8/14/2022
Today from Hiiraan Online:  _
Wararka Maanta- Talaado, Oct 2 , 2012
Hay'adda Nabadsugidda Qaranka oo Maanta sheegtay inay inay la wareegto Guryo ay ka heshay Hub iyo Walxaha Qarxa
Talaado, Oktoobar 02, 2012 (HOL) — Hay'adda nabadsugidda ayaa soo bandhigtay maanta hub ay sheegtay inay kasoo qabteen guri ku yaalla xaafadda Suuqa xoolaha ee degmada Huriwaa; iyadoo sidoo kale soo bandhigay wiil dhalinyaro ah iyo xaaskiisa oo ay sheegtay inay deggenaayeen guriga hubka lagu soo qabatay.

Taliyaha nabadsugidda gobolka Banaadir, Col. Khaliif Axmed Ereg oo shir jaraa'id ku qabtay xarunta hay'adda nabadsugidda ayaa sheegay inay la wareegeen guryo ay ka heleen hub, kaddib baaritaanno ay xalay sameeyeen, kuwaasoo dhammaantood ku yaalla degmada Huriwaa.

"Xalay illaa saakay waxaa howlgal ka wadnay degmooyin ka tirsan Muqdisho ay ka mid yihiin: Yaaqshiid, Huriwaa iyo Dayniile, waxaan kusoo qabannay hub guryo ku keydsanaa oo bastoolado ay ku jireen iyo dadkii ku howl-galayay, waxaan ummadda u soo bandhigaynaa cid kasta oo dhibaato ku haysa," ayuu yiri Col. Erego oo intaas ku daray in howgalkii ugu dambeeyay ay kusoo qabteen hub ku jiray saddex guri oo miinooyin ay ka mid ahaayeen.

Sidoo kale, taliyuhu wuxuu sheegay inay xog ku heleen halka ay yaalleen hubka iyo waxyaabaha qarxa, isla markaana maalin iyo habeen ay ka shaqeynayeen sidii ay kusoo qaban lahaayeen, isagoo xusay in miinooyinka ay qabteen loogu talogalay in bilaha soo socda qaraxyo lagu fuliyo.

Col. Ereg wuxuu shacabka uga digay inay iska hubiyaan cid walba oo ay guryaha ka kireynayaan, isagoo daboolka ka qaaday in gurigii laga helo iyo waxyaabaha qarxa ay la wareegi doonaan; go'aankoodana uu yahay mid aysan ka laaban doonin.

Dhinaca kale; wiil dhalinyaro ah oo qirtay inuu ka tirsanaa Al-shabaab ayaa isaguna la hadlay warfidiyeenka, isagoo xusay in haweeneyda lasoo bandhigay ay xaaskiisa tahay laguna soo qabtay howlgal xalay laga fuliyay degmada Huriwaa.

Howlgalkan ayaa noqonaya kii u horreeyay noociisa oo ay hay'adda nabadsugiddu ay kula wareegto guryo ay ka heshay hub iyo waxyaabaha qarxa, waxaana horay ay hay'addu u bixisay digniin ah in dadka guryaha iska leh ay sharciga geeyaan ruux walba oo ay doonayaan inay gurigooda ka kireeyaan, si loona socdo xaaladda qofka kireystay gurigooda.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/2/2012 4:55 PM EST
Talaado, October 02, 2012(HOL): Ciidamada dowladda KMG, kuwa raaskaamboni iyo Militariga Kenya ee qeybta ka ah AMISOM ayaa maanta si buuxda ula wareegay magaalada Kismaayo, iyadoona ay ciidamadu fariisimo ka sameysteen saldhigga dhexe ee magaalada, Dekedda, garoonka diyaaradaha iyo weliba daafaha magaalada.

10/2/2012 1:53 PM EST
Talaado, Oktoobar 2, 2012 (HOL) - Waxaa maanta weerar gaadmo ah lagu qaaday wefdi isugu jirey xubno ka tirsan hay'adda dalka Turkiga u qaabilsan gargaarka dibadda (TIKA) iyo qaar kamid ah saraakiisha ciidamada Booliska Puntland, xilli ay marayeen inta u dhexeysa degmooyinka Gaalkacayo iyo Bacaadweyn.

10/2/2012 9:35 AM EST
Talaado, Oktoobar 02, 2012 (HOL) — Madaxweynaha dowladda Soomaaliya Xassan Shiikh Max’uud oo ay wehliyaan xubno xildhibaanno ah ayaa maanta gaaray magaalada Baladweyne ee xarunta gobollka Hiiraan.

10/2/2012 9:18 AM EST
Talaado, October 02, 2012(HOL) - 16-kii bishii aynu soo dhaafnay , waxaa awooda dalka si nabadgalyo ah ula kala wareegay labo madaxweyne markii ugu horreysay muddo 43 sano ah, taasoo sare u qaaday himilada ay Soomaalidu ka qabaan xasilooni buuxda oo dalku uu gaaro.

10/2/2012 9:04 AM EST
Talaado, Oktoobar 02, 2012 (HOL) — Boqorka guud ee beelaha Jareer weyne ee Soomaaliya, ayaa maanta lagu soo dhoweeyey magaaladda Hargeysa, kaas oo ay ka soo qaybgaleen dadweynaha ku nool magaaladda Hargeysa ee ka soo jeeda beelahaasi, waxa kale oo ka soo qaybgalay madax dhaqameed ka tirsan beelaha Somaliland.

10/2/2012 8:10 AM EST
Talaado, Oktoobar 02, 2012 (HOL) — Taliyaha ciidamada dowladda Soomaaliya ee Jubbooyinka, Jen. Ismaaciil Saxardiid ayaa sheegay in ciidamada dowladda Soomaaliya, kuwa Kenya ee AMISOM iyo xoogagga Raaskambooni ay si rasmi ah maanta ula wareegeen gacan ku haynta magaalada Kismaayo ee gobolka Jubbada Hoose.

10/2/2012 7:05 AM EST
Talaado, Oktoobar 02, 2012 (HOL) — Hay'adda Cilmi-baarista iyo wada-tashiga CRD ayaa magaalada Muqdisho ku qabatay aqoon-isweydaarsi soconayay muddo labo maalmood ah, kaasoo lagu soo nooleynayay ciyaarihii hidaha iyo dhaqanka ee loo yaqaano (Folklore Dance).

10/2/2012 3:32 AM EST
Talaado, Oktoobar 02, 2012 (HOL) — Shirkadda isgaarsiinta Hormuud ayaa dadkii ay waxyeelladu kasoo gaartay fatahaadihii Baladweyne ku dhuftay gaarsiisay gargaar kala duwan oo ku kacay lacag gaaraysa 100,000 oo doollarka Mareykanka ah.

10/2/2012 3:10 AM EST
Talaado, Oktoobar 02, 2012 (HOL) — Hay'adda MSF ayaa ka dayrinaysa xaaladaha murugsan ee ka jira xeryaha qoxootiga Dhadhaab ee dalka Kenya, halkaasoo ay ku jiraan boqolaal kun oo qoxooti Soomaaliyeed ah, iyadoo warsaxaafadeed ay shalay soo saartay ku sheegtay in iyadoo toddobaadkan ay hoggaamiyeyaasha dowladuhu ku kulmaya munaasadda 63-aad ee guddiga fulinta ee UNHCR ay tahay xaaladda ay ku nool yihiin qoxootiga dhadhaab ku jira mid adag.

10/2/2012 2:43 AM EST
Talaado, Oktoobar 02, 2012 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo oo isugu jira xildhibaanno iyo saraakiil ciidan ayaa maanta gaaray magaalada Baladweyne ee gobolka Hiiraan, iyadoo garoonka degmada Baladweyne si weyn loogu soo dhaweeyay.