3/29/2024
Today from Hiiraan Online:  _
Wararka Maanta- Arbaco, Feb 13, 2013
MADAXWEYNE SIILAANYO “Kama qayb-galayno shirka London haddii uu noola muuqdo mid karaamadeenna wax u dhimaya”

Arbaco, Feberaayo 13, 2013 (HOL) — Madaxweynaha Somaliland, Axmed Maxamed Maxamuud (Siilaanyo), ayaa sheegay in aanay shirka Arrimaha Soomaaliya lagaga hadlayo ee bisha May ka dhici doona magaalada London ka qaybgali doonin haddii ay u arkaan in karaamadda iyo qaranimadda Somaliland wax u dhimayso.

Sidaasna waxa uu ka sheegay mar uu la hadlayey jaaliyadda reer Somaliland ee ku dhaqan dalka Ingiriiska, waxaanu jaaliyadda uga xog waramay waxqabadka xukuumadda mudaddii ay jirtay ay ka gaadhay caafimaadka, Waxbarashadda iyo horumarka kale ee mujtamaca.

“Madaxweynaha Somaliland. Mudane Axmed Maxamed Siilaanyo iyo weftigii uu hogaaminayay ayaa kullan xog-wareysi ah la yeeshay Jaalliyadda Somaliland ee ku dhaqan Dalka UK”ayaa lagu sheegay war-saxaafadeed ka soo baxay xafiiska madaxweynaha oo uu ku saxeexan yahay afhayeenka madaxweynaha Axmed Saleebaan Dhuxul.

Kulankaasi uu madaxweynuhu la yeeshay jaaliyadda Somaliland waxa kula wehelinayey Wasiirrada Arrimaha Dibada Dr. Maxamed C/llaahi Cumar, Wasiirka kalluumaysiga iyo kheyraadka Badda. Mudane, Cabdilaahi Jaamac Cismaan (Geel-jire), Gudoomiye-xigeenka 2aad ee Xisbiga talada haya ee Kulmiye, Xildhibaan, Maxamed Xaaji Yuusuf (Waabeeye), Xeer ilaaliyaha guud ee Qaranka Xasan Axmed Aadan iyo Xildhibaan Cali Xasan Maxamed (Cali Mareexaan), Safiirka Wareega ee Somaliland Ambassor, Kaysar Cabdilaahi Maxamed, Gudoomiyaha xisbiga Kulmiye ee UK Xasan Xariir Xirsi, iyo masuuliyiinta Jaalliyadda Uk iyo Madax-dhaqameedyada reer Somaliland qaar ka mid ah.

“Shirkaasi London lagu qabanayo Kama Qayb Gali doono haddii uu shirkaasi yahay mid aan Maslaxaadda Qaranka Somaliland aanay dani ugu jirin, kamana Qayb gali doono haddii aanu u aragno in shirkaasi uu yahay mid hoos u dhigaya karaamada Somaliland, cidna uga habran mayno inaanu u sheegno aragtidayada shirkaasi la xidhiidha ee ku wajahan ka qayb-galkiisa, balse waxa aanu ka qayb gali-doonaa oo kaliya haddii aanu u aragno ama aanu ka dhex aragno danaha qarankan Somaliland, maslaxadiisu ay ku jirto oo aanu weliba aad uga baraan degno kana yeelano tallo Qaran” ayuu yidhi Madaxweyne Siillaanyo oo ka hadlayey shirka Bisha May ka qabsoomi doono London ee ay wada jir u qabanqaabinayaan dawladda Ingiriiska iyo dawladda Soomaaliya.

Waxa kale oo uu Madaxweynuhu xusay in xukuumadiisu ay ku dhisan tahay talo wadaag oo sidii horeba ay u yeeshay ay hadana tallo wadaag Qaran laga yeelan doonto marka ay gaadho wakhtigeeda la xidhiidha Shirkaasi.

Sidoo kale, Madaxweynuhu wuxuu shacabka Somaliland ee dalka dibadiisa iyo dalka Gudihiisa ku sugan uu ku Booriyay in ay u midoobaan, meelna uga soo wada jeestaan Horumarka Dalkooda hooyo oo ay sii laban laaban dedaalka ay ugu jireen Qadiyada madaxbanaanida Somaliland.

Wasiirka Wasaarada Arrimaha Dibada iyo iskaashiga Caalamiga ah Dr. Maxamed Cabdilaahi Cumar ayaa isna sheegay natiijooyinkii ka soo baxay kullan ay la yeesheen wasiirka wasaarada arrimaha dibadda ee Ingiriiska, kaasi oo uu ku tilmaamay mid ku dhamaaday guulo la isku afgartay, waxyaabihii ay ka wada hadleen labada dhinac ay isla af garteen, waxaanu tilmaamay Ingiriisku durba wax ka badaleen digniintii dhinaca socdaalka ee ay soo saareen, isla markaana ay labada dhinac sii xoojin doonaan wada shaqayntii ka dhexeysay.

