11/13/2019
Today from Hiiraan Online:  _
Wararka Maanta- Talaado, Jun 25, 2013
Madaxda Soomaalida oo ka Tacsiyeeyay Geeridii ku timid Boqor Cabdullaahi Boqor Muuse oo ku Geeriyooday Dalka Finland


Talaado, Juun 25, 2013 (HOL) — Madaxweynaha Soomaaliya, Xasan Sheekh, ra’iisul wasaarihiisa, Cabdi Faarax Shirdoon, guddoomiyaha baarlamaanka Soomaaliya Maxamed Cismaan Jawaari iyo madaxweynaha Puntland C/raxmaan Faroole ayaa si kala gooni-gooni ah uga tacsiyeeyay geeridii boqor C/llaahi boqor Muuse (King Kong) oo ku geeriyooday shalay dalka Finland.

Madaxweyne Xasan Sheekh ayaa sheegay in boqor King Kong uu ahaa nin si weyn looga yaqaano dalka ahaana aqoonyahan taqasus u leh sharciga, kana soo jeeda boqortooyo oo waqtigiisa ku bixiyey nabadeynta Soomaaliyeed.

“Boqorka wuxuu door muhiim ah kasoo qaatay shirarkii dib u heshiisiinta ee lagu qabtay dalka gudihiisa iyo dibaddiisa, sidoo kalena wuxuu ahaa mas’uul lasoo shaqeeyay dowladihii hore ee dalka soo maray,” ayuu yiri Xasan Sheekh.

Sidoo kale, madaxweynaha Puntland oo isaguna ka tacsiyeeyay geerida ku timid boqor King Kong ayaa sheegay inuu ahaa mas’uul dadaal weyn u soo galay sidii Puntland ay ku dhisi lahayd, sidoo kalena qayb ka qaatay dib u dhiska deegaannada Puntland, wixii ka dambeeyay burburka.

"Boqor Cabdullaahi, boqor keliya ma ahayn ee siyaasina wuu ahaa, nin wax badan soo qabtay buu ahaa, dowladihii hore qareen buu ka ahaa, intii lasoo qaxayna Puntland dadkii wax ka dhisay ayuu kamid ahaa," ayuu yiri Faroole.

Ra’iisul wasaaraha Soomaaliya oo isaguna ka hadlay geerida boqor C/llaahi King Kong ayaa sheegay inuu ahaa ma’suul si weyn looga xusuusto wixii uu ka qabtay dalka, wuxuuna Alle uga baryay inuu naxariistiisii janno siiyo.

Ugu dambeyn, guddoomiyaha baarlamaanka Soomaaliya, Jawaari ayaa isna ka hadlay ayaa sheegay in boqor C/llaahi uu ahaa shakhsi karti leh oo inta badan ku dadaali jiray nabadeynta Soomaaliya, isagoo sheegay inuu si aad ah ugu xusuusto doorkii uu kul lahaa geeddi-socodkii dalka uu kaga baxay KMG-nimada.

Dhammaan mas’uuliyiinta dowladda Soomaaliya iyo madaxweynaha Puntland waxay Alle ka baryeen in boqorka uu siiyo janno, iyagoo ehelladii, qaraabadii iyo qoyskii uu ka tagayna uu samir iyo iimaan ka siiyo.

Maxamed Xaaji Xuseen, Hiiran Online
[email protected]
Muqdisho, Soomaaliya










Click here
6/25/2013 12:39 PM EST
Boqorkii dalka Qatar Sheekh Xamad Bin-Khaliifa Althaanii ayaa si rasmi ah xukunka ugu wareejiyay wiilkiisa Sheekh Tamiim Bin Xamad Althaanii, iyadoo ay noqonayso markii ugu horreysay oo taariikhda wadamada carabta uu boqor si iskiisa xilka isaga wareejiyo.

6/25/2013 8:44 AM EST
Talaado, Juun 25, 2013 (HOL) — Xabsiga dhexe ee degmada Baydhabo ayaa waxaa ku jira maxaabiis aad u tirabada oo gaaray 260 qofood oo intooda badan loosoo qabqabtay tuhunno la xiriira inay Al-shabaab ka tirsan yihiin, waxayna ka cabanayaan dhibaatooyin soo food saaray oo daryeel la'aan u badan.

6/25/2013 8:13 AM EST
Talaado, Juun 25, 2013 (HOL) — Wafdi uu hoggaaminayay wasiirrka difaaca ee xukuumadda Soomaaliya, C/xakiin Xaaji Max'uud Fiqi safiirka dowladda Jabuuti ee Soomaaliya Dayib Dubad Rooble, xildhibaanno iyo guddoomiyaha maamulka gobolka Hiiraan Cabdi Faarax Laqanyo oo maalmihii ugu danbeeyay howlo shaqo u joogay magaalada Muqdisho ayaa maanta gaaray magaalada Baladweyne ee xarunta gobolka Hiiraan.

6/25/2013 7:53 AM EST
Talaado, Juun 25, 2013 (HOL) — Dagaalkan oo u dhexeeyay ciidammo ka tirsan kuwa dowladda Soomaaliya oo mushaar la’aan uga soo gadooday degmada Qansax-dheere ee gobolka Bay iyo xoogagga Al-shabaab ayaa ka dhacay deegaanka Goof-guduud oo u dhexeysa degmooyinka Baydhabo iyo Qansax-dheere.

6/25/2013 7:52 AM EST
Talaado, Juun 25, 2013 (HOL) — Wafdi ka tirsan dowladda Soomaaliya ayaa ka qaybgalaya shir-goboleedka dalalka Carabta ee looga hadlayo dadka iyo horumarinta (Regional Conference on Population and Development in the Arab states), kaasoo ka soconaya Dusit Thani Hotel oo ku yaalla magaalada Qaahira ee xarunta dalka Masar.

6/25/2013 6:52 AM EST
Talaado, June 25, 2013(HOL) :- Wafdi uu hogaaminayo wasiirka warfaafinta boostada, isgaarsiinta iyo gaadiidka C/laahi Ciilmooge Xirsi ayaa maanta ka ambabaxay garoonka diyaaradaha ee magaalada Muqdisho, iyagoona kusii jeeda dalka Jabuuti.

6/25/2013 2:26 AM EST
Talaado, June 25, 2013(HOL) :- Ilaa afar qof ayay dhaawacyo kasoo gaareen weerar loo adeegsaday bambaanooyinka gacanta laga tuuro, kaasoo lala beegsaday goob ay dad badani ku caweeynayeen oo ku taal magaalada Wajeer, iyadoona kooxihii weerarka geeystay ay goobta isaga baxsadeen.

6/25/2013 1:44 AM EST
Talaaddo, Juun 25, 2013 (HOL)- Madaxweynaha Somaliland mudane Axmed Maxamed Maxamuud Siillaanyo, ayaa isku shaandhayn balaadhan ku sameeyey golihiisa wasiiradda, kuwaas oo uu qaar cusub keenay, qaar kalana xilalkii ay hayeen u bedelay kuwo kalana xilkiiba ka qaaday.

6/25/2013 1:11 AM EST
Talaado, Juun 15,2013 (HOL) - Salama Cash & Carry oo aheyd shirkad ganacsi oo ay inta badan ku tiirsanaayeen ganacsiga Soomaalida Koonfur Afrika ayaa waxaa dab qabsaday habeenimadii Isniinta ee 24-ka June 2013. Dabdkaan oo aan la ogeen waxa sababay ayaa guud ahaan baabi'iyay hantidii taalay goobta uu dabku ka kacay.