3/28/2024
Today from Hiiraan Online:  _
Wararka Maanta- Jimco, Oct 18, 2013
Booliiska Uganda oo soo Saaray Digniin ku Aaddan Weerarro Argagaxiso oo ay Al-shabaab ka geysato Magaalada Kampala

Jimco, Oktoobar 18, 2013 (HOL) — Ciidamada booliiska dalka Uganda ayaa sheegay inay heleen calaamado muujinaya in Al-shabaab ay doonayso inay weerarro argagaxiso ka geysato dalkooda, kaddib markii maalmo ka hor ay safaaradda Mareykanka ee Uganda ka digtay weerarro argagaxiso oo ka dhaca dlaka Uganda.

Saraakiisha booliiska Uganda ayaa sheegay maanta oo Jimco ah in warar ku saabsan arrintan ay ka heleen ilo wareedyo ay ku kalsoon yihiin, iyadoo ay safaaradda Mareykanka ee Uganda ay digniinteeda ku sheegtay in weerarka uu noqon karo mid la mid ah kii Al-shabaab ay ka geysatay Nairobi.

“Dingiinaha deg-degga ah ee ku saabsan weerarro argagaxiso oo dhaca si aad ah ayay sare ugu kaceen,” ayuu yiri ku xigeenka taliyaha booliiska dalka Uganda, Patrick Onyango oo intaas raaciyay in safaaradda Mareykanka ay la wadaagi doonaan warbixinnada ku saabsan arrintan.

Waa markii ugu horreysay oo ay booliiska Uganda soo saaraan digniin cas oo ku saabsan weeraro ay Al-shabaab ka geysato dalkooda, kaddib markii ay ka geysatay kooxdan dalka Uganda sannadkii 2010 weeraro ay ku dhinteen 79-qof.

“Gabi ahaan saraakiisha booliiska Uganda ee ka maqan Kampala waa loo yeeray, iyadoo laga dalbaday inay joojiyaan howl walba oo ay hayaan ayna kusoo laabtaan caasimadda,” ayuu Onyongo hadalkiisa ku daray.

Safaaradda Mareykanka ee Kampala ayaa ku baahisay shabakad ay gaarka u leedahay in Al-shabaab ay qorsheynayso inay weerar u qorsheysan sidii kii ka dhacay Westgate Mall ay la damacsan yihiin Kampala, balse safaaraddu ma aysan bixin warbixin dheeraad ah oo ku saabsan arrintan.

Xarakada Al-shabaab ayaa sheegatay mas’uuliyadda weerarkii Westgate Mall ka dhacay bishii hore, kaasoo ay naftooda ku waayeen 67-qof oo halkaas ku sugnaa, waxayna kooxdan sheegtay in weerarku uu yahay mid aargudasho ah.

Ciidamada ka socda dalalka Uganda, Kenya iyo Burundi ayaa udub-dhexaad u ah howl-galka Midowga Afrika ee Soomaaliya oo lagu magacaabo AMSIOM, kaas oo lagula dagaalamayo Al-shabaab si looga caawiyo dowladda Somalia inay hanato dalka oo dhan.

Booliiska dalka Uganda ayaa xoojiyay goobaha muhiimka ah oo dhan, iyagoo furay goobo fara badan oo lagu wargeliyay shacabka inay u soo gudbiyaan xogahaha haddii ay la kulmaan wax ay ka shakiyaan ama khatar ah.

Al-shabaab ayaa ugu baaqday dalalka ay ciidamadu ka joogaan Soomaaliya inay kala baxaan haddii kale ay la kulmi doonaan weerarro argagaxiso oo la mid ah kuwii ay ka geysteen magaalada Nairobi ee xarunta dalka Kenya.

Maalmo ka hor ayay ahayd markii guri ku yaalla xaafadda Bole ee xarunta dalka Itoobiya ee Addis Ababa uu ka dhacay qarax, kaasoo la sheegay inay ku dhinteen laba qof oo Soomaali ah oo farsameynayay waxyaabaha qarxa.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
10/18/2013 2:35 PM EST
Jimco, Oktoobar 18, 2013 (HOL) — Dood-cilmiyeed ku saabsanaa sida ay ula xisaabtami karaan Jaaliyadda Soomaaliyeed ee gobolka Minneapolis xubnaha ay doortaan ayna uga qeyb-gali karaan doorashooyinka, gor-gortana ay ula geli karaan musharaxiinta u kala tartameysa cododkooda ayaa maanta ka dhacay magaaladda Minneapolis ee gobolka Minnesota.

10/18/2013 1:25 PM EST
Jimco, Oktoobar 18, 2013 (HOL) — Booliska magaalada Boosaaso ayaa maanta helay meydka nin la diley shan bilood kahor, kaas oo meydkiisa la jarjaray kadibna inta jawaan lagu ridey lagu xabaalay isla gurigii uu magaalada Boosaaso ka degenaa.

10/18/2013 1:07 PM EST
Jimco, Oktoobar 18, 2013 (HOL) — Mid ka mid ah dhallinyarada kasoo jeeda Turkiga ee ka shaqeeya hay’adaha samafalka Turkiga ee ku sugan Muqdisho ayaa maanta guursaday gabar Soomaaliyeed, guurkan oo noqonaya xiriirkii ugu horreeyay ee dhinaca guurka ah oo dhexmara shacabka Turkiga iyo kuwa Soomaaliyeed.

10/18/2013 12:53 PM EST
Jimco, Oktoobar 18, 2013 (HOL) — Hay’adda Somali Relief Network of North America oo fadhigeedu yahay dalka Canada ayaa waxay deeq hilib ah waxay ugu qaybisay degmada Afgooye ee gobolka Shabeellada Hoose qoys dan yar ah oo tiradoodu gaarayso 2,298, kuwaasoo isugu jiray haween, carruur iyo waayeel.

10/18/2013 11:50 AM EST
Jimco, Oktoobar 18, 2013 (HOL) — Bil kaddib markii xoogagga Al-shabaab ay weerar ku qaadeen dhimasha ganacsi ee Westgate Mall ee magaalada Nairobi ayaa waxaa kordhaya hanjabaadaha ay Al-shabaab u jeedinayso dalalka Bariga Afrika iyo kuwa ay ciidamadu ka joogaan Soomaaliya.

10/18/2013 11:07 AM EST
Jimco, Oktoobar 18, 2013 (HOL) — Saraakiil ka socoday wasaaradaha gaashaandhigga dalalka Barriga Afrika ayaa maanta tababar loogu soo gaba-gabeeyay machad ku yaalla magaalada Nairobi ee dalka Kenya.

10/18/2013 10:16 AM EST
Jimco, Oktoobar 18, 2013 (HOL) — Guddoomiyaha maamulka gobolka Hiiraan Cabdi Faarax Laqanayo oo la hadllay HOL ayaa ugu baaqay beellaha ku dagaallamaya deegaanka Kabxanley oo 25-km dhinaca W/galbeed kaga beegan magaalada Beledweyne.

10/18/2013 10:04 AM EST
Jimco, Oktoobar 18, 2013 (HOL) — Guddoomiyihiin hore ee maamulka gobolka Hiiraan C/fitaax Xassan Africa oo shir jaraa’id ku qabtay magaalada Beledweyne oo uu dib ugu soo laabtay maanta ayaa hadllay arrimaha doorashada iyo baaq nabadeed oo uu u jeediyay beelaha ku dagaallamay deegaannka Kabxanley ee gobolka Hiiraan.

10/18/2013 6:41 AM EST
Jimco, Oktoobar 18, 2013 (HOL) — Magaalada Minneapolis ee gobolka Minnesota ayaa laga furay madxafkii ugu horreeyay oo Soomaaliyeed oo dalka dibaddiisa laga furo, kaasoo lagu soo bandhigi doono alaabaha ay Soomaalidu u leedahay dhaqanka iyo hidaha.

10/18/2013 6:32 AM EST
Jimco, Oktoobar 18, 2013 (HOL) — Ruux Somali ah oo haysta dhalashada dalka Norway ayaa la sheegay inuu ka mid ahaa kooxihii weeraray dhismaha ganacsiga ee Westgate Mall ee magaalada Nairobi, kaasoo magaciisa lagu sheegay, Xasan Cabdi Dhuxuloow.

10/18/2013 5:39 AM EST
Jimco, Oktoobar 18, 2013 (HOL) — Magaalada Hargeysa ayaa si weyn looga xusay maalinta shuhadadda SNM oo sanad walba bishan Octobar 17 keedda la xuso, taas oo lagu xasuustii intii ka dhimatay xoogaga SNM mudadii ay dagaalka ku jireen.

10/18/2013 5:24 AM EST
Jimco, Oktoobar 18, 2013 (HOL) — Qarax miino ayaa aroornimadii hore ee saakay lagu burburiyay mid ka mid ah baallayaasha cad-ceedda ku shaqeeya oo ku yaalla jidka Maka Al-Mukarama oo ah midka ugu mashquulka badan xarunta Soomaaliya ee Muqdisho.

10/18/2013 4:48 AM EST
Jimco, Oktoobar 18, 2013 (HOL) — Ganacsade Soomaaliyeed ayaa lagu dilay waddanka Koonfur Afrika khamiistii shalay, kaddib markii kooxo burcad ay raasas ku fureen gaari uu watay, iyadoo ganacsadahan lagu aasay duleedka Cape-town.

10/18/2013 4:37 AM EST
Jimco, Oktoobar 18, 2013 (HOL) — Wararka naga soo gaaray deegaannka Kabxanley ee 25-km dhinaca Waqooyi-galbeed kaga beegan magaalada Beledweyne ee xarunta gobolka Hiiraan ayaa sheegaya in goor dhaw uu halkaa ka qarxay dagaal culus oo u dhaxeeya beello in mudo ahba khilaaf ka dhaxeeyay.

10/18/2013 4:35 AM EST
Jimco, Oktoobar 18, 2013 (HOL) — Maamulka KMG ah ee Jubba ayaa shaaca ka qaaday inay qorsheynayaan inay la wareegaan deegaannada gacantooda ka maqan ee ka tirsan Jubbooyinka kuwaasoo ay ka taliso Al-shabaab.

10/18/2013 4:17 AM EST
Jimco, Oktoobar 18, 2013 (HOL) — Guddoomiyaha gobolka Banaadir ahna duqa Muqdisho Maxamuud Axmed Nuur (Tarsan) ayaa sheegay inuusan guri ka dhisi karin Muqdisho Injineer aan ruqsad ka haysan dowladda hoose ee Muqdisho.