3/29/2024
Today from Hiiraan Online:  _
Wararka Maanta- Talaado, Oct 16, 2012
Dagaal Ciidamada Dowladda Soomaaliya, kuwa AMISOM iyo Xoogagga Al-shabaab ku dhexmaray Gobolka Shabeellada Hoose
Talaado, Oktoobar 16, 2012 (HOL) — Dagaal culus oo ay ku dhinteen 10-qof oo ka mid ah dhinacyadii uu dagaalku u dhexeeyay tiro intaas ka badana ay dhaawacyo kasoo gaareen ayaa maanta baqadii ka dhacay deegaanno u dhexeeyay deegaanka Yaaq-bari-weyne iyo garoonka diyaaradaha ee Balli-doogle ee gobolka Shabeellada hoose.

Dagaalkan ayaa qarxay markii ciidammo ka tirsan kuwa dowladda oo doonayay inay howgallo sameeyaan ay weerarro kusoo qaadeen xoogagga Al-shabaab oo ku sugnaa dhul howd ah oo ku yaalla deegaanka Yaaq-bari-weyne oo u dhexeeya degmada Wanlaweyn iyo degmada Buur-hakaba ee gobolka Shabeellada hoose.

"Ciidamada dowladda iyo kuwa AMISOM oo saakay doonayay inay howlgallo ka sameeyaan deegaanno ka tirsan gobolka Shabeellada hoose ayaa waxay weerar kala kulmeen xoogagga Al-shabaab, waana iska caabiyeen - waxaana la wareegnay deegaannadii lagu dagaalamay," ayuu yiri Col. Ibraahim Yaroow taliyaha ciidamada dowladda Soomaaliya ee gobolka Shabeellada hoose oo saxaafadda la hadlay markii uu dagaalku joogsaday.

Goobjoogayaal ku sugan deegaannada lagu dagaalamayy ayaa sheegay in dagaalku uu ahaa mid culus oo ay labada dhinac isku adeegsadeen hubka noocyadiisa kala duwan ayna jiraan gaadiid la kala gubay iyo kuwo shil galay intii uu dagaalku socday.

Xarakada Al-shabaab ayaan ka hadlin dagaalkii maanta dhacay, iyadoo sidoo kale uu ka gaabaday dagaalkaas inuu ka hadlo abaanduulaha ciidamada xoogga dalka, Jen. Cabdikariin Yuusuf Aadan (Dhego-badan).

Lama sheegin dad shacab ah oo dagaalkaas wax ku noqday, inkastoo dagaalku uu ahaa mid culus oo ay labada dhinaca duqeymo u geysteen goobo ka fog halka ay ku dagaalamayeen, waxaana dagaalkan uu noqonayaa kii ugu xoogga badnaa oo ku dhexmara ciidamada dowladda, kuwa AMISOM iyo Al-shabaab gobolka Shabeellada Hoose.

Dagaalkan ayaa wuxuu imaanayaa xilli ay saraakiisha dowladda iyo kuwa AMISOM sheegeen dhawaan inay u qorsheysan tahay inay isku xiraan magaalada Muqdisho iyo degmada Baydhabo ee gobolka Bay.

Al-shabaab ayaa weli gacanta ku haysa degmada Buur-hakaba oo ka tirsan gobolka Shabeellada Hoose, waxaana dagaalkaan uu u muuqdaa mid ay Al-shabaab ku doonayso inay ku xajisato gacan ku haynta deegaannada u dhexeeya degmooyinka Wanlaweyn iyo Baydhabo.

Maxamed Xaaji, Xuseen, Hiiraan Online
[email protected]
Muqdisho, Soomaaliya












Click here
10/16/2012 9:11 AM EST
Talaado, Oktoobar 16, 2012 (HOL) — Dacwadan oo noqonaysa tii ugu horreysay oo qof Soomaali ah lagu eedeeyo ayaa ka socota maxkamad ku taalla magaalada Buffalo ee dalka Mareykanka, iyadoo maxkamadda ay ka hor hadashay hooyadii dhashay wiilka la dilay oo 10-jir ahaa.

10/16/2012 8:36 AM EST
Talaado, Oktoobar 16, 2012 (HOL) — Hay'adda samafalka Waano oo ka mid ah hay'adaha ka howlgala Soomaaliya kana shaqeysa nafaqeynta caruurta iyo hooyooyinka ayaa waxay Muqdisho ku qabatay xuska maalinta cunnada adduunka oo ku beegan maanta oo ay bishu tahay 16-ka Oktoobar.

10/16/2012 8:28 AM EST
Talaado, Oktoobar 16, 2012 (HOL) — Roob bilaawday 11:00 habeenimo ee xalay soona garay saakay waabarigii hore ayaa xalay mar kale ka da’ay magaalada Baladweyne ee xarunta gobolka Hiiraan oo dhawaan ay ku dhufteen daaadad ka dhashay wabiga Shabeelle oo buux dhaafay iyo roob mudo dheer qaatay oo ka da’ay magaalada.

10/16/2012 7:27 AM EST
Talaado, Oktoobar 16, 2012 (HOL) — Ciidamadda Booliska magaaladda Boorame, ayaa shalay si hubsiimo la’aan ah u weeraray guri ay ku noolyihiin qoys shacab ahi, kuwaas oo dhibaato ka soo gaadhay Aabihii qoyskaasi iyo qaar ka mid ah qoyska deganaa gurigaasi.

10/16/2012 7:21 AM EST
Talaado, Oktoobar 16, 2012 (HOL) — Kulan ay ka qaybgaleen mas'uuliyiin ka tirsan dowladda Soomaaliya, maamulka gobolka Shabeellada Hoose, ururrada haweenka iyo qaybaha kala duwan ee bulshada ku dhaqan magaalada Marka ayaa lagu qabtay maanta degmada Marko ee xarunta gobolka Shabeellada Hoose.

10/16/2012 6:32 AM EST
Talaado, Oktoobar 16, 2012 (HOL) — Golaha Wakiiladda Somaliland, ayaa cod aqlabiyad ah ku meel mariyey xeerka ay ku shaqeynayaan sirdoonka Qaranka oo maalmihii u dambeeyey laga doodayay.

10/16/2012 2:08 AM EST
Talaado, Oktoobar 16, 2012 (HOL) — Ra'iisul wasaaraha cusub ee Soomaaliya ayaa lagu wadaa inuu maalinta Arbacada Berri ah uu hortago baarlamaanka si codka kalsoonida ah loogu qaado, sida ay sheegeen mudane ka tirsan baarlamaanka Soomaaliya.

10/16/2012 1:57 AM EST
Talaado, Oktoobar 16, 2012 (HOL) — Dab geystay khasaare maaliyadeed oo xoog leh ayaa xalay ka kacay xerada Xagar-dheer oo ka mid ah xeryaha qoxootiga ee ku yaalla deegaanka Dhadhaab ee dalka Kenya, waxaana halkaas ku gubtay dukaanno fara badan.

10/16/2012 1:50 AM EST
Talaado, Oktoobar 16, 2012 (HOL) — Maxkamadda sare ee dalka ayaa amar kasoo saartay lacagaha la qaado ee aysan ka warhayn hay'adaha dhaqaalaha dalka, kaddib markii ay maxkamadda dacwad u gudbiyeen iskaashatada gadiidleyda gobolka Banaadir oo ka cabanaya lacago ay ka qaaddo wasaaradda gaadiidka.