3/29/2024
Today from Hiiraan Online:  _
Wararka Maanta- Jimco, Sept 14, 2012
Dowladda Mareykanka iyo Qaramada Midoobay oo si adag u cambaareeyay Weerarkii lagu qaaday Madaxweynaha Soomaaliya
Jimco, September 14, 2012 (HOL) — Dowladda Mareykanka iyo Qaramada Midoobay ayaa si adag u cambaareeyay weerarradii ismiidaaminta ahaa ee maalin ka hor lagu weeraray hoteel uu Muqdisho ka deggenaa madaxweynaha cusub ee Soomaaliya, Xasan Sheekh Maxamuud.

Warsaxaafadeed kasoo baxay Mareykanka ayaa lagu sheegay in weerarradaas si geesinimo ah uga hortageen ciidamada dowladda Soomaaliya iyo kuwa AMISOM, waxayna tacsi u direen ehellada dadkii iyo askartii ku geeriyooday weerarradaas.

Mareykanka wuxuu shacabka Soomaaliyeed ugu baaqay inay meel uga soo wada-jeestaan falalka ku dhisan siyaasadda ee la doonayo in lagu carqaladeeyo isbedelka, nabadda iyo dib u dhiska dalka.

Dhanka kale, madaxweynaha golaha ammaanka ee Qaramada Midoobaym naasir C/casiis Al-Naasir oo u warramayay saxaafadda isagoo ku sugan New York ayuu sheegay in weerarka uu ahaa mid fulaynimo ah oo lagu doonayay in caqalad lagu geliyo isbedelka ku yimid hannaanka dowladeed ee Soomaaliya iyo horumarka socda.

"Waxaan si adag u cambaareynaynaa weerarkaas fulaynimada ah. Waxaana tacsi u diraynaa ehellada kuwii naftooda u waayay difaaca sharafka Soomaaliya," ayuu yiri Al-Naasir oo sheegay in weerarkaas uusan ahayn mid hakin kara horumarka iyo dib u dhiska dhinaca nabadda ee Soomaaliya.

Arbacdii toddobaadkan ayaa waxaa laba nin oo waxyaabaha qarxa isku xiray ay ku weerareen hoteel Jaziira oo ku dhow garoonka diyaaradaha ee magaalada Muqdisho madaxweynaha cusub ee Soomaaliya iyo wufuud ka socday dalka Kenya iyo ururka Midowga Afrika, inkastoo aysan waxyeelo soo gaarin.

Weerarradaas ismiidaaminta ahaa ayaa waxaa sheegatay Xarakada Al-shabaab, iyagoo sheegay inay ka gaareen hadafkii ay ka lahaayeen, iyadoo weerarkaas ay ku dhinteen sagaal qof oo ay ku jiraan shan askari oo AMISOM iyo dowladda ka tirsan iyo qof rayid ah.

Maxamed Xaaji Xuseen, Hiraan Online
[email protected]
Muqdisho, Soomaaliya












Click here
9/14/2012 4:45 AM EST
Jimco, September 14, 2012 (HOL) — Madaxweynaha cusub ee Soomaaliya, Xasan Sheekh Maxamuud ayaa sheegay in weerarradii ismiidaaminta ahaa ee lagu qaaday hoteel uu Muqdisho ka deggenaa aysan ka hor-istaagi doonin inay ku sii socdaan jidka horumarka iyo isbedelka Soomaaliya.

9/14/2012 4:43 AM EST
Jimco, September 14, 2012 (HOL) — Waxaa xalay saqdii dhexe gubtey kaam ay dad barakacayaal ahi ku dhaqan yihiin oo ku yaal xaafadda Biyo kulule ee bariga Magaalada Boosaaso, dabka oo ahaa mid xoogan, islamarkaana aan si dhab ah loo ogeyn waxa sababay ayaa hoy la'aan dhigey in ka badan 30 qoys.

9/14/2012 4:37 AM EST
Jimco, September 14, 2012 (HOL) — Magaaladda Boorama ee xarunta gobolka Awdal ayaa shalay lagu xidhay laba weriye oo u kala shaqeynayay Telefishinadda Somalisat iyo Telefishanka Bulsho.

9/14/2012 4:29 AM EST
Jimco, September 14, 2012 (HOL) — Xarakada Al-shabaab oo dagaal kula jirta dowladda Soomaaliya iyo ciidamada caawinaya ee AMISOM iyo Itoobiya ayaa waxay sheegeen inaysan dagaalka joojinayn inta ay ka gaarayaan hadafkooda ah in Soomaaliya oo dhan lagu xukumo diinta Islaamka.

9/14/2012 4:18 AM EST
Jimco, September 14, 2012 (HOL) — Bannaanbax ay si wadajir ah u soo qaban-qaabiyeen maamulka gobolka Bay iyo xafiiska hogaanka shacabka iyo hormarinta ee Bay laguna taageerayay madaxweynaha cusub ee Soomaaliya, Xasan Sheekh Maxamuud ayaa ka dhacay garoonka kubadda cagta ee Dr. Ayuub ee magaalada Baydhabo.

9/14/2012 3:59 AM EST
Jimco, September 14, 2012 (HOL) — Taliska ciidamada Milateriga Soomaaliya ayaa sheegay inay ku wajahan yihiin magaalada Jowhar ee xarunta gobolka Shabeellada dhexe oo 90-km dhinaca waqooyi kaga beegan Muqdisho, halkaasoo saddexdii sano ee ugu dambeysay ay ka talinaysay Xarakada Al-shabaab.

9/14/2012 3:43 AM EST
Jimco, September 14, 2012 (HOL) — Boqolaal Soomaali ah oo ku xiran xabsi ku yaalla magaalada labaad ee dalka Liibya ugu weyn ee Banghazi ayaa ka cabanaya xorriyad la'aan iyo inaan loo ogoleyn in dalkooda dib loogu celiyo, iyagoo sheeagy in dhibaatooyin adag ay ku haystaan xabsiga ay ku jiraan.

9/14/2012 3:28 AM EST
Jimco, September 14, 2012 (HOL) — Madaxweynaha Soomaaliya, Xasan Sheekh Maxamuud ayaa sheegay in isbedelka dhacay uusan wax saameyn ku yeelan doonin shaqaalaha dowladda, isagoo ballanqaaday inay shaqaaluhu sidii hore u shaqeyn doonaan.