Ururka Suxufiyiinta Somaliland oo Cambaareeyey xariga laba Wariye loogu geystay Magaalada Boorame ee Gobolka Awdal

Jimco, September 14, 2012 (HOL) — Magaaladda Boorama ee xarunta gobolka Awdal ayaa shalay lagu xidhay laba weriye oo u kala shaqeynayay Telefishinadda Somalisat iyo Telefishanka Bulsho.

Labadan wariye ayaa la kala yidhaa Haashim Good iyo Mursal Cilmi Cumar oo Boorama wakiil uga ah laba Telefishan iyo wargeyska Haatuf, inkastoo si cad loo sheegin sababta dhabta ah ee loo xidhay, hadana waxa la sheegayaa in  xadhigoodu ka dambeeyey Aragti urur ay ka sameeyeen dadweynuhu sida ay u arkeen madaxweynaha cusub ee Somalia Xasan Sheekh Maxamuud.

Haseyeeshee xadhiga wariyeyaashan ayey ciidamadda amaanka ee Boorame sheegeen inay u mareen sifo sharci ah.

Gudoomiyaha Ururka Suxufiyiinta Somaliland Xasan Maxamed Yuusuf ayaa cambaareeyey xadhiga lagula kacay labadda wariye, kaas oo uu ku tilmaamay mid sharciga ka baxsan.

Si kastaba ha ahaatee, madaxweynaha cusub ee Somalia waxa hore usoo dhoweeyey madaxweynaha Somaliland, Axmed Maxamed Maxamuud Siillaanyo iyo dadweynaha Somalilandba, taas oo dambi ahayn in dadweynuhu aragtidoodda ka dhiiban karaan siday u arkaan isbedeladda ka dhacaya geeska afrika.

Xadhiga wariyeyaasha ka hawlgala somaliland ayaa soo badanaya, iyago sifo sharciga loo soo marin la iska xidhayo.

Barkhad-Ladiif  M. Cumar, Hiiraan Online 
[email protected]
Hargeysa, Somaliland