3/29/2024
Today from Hiiraan Online:  _
Wararka Maanta- Axad, Jun 9 , 2013
Xukuumadda Soomaaliya oo soo dhaweysay Mashaariic cusub oo dowladda Sucuudigu ay ka billowday Soomaaliya (SAWIRRO)


Axad, Juun 09, 2013 (HOL) — Xukuumadda Soomaaliya ayaa maanta soo dhaweysay mashaariic cusub oo dowladda Sucuudiga ay ka bilaabayso dalka Soomaaliya, kuwaasoo ay fulinayso ururka iskaashiga Islaamka ee OIC, sida uu sheegay ra’iisul wasaaraha Soomaaliya.

Mashaariicdan ayaa waxaa ku baxaysa lacag gaaraysa 72-milyan oo doolar, waxaana wajigiisa koowaad oo maanta billowday ku baxay 24-milyan oo doolar, iyadoo wax looga qabanaya lacagtaas arrimaha caafimaadka, biyaha, waxbrashada, beeraha iyo arrimaha bulshada.

Wakiilka Ururka iskaashiga Islaamka u fadhiya Soomaaliya, Axmed Maxmed Aadan ayaa sheegay in dowladda Sucuudiga maal-galinayso mashriicdan oo noqon doona saddex waji, iyadoo laga hir-galinayo dhammaan gobolada dalka Soomaaliya.


“Ururka iskaashiga Islaamku OIC wuxuu diyaar u yahay inay kaalin mug leh ka qaadataan dib-u-dhiska Soomaaliya, wajiga koowaad ee mashaariicdana waa kuwo lagu baahinayo dhamaan dalka oo dhan, wuxuuna horay ururku 11-gobol oo dalka ah ka qoday 50 ceel oo biyo laga cabo,” ayuu yiri wakiilka OIC oo intaas raaciyay in looga baahan yahay dowladaha ku jira ururka inay qaataan kaalin la mid ah tan uu qaatay Sucuudiga si looga qayb-qaato dib-u-dhiska Soomaaliya.

Wasiirka warfaafinta, Cabdullahi Cilmooge Xirsi oo wasaaraddiisu marti-galisay kulnka ayaa sheegay in ururuka OIC uu yahay kan labaad ee ugu weyn caalamka ayna xubno ka yihiin 57-dowladood oo ku baahsan dunida oo dhan, waana urur u taagan u gar-gaaridda muslimiinta, mashaariicdan aadka u ballaaran oo ay ka fulinayaan Soomaaliyana uu qayb weyn ka qaadan doono xasilinta dalka.


Ra’iisul wasaaraha Soomaaliya, Cabdi Faarax Shirdoon (Saacid) oo kulanka ka hadlay ayaa u mahadceliyay ururka iskaashiga Islaamka (OIC) iyo dalka Sucuudiga oo dhaqaalaha ku baxaysa mashaariicdan fuliyay, isagoo sheegay in ururka iskaashiga Islaamku uu kaalin weyn ka qaadanayo fulinta iyo isku-dubaridka mashaariicdan isugu jira bani’aadanimada iyo hormarinta.

“Deeq-bixiyayaasha aan saaxiibka nahay iyo walaalheenna Islaamka waxaan ku bogaadinayaa kaalinkii ay ka qaateen gurmadkii xiliyadii abaaraha culus ay ka jireen Soomaaliya, waxay fidiyeen gurmad deg-deg ah oo badbaadiyay malaayiin Soomaali ah, abaalkaas waa mid aan la ilaawi doonin, Soomaaliya maanta waxay gashay marxalad cusub oo dib u kabasho ah, waxaana looga fadhiyaa dalalka Islaamka inay qayb ka qaataan dib-u-dhiska dalka si mar kale ay Soomaaliya cagaheeda isugu taagto,” ayuu yiri ra’iisul wasaare Saacid.


Sidoo kale, ra’iisul wasaaruhu ayaa ka dhawaajiyay in dib-u-dhiska dalku uu ka culus yahay kana gun-weyn yahay gurmadka abaaraha, haddii aan laga helin caalamka kaalmo iyo is-barbar-taag ay suurto-gal ahayn in Soomaaliya ay kaligeed wajahdo.

“Qorsha xukuumadda illaa iyo markii golaha baarlamaanka ansixiyay waxay ku hawlanayd dejinta qorshe lagu dhisayo hannaanka dowladnimo laguna dardar-gelinayo dib-u-dhiska Soomaaliya. Waxaan diyaarinay qorshe ka kooban dib-u-dhiska hannaanka waxbarashada, caafimaadka, horumarinta adeegyadda bulshada iyo kaabayaasha dhaqaalaha oo aan rajaynayno in baarlamaanku ansixiyo si loo hirgaliyo,” ayuu hadalkiisa raaciyay.

Ugu dambeyn, mudane Saacid wuxuu codsi u diray dhammaan dalalka deeq-bixiyayaasha ah isagoo ka dalbaday inay ku kaalmeeyaan dowladda qorshaha ku doonayso inay dalka dib ugu dhisto.


Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/9/2013 3:18 PM EST
Axad, Juun 09, 2013 (HOL) — Ugu yaraan 10-qof ayaa ku dhaawacmay qaraxyo kala duwan oo caawa ka kala dhacay magaalada magaalada Mombasa iyo magaalada Nairobi ee xarunta dalka Kenya, sida ay sheegeen saraakiil ka tirsan booliiska Kenya.

6/9/2013 2:38 PM EST
Axad, Juun 09, 2013 (HOL) — Xildhibaan Maxamed Maxamuud Ibraahim (Goodir) oo ka mid ah wafdiga dowladda Soomaaliya ee Kismaayo ku sugan ayaa ku eedeeyay ciidamada Kenya ee qaybta ka ah howgalka AMISOM inay la safteen dhinac ka mid ah dhinacyadii ku dagaalamaya Kismaayo.

6/9/2013 12:02 PM EST
Axad, Juun 09, 2013 (HOL) — Kulan ay isugu yimaadeen qaybaha kala duwan ee odayaasha, siyaasiyinta, xildhibaannada iyo waxgarad kasoo jeeda gobollada Juboboyinka oo maanta ka dhacay Muqdisho ayaa lagu dalbaday in la joojiyo dagaallada kasoo cusboonaaday magaalada Kismaayo.

6/9/2013 9:47 AM EST
Axad, Juun 09, 2013 (HOL) — Bartamaha magaalada Baydhabo gar ahaan agagaarka Hotel Bay ayaa ciidamo ka tirsan kuwa AMSIOM oo ku sugnaa waxaa lagu eegtay maanta bam-gacmeed, iyadoo qaar ka tirsan ciidamada AMSIOM iyo dad shacab ah ay ku dhaawacmeen.

6/9/2013 9:12 AM EST
Axad, Juun 09, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa sheegay inaan la isaga hari doonin hurinta colaad ay ku dhintaan dad aan waxba galabsan in si macno-darro ah lagu daadiyo dhiigga shacabka Soomaaliyeed.

6/9/2013 9:05 AM EST
Kulan ay isugu yimaadeen qaybaha kala duwan ee bulshada oo lagu lafa gurayay sidii hogaan midaysan loogu samayn lahaa jaaliyada Soomaaliyeed ee ku dhaqan wadanka Kenya ayaa lagu qabtay hotelka Nomad ee xaafada Islii.

6/9/2013 7:56 AM EST
Axad, Juun 09, 2013 (HOL) — Bannaanbax looga soo horjeedo dhibaatooyinka lagu hayo Soomaalida ku nool dalka Koonfur Afrika ayaa ka dhacay maanta magaalada Muqdisho, waxaana ka hadlay mas’uuliyiin uu ku jiray guddoomiyaha gobolka Banaadir ahna duqa Muqdisho, Maxamuud Axmed Nuur (Tarsan).

6/9/2013 7:32 AM EST
Axad, Juun 09, 2013 (HOL) — Madaxweynihii hore ee Koonfur Afrika, Nelson Mandela oo 94-jir ah ayaa la dhigay isbitaal u yaalla magaalada Pretoria ee dalka Koonfur Afrka, si looga daweeyo caabuq ama infakshan kaga dhacay sambabada.

6/9/2013 4:34 AM EST
Axad, June 09, 2013(HOL) :- Waxaa weli xaalad kacsanaan ah laga dareemayaa magaalada Kismaayo kadib dagaallo xooggan oo shalay ilaa daraad gudaha magaalada ku dhexmaray ciidamada maamulka uu hogaamiyo Sheekh Axmed Madoobe iyo kuwo daacad u ah Iftiin Xasan Baasto oo isagu sheeganaya xilka madaxweeynenimo ee Jubbaland.

6/9/2013 3:37 AM EST
Axad, Juun 09, 2013 (HOL) — Muwaadin Soomaaliyeed oo doonayay inuu dib ugu soo laabto Soomaaliya ayaa xalay dhac bareer ah logou geystay magaalada Johannesburg ee dalka Koonfur Afrika, iyadoo laga dhacay lacag gaaraysa 11,000 oo doolarka Mareykanka ah.

6/9/2013 3:26 AM EST
Axad, Juun 09, 2013 (HOL) — Ergaygga gaarka ah ee xoghayaha guud ee Qaramadda Middobay u qaabilsan arrimaha Soomaaliya (SRSG), Nicholas Kay ayaa ku baaqay in si deg-deg ah loo joojiyo dagaalka Kismaayo, isagoo ku baaqay in khilaafyada jira lagu dhameeyo wadahadal.