Waxa iyaguna halkaasi ka hadlay wasiirka Kalluumaysiga  C/laahi Jaamac Cismaan Geel jire, Gudoomiye-xigeenka xisbiga Kulmiye Mudane Maxamed Xaaji Yuusuf (Waabeeyo) iyo xildhibaan Cali Xasan Maxamed (Mareexaan), Wasiirku-xigeenkii hore ee Arrimaa Dibada ee Somaliland Mudane Maxamed Yoonis oo dhamanatood ka hadlay waxyaalihii u qabsoomay mudadii ay xilka ahyeen.

Waa markii ugu horeysay ee uu madaxweynuhu cadeeyo siday u arkaan shirkaasi, inkastoo dadweynaha Somaliland qaarkood ay ku doodaan in sababta uu Ingiriisku warbaahinta ugu soo mariyey digniinta amni darada ahayd ay tahay arrin siyaasadeed oo uu doonayo inuu Somaliland qasab kaga dhigo ka qaybgalka shirkaasi Soomaalidda.

Barkhad-Ladiif M. Cumar, Hiiraan Online
[email protected]
Hargeysa, Somaliland













Click here
2/13/2013 11:26 AM EST
Arbaco, Feberaayo 13, 2013 (HOL) — Ugu yaraan laba qof ayaa ku dhintay laba kalena way ku dhaawcmeen qarax ka dhacay gellinkii dambe ee maanta Isgoyska Black Sea ee degmada Hodan, iyadoo sidoo kale kooxo hubeyasn ay maqribnimadii caawa toogasho ku dileen askari ka tirsan kuwa dowladda oo ku sugnaa suuqa Bakaaraha.

2/13/2013 9:35 AM EST
Arbaco, Feberaayo 13, 2013 (HOL) — Guddoomiyaha baarlamaanka Somalia iyo wafdi uu hoggaaminayo ayaa maanta u dhoofay magaalada Addis Ababa ee xarunta dalka Itoobiya, iyadoo safarkan uu noqonayo kii ugu horreeyay oo uu dalka kaga ambabaxo.

2/13/2013 9:27 AM EST
Arbaco, Feberaayo 13, 2013 (HOL) — Magaalada Berlin ee dalka Jarmalka ayaa lagu soo gabagabeeyay shirweyne caalami ah oo looga hadlayay dhoofinta Mooska iyo miraha kale kaasoo socdey 06 illaa 09 bishaan feberaayo, arrimo ku saabsana shirkaas iyo heshiisyo ay soo gashay ayay mas’uuliyiinta shirkadda Fruitsome kaga warbixiyeen xaruntooda Muqdisho ee Soomaaliya.

2/13/2013 7:54 AM EST
Arbaco, Feberaayo 13, 2013 (HOL) — Madaxweynaha Soomaaliya, Xasan Sheekh Maxamuud ayaa kulan ay albaabbadu u xiran yihiin la yeeshay ergayga Midowga Afrika ee arrimaha Soomaaliya, danjire Maxamed Saalax Annaadiif oo ay wehliyeen xubno ka socday ururka Midowga Afrika.

2/13/2013 7:04 AM EST
Arbaco, Feberaayo 13, 2013 (HOL) — Guddoomiyaha Ururka Ahusunna Waljamaaca, Sheekh Maxamed Yuusuf Xeefoow ayaa ku geeriyooday isbitaal ay maamusho AMISOM oo ku yaalla Muqdisho, kaddib markii xanuun xalay kusoo booday awgiis loo keenay Muqdisho.

2/13/2013 6:30 AM EST
Arbaco, Feberaayo 13, 2013 (HOL) — Qunsuliyadda Guud ee Soomaaliya ay ku leedahay wadanka Australia ayaa habeenimadii xalay kulan isugu yeertay dhammaan aqoonyahanada iyo waxgaradka Soomaaliyeed ee ku nool waddankaas.

2/13/2013 6:27 AM EST
Arbaco, Feberaayo 13, 2013 (HOL) — Dagaal culus oo la isku adeegsaday hubka noocyadiisa kala duwan ayaa ciidamada Somaliland iyo kuwa maamulka Khaatumo ku dhexmaray deegaanka Laf-weyn oo ka tirsan deegaanka Xuddun kana xigta dhinaca galbeed qiyaastii 20-km.

2/13/2013 5:26 AM EST
Arbaco, February 13, 2013(HOL) - Shan qof ayaa dhimatay afar kalena waxaa kasoo gaaray dhaawacyo kadib markii gaari nooca rakaabka qaado uu ku rogmaday duleedka magaalada Dooloow ee gobolka Gedo.

2/13/2013 3:15 AM EST
Arbaco, February 13, 2013(HOL) - Waxaa shalay gelinkii danbe gudaha magaalada Kismaayo lagu dilay gudoomiyihii maxkamadda ciidamada qalabka sida ee degamada Kismaayo G/sare Max’ed Cismaan Cali (Keyb-haye), kadib markii ay haleeshay rasaas ay isweeydaarsanayeen laba askari oo katirsan ciidamada dowladda.

2/13/2013 1:53 AM EST
Arbaco, February 13, 2013(HOL): Magaalada Baydhabo ee xarunta u ah Gobolka Bay ayaa xalay waxaa ka dhacay dagaal geystay khasaare dhimasho iyo dhaawac isugu jira, kaasi oo dhexmaray Xoogagga Al-Shabaab iyo Ciidamada Dowladda iyo kuwa kale ee gacanta siinaya.