab ah ay ku dhaawacmeen.

6/9/2013 9:10 AM EST
Axad, Juun 09, 2013 (HOL) — Xukuumadda Soomaaliya ayaa maanta soo dhaweysay mashaariic cusub oo dowladda Sucuudiga ay ka bilaabayso dalka Soomaaliya, kuwaasoo ay fulinayso ururka iskaashiga Islaamka ee OIC, sida uu sheegay ra’iisul wasaaraha Soomaaliya.

6/9/2013 9:05 AM EST
Kulan ay isugu yimaadeen qaybaha kala duwan ee bulshada oo lagu lafa gurayay sidii hogaan midaysan loogu samayn lahaa jaaliyada Soomaaliyeed ee ku dhaqan wadanka Kenya ayaa lagu qabtay hotelka Nomad ee xaafada Islii.

6/9/2013 7:56 AM EST
Axad, Juun 09, 2013 (HOL) — Bannaanbax looga soo horjeedo dhibaatooyinka lagu hayo Soomaalida ku nool dalka Koonfur Afrika ayaa ka dhacay maanta magaalada Muqdisho, waxaana ka hadlay mas’uuliyiin uu ku jiray guddoomiyaha gobolka Banaadir ahna duqa Muqdisho, Maxamuud Axmed Nuur (Tarsan).

6/9/2013 7:32 AM EST
Axad, Juun 09, 2013 (HOL) — Madaxweynihii hore ee Koonfur Afrika, Nelson Mandela oo 94-jir ah ayaa la dhigay isbitaal u yaalla magaalada Pretoria ee dalka Koonfur Afrka, si looga daweeyo caabuq ama infakshan kaga dhacay sambabada.

6/9/2013 4:34 AM EST
Axad, June 09, 2013(HOL) :- Waxaa weli xaalad kacsanaan ah laga dareemayaa magaalada Kismaayo kadib dagaallo xooggan oo shalay ilaa daraad gudaha magaalada ku dhexmaray ciidamada maamulka uu hogaamiyo Sheekh Axmed Madoobe iyo kuwo daacad u ah Iftiin Xasan Baasto oo isagu sheeganaya xilka madaxweeynenimo ee Jubbaland.

6/9/2013 3:37 AM EST
Axad, Juun 09, 2013 (HOL) — Muwaadin Soomaaliyeed oo doonayay inuu dib ugu soo laabto Soomaaliya ayaa xalay dhac bareer ah logou geystay magaalada Johannesburg ee dalka Koonfur Afrika, iyadoo laga dhacay lacag gaaraysa 11,000 oo doolarka Mareykanka ah.

6/9/2013 3:26 AM EST
Axad, Juun 09, 2013 (HOL) — Ergaygga gaarka ah ee xoghayaha guud ee Qaramadda Middobay u qaabilsan arrimaha Soomaaliya (SRSG), Nicholas Kay ayaa ku baaqay in si deg-deg ah loo joojiyo dagaalka Kismaayo, isagoo ku baaqay in khilaafyada jira lagu dhameeyo wadahadal.