8/20/2019
Today from Hiiraan Online:  _
Wararka Maanta- Axad, Jun 9 , 2013
Xildhibaan ku eedeeyay ciidamada Kenya ee AMISOM inay la safteen mid ka mid ah dhinacyadii ku dagaalamay Kismaayo


Axad, Juun 09, 2013 (HOL) — Xildhibaan Maxamed Maxamuud Ibraahim (Goodir) oo ka mid ah wafdiga dowladda Soomaaliya ee Kismaayo ku sugan ayaa ku eedeeyay ciidamada Kenya ee qaybta ka ah howgalka AMISOM inay la safteen dhinac ka mid ah dhinacyadii ku dagaalamaya Kismaayo.

Xildhibaan Goodir oo u warramayay BBC-da ayaa sheegay in ciidamada Kenya ee AMISOM in isbitaalladooda ay ku daweynayaan dhaawacyadii xoogagga Raaskambooni, iyagoo diiday inay gumad caafimaad u fidiyaan dhinicii kale.

“Ciidamada AMISOM ee dalka ku sugan waxaan ku arki jirnay in markii ay meel dhibaato ka dhacdo in dhaawacyada ay si siman ugu daweyn jireen isbitaalladooda, balse ciidamada Kenya ee AMISOM ka tirsan waxay kaalmo u fidiyeen xoogagga Raaskambooni, kuwii kalena way diideen xitaa inay u sameeyaan gurmad caafimaad,” ayuu yiri xildhibaan Goodir oo sheegay in fikirkan ay isla qabaan dhamaan xubnaha dowladda ee ku sugan Kismaayo.

Mudanuhu wuxuu sheegay in xubnaha dowladda ee kaga sugan Kismaayo ay ku sugan yihiin garoonka diyaaradaha, kaddib markii dagaal xooggan uu ka dhacay shalay magaalada Kismaayo.

Su’aal ahayd waxa uu ku xaqiijinayo eedeyntan ayaa wuxuu kaga jawaabay inay cabasho kasoo gaartay odayaasha deegaanka oo sheegay inay guryaha ku hayaan dhaawacyadii ka dhashay dagaalka qaarkood, waxaana si toos ah ula hadalnay buu yiri taliyaha haysta ciidamada Kenya ee AMISOM, wuxuuna noo sheegay inaysan mari karin waddada si ay dhaawacyadaas u keenaan isbitaalladooda.

“Dhaawacyadii Raaskambooni waxaa lagu qaadayaa qaarkood diyaarado, kuwii kalena guryaha ayay dhibaatooyin ku haystaa, middaasna waxaan u aragnay inaysan ciidamada Kenya dhexdhexaad ka ahayn dhinacyada ku dagaalamaya Kismaayo,” ayuu xildhibaan Goodir hadalkiisa ku daray.

Xildhibaankan ayaa sheegay sababta uu arrintan uga hadlay ay tahay inay iyagu mas’uul ka yihiin shacabka Soomaaliyeed ayna ku hadlayan afkooda, ayna doonayaan in la ogaado habka ay u shaqeynayaan ciidamada Kenya ee qaybta ka ah AMISOM.

Eedeyntan ayaa waxay noqonaysaa tii ugu horreysay oo mudane ka tirsan baarlamaanka Soomaaliya uu u jeediyo ciidamada Kenyan ee qaybta ka ah howgalka Midowga Afirka ee ka socda Soomaaliya.

Ma jirto wax jawaab ah oo weli kasoo baxday dhinaca taliska AMISOM, balse hadalkan ayaa wuxuu imaanayaa iyadoo madaxweynaha Soomaaliya, Xasan Sheekh Maxamuud uu bishii hore Addis Ababa ka sheegay in ciidanka Kenya ee ka tirsan AMISOM ay u dhaqmeen si ka baxsan howlgalka AMISOM ee Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
6/9/2013 3:18 PM EST
Axad, Juun 09, 2013 (HOL) — Ugu yaraan 10-qof ayaa ku dhaawacmay qaraxyo kala duwan oo caawa ka kala dhacay magaalada magaalada Mombasa iyo magaalada Nairobi ee xarunta dalka Kenya, sida ay sheegeen saraakiil ka tirsan booliiska Kenya.

