9/22/2018
Today from Hiiraan Online:  _
Wararka Maanta- Talaado, May 15, 2012
Munaasabad lagu xusayay Maalinta Dhalinyarada Soomaaliyeed ee 15-ka May oo lagu qabtay Magaalada Beledweyne ee Gobolka Hiiraan


Talaado, May 15, 2012 (HOL) — Munaasabad si heer sare ah oo loosoo agaasimay isla markaana uu soo qaban-qaabiyay urur dhalinyarro oo lagu magacaabo SYAO ayaa maanta lagu qabtay magaalada Beledweyne ee xarunta gobolka Hiiraan.

Mas’uuliyiin ka soctay maamulka gobollka Hiiraan, dhalinyarro, odayaal dhaqameed, haween iyo waliba dad ka tirsan qeybaha kala gadisan ee bulshada ayaa ka qeyb-galay munaasabada oo laga soo jeediyay kalmado ka turjumayay doorka dhalinyarrada ay ku leeyihiin hormarka dalka iyo in dhalinyarradu yihiin awood uu Qaran ku dhismo.

Duqa magaalada Beledweyne Max’ed Xassan Nuuriye oo ka mid ahaa mas’uuliyiinta maamulka gobollka ee ka qeyb-gashay munaasabada xuska maalinta dhalinyarrada Soomaaliyeed ayaa sheegay in wax lagu farxo tahay in sidan oo kale isku abuulaan dhalinyarrada iskuna baraarujiyaan doorka ama kalinta ay ku leeyihiin hormarka dalkooda.

"Dhalinyarrada waa xoog jira oo aan la dhayalsan karin, haddii ay awoodooda meel isugu geeyaan waxaa hubaal ah in ay wax badan badali karaan," sidaa waxaa yiri duqa magaalada Beledweyne Max’ed Xasan Nuuriye.

Qaar ka mid ah dhalinyarradii ka qeyb-gashay munaasabada oo isugu jirtay wiilal iyo gabdho oo goobta ka hadllay ayaa ku dheeraaday doorkii lama ilaawaanka ahaa ee dhalinyarradii SYL ay ka soo qaateen xurnimada maanta la harsanayo, taasoo ay tusaale uga dhigeen awooda ay dhalinyarrada u leeyihiin in ay is badal dhab ah ka sameeyaan dalka, waxaana ay ka codsadeen dhalinyarrada Soomaaliyeed meel kasta oo ay joogaan in ay u istaagaan ka qeyb-qaadasha howlaha hormarka leh ee dalka ka socda.

Odayaal iyo waxgarad munaasabada oo jogay oo iyagana halkaa ka hadllay ayaa sheegay in ay aad ugu faraxsan yihiin ka qeyb-galka munaasabada ay soo qaban qaabiyeen dhalinyarro Soomaaliyeed dhinaca kale marka la eegana looga hadllayo ama lagu xasuusanayo kaalintii ay dhalinyarradu ka soo qaateen halgankii loo galay xuriyada, iyaga oo ku bogaadiyay dhalinyarrada Soomaaliyeed meel kasta oo ay joogaan maalinta 15- May.

Sikastaba xuska maalinta dhalinyarrada Soomaaliyeed ayaa la oran karaa waa mid mudo dheer ugu danbeysay magaalada Beledweyne, waxaana muuqata in ay siweyn ugu faraxsanaayeen ka qeyb-galayaashii munaasabada in ay goob joog ka noqdaan xuska loo dhigayo maanta oo kale.

C/raxmaan Diini, Hiiraan Online
[email protected]
Beledweyne, Soomaaliya







Click here
5/15/2012 4:11 PM EST
Talaado, May 15, 2012(HOL): Madaxweynaha Soomaaliya Shiikh Shariif Shiikh Axmed ayaa maanta khudbad ka jeediyay Golaha Ammaanka ee Qaramada Midoobay, iyadoo khudbaddiisana ay dhinacyo badan taabaneysay.

5/15/2012 9:17 AM EST
Talaado, May 15, 2012 (HOL) — Ururaddii siyaasaddda ee qiimaynta ku hadhay ayaa maanta ku dhowaaqay inay samaysteen dallad xaqoodda u raadisa, kuwaas oo sheegay in aanay wali ku qancin natiijaddii ay guddidda diiwaangelinta ururadda ku dhowaaqeen, isla markaana sheegay inay dadka usoo bandhigayaan cadaalad darooyinka ku dhacay ururadda hadhay.

5/15/2012 8:27 AM EST
Talaado, May 15, 2012 (HOL) — Sakaal ka tirsan ciidamada booliiska Kenya ayaa ku dhintay laba kalena dhaawacyo culus ayaa kasoo gaaray kaddib qarax miino oo maanta lagula eegtay xeryaha qoxootiga Dhadhaab ee dalka Kenya.

5/15/2012 8:10 AM EST
Talaado, May 15, 2012 (HOL) — Munaasabad lagu xusayay maalinta dhallinyarada Soomaaliyeed ee 15-ka May ayaa maanta lagu qabtay magaalada Muqdisho, taasoo ay ka qaybgaleen wasiirro, xildhibaano, qaybaha bulshada iyo dhallinyaro isugu jiray wiilal iyo gabdho.

5/15/2012 7:42 AM EST
Talaado, May 15, 2012 (HOL) — Dad shacab ah iyo ciidamada amniga Somaliland ayaa maanta dagaal waqti kooban socday wuxuu ku dhexmaray bariga magaalada Hargeysa, kaasoo sababay khasaare dhimasho iyo dