Haweeneydii ugu horreysay oo Taariikhda Soomaaliya loo Magacaabay Xilka Wasiirka Arrimaha Dibadda ee Soomaaliya
Isniin, November 05, 2012 (HOL) — Fowziyo Yuusuf Xaaji Aadan ayaa noqonaysa wasiirradii ugu horeysay oo haween ah oo loo dhiibo jagada wasaaradda arrimaha dibadda Soomaaliya inta la xusuusto taariikhda Soomaaliya, waxayna ka mid ah tahay toban wasiir oo uu xalay ku dhawaaqay ra'iisul wasaare Cabdi Faarax Shirdoon (Saacid).
Soomaaliya oo 52-sano xor ah ayaa waxaa soo maray xukuumado fara badan oo isugu jira kuwo joogto ah iyo kuwo KMG ah, waxayna noqonaysaa markii ugu horreysay oo xilkan arrimaha dibadda loo dhiibo qof haween ah; waxaana soo dhaweeyay magacaabistan qaybaha kala duwan ee bulshada Soomaaliyeed.
"Kaddib wadatashiyo iyo talooyin waxaan magacaabay golahayga wasiirrada oo ka kooban 10 xubnood, waxaa ku jirta haweeneydii ugu horreysay oo noqota wasiirka arrimaha dibadda ee Soomaaliya inta la xusuusto taariikhda," ayuu yiri Cabdi Saacid.
Fowziyo ayaa waxay kasoo jeeda deegaannada Somaliland, waxayna muddo dheer ku noolayd dalka Britain, waxayna qudheedu soo dhaweysay in loo magacaabo xilka wasaaradda arrimaha dibadda iyo xiriirka caalamka ee Soomaaliya.
"Magacaabidda la ii magacaabay wasiirka arrimaha dibadda waa mid taariikh cusub u ah Soomaaliya, gaar ahaan haweenka Soomaaliyeed. Waayo tani waxay furaysaa baal cusub oo siyaasadda Soomaaliya ah," ayay tiri Fowziyo.
Haweeney kale ayaa ku jirta wasaaradaha la magacaabay, Maryan Qaasim Axmed oo loo magacaabay wasaaradda horumarinta adeegga bulshada, wasaaraddaas oo ka shaqeynaysa, qaybaha waxbarashada, caafimaadka, dhallinyarada, shaqada, shaqaalaha iyo isboortiga.
Inta badan wasiirrada la magacaabay ayaan horay loogu arag saaxada siyaasadda ee Soomaaliya, waxaana ka mid ah saddex wasiir oo horay uga soo mid noqday xuukumaddii Farmaajo oo shacabka Soomaaliyeed ay si weyn u soo dhaweeyeen waxqabadkeeda muddadii ay jirtay.
Wasirradii soo maray xukuumaddii hore ee KMG ahayd ayaa waxaa ka mid ah: wasiirka gaashaandhigga, C/xakiin Xaaji Maxamuud Fiqi, wasiiradda horumarinta adeegga bulshada, Maryan Qaasim Axmed iyo wasiirka Diinta iyo Owqaafta C/llaahi Abyan Nuur.
Maxamed Xaaji Xuseen, Hiiraan Online
[email protected]Muqdisho, Soomaaliya