6/9/2013 12:02 PM EST
Axad, Juun 09, 2013 (HOL) — Kulan ay isugu yimaadeen qaybaha kala duwan ee odayaasha, siyaasiyinta, xildhibaannada iyo waxgarad kasoo jeeda gobollada Juboboyinka oo maanta ka dhacay Muqdisho ayaa lagu dalbaday in la joojiyo dagaallada kasoo cusboonaaday magaalada Kismaayo.

6/9/2013 9:47 AM EST
Axad, Juun 09, 2013 (HOL) — Bartamaha magaalada Baydhabo gar ahaan agagaarka Hotel Bay ayaa ciidamo ka tirsan kuwa AMSIOM oo ku sugnaa waxaa lagu eegtay maanta bam-gacmeed, iyadoo qaar ka tirsan ciidamada AMSIOM iyo dad shacab ah ay ku dhaawacmeen.

6/9/2013 9:12 AM EST
Axad, Juun 09, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa sheegay inaan la isaga hari doonin hurinta colaad ay ku dhintaan dad aan waxba galabsan in si macno-darro ah lagu daadiyo dhiigga shacabka Soomaaliyeed.

6/9/2013 9:10 AM EST
Axad, Juun 09, 2013 (HOL) — Xukuumadda Soomaaliya ayaa maanta soo dhaweysay mashaariic cusub oo dowladda Sucuudiga ay ka bilaabayso dalka Soomaaliya, kuwaasoo ay fulinayso ururka iskaashiga Islaamka ee OIC, sida uu sheegay ra’iisul wasaaraha Soomaaliya.

6/9/2013 9:05 AM EST
Kulan ay isugu yimaadeen qaybaha kala duwan ee bulshada oo lagu lafa gurayay sidii hogaan midaysan loogu samayn lahaa jaaliyada Soomaaliyeed ee ku dhaqan wadanka Kenya ayaa lagu qabtay hotelka Nomad ee xaafada Islii.

6/9/2013 7:56 AM EST
Axad, Juun 09, 2013 (HOL) — Bannaanbax looga soo horjeedo dhibaatooyinka lagu hayo Soomaalida ku nool dalka Koonfur Afrika ayaa ka dhacay maanta magaalada Muqdisho, waxaana ka hadlay mas’uuliyiin uu ku jiray guddoomiyaha gobolka Banaadir ahna duqa Muqdisho, Maxamuud Axmed Nuur (Tarsan).

6/9/2013 7:32 AM EST
Axad, Juun 09, 2013 (HOL) — Madaxweynihii hore ee Koonfur Afrika, Nelson Mandela oo 94-jir ah ayaa la dhigay isbitaal u yaalla magaalada Pretoria ee dalka Koonfur Afrka, si looga daweeyo caabuq ama infakshan kaga dhacay sambabada.

6/9/2013 4:34 AM EST
Axad, June 09, 2013(HOL) :- Waxaa weli xaalad kacsanaan ah laga dareemayaa magaalada Kismaayo kadib dagaallo xooggan oo shalay ilaa daraad gudaha magaalada ku dhexmaray ciidamada maamulka uu hogaamiyo Sheekh Axmed Madoobe iyo kuwo daacad u ah Iftiin Xasan Baasto oo isagu sheeganaya xilka madaxweeynenimo ee Jubbaland.

6/9/2013 3:37 AM EST
Axad, Juun 09, 2013 (HOL) — Muwaadin Soomaaliyeed oo doonayay inuu dib ugu soo laabto Soomaaliya ayaa xalay dhac bareer ah logou geystay magaalada Johannesburg ee dalka Koonfur Afrika, iyadoo laga dhacay lacag gaaraysa 11,000 oo doolarka Mareykanka ah.

6/9/2013 3:26 AM EST
Axad, Juun 09, 2013 (HOL) — Ergaygga gaarka ah ee xoghayaha guud ee Qaramadda Middobay u qaabilsan arrimaha Soomaaliya (SRSG), Nicholas Kay ayaa ku baaqay in si deg-deg ah loo joojiyo dagaalka Kismaayo, isagoo ku baaqay in khilaafyada jira lagu dhameeyo wadahadal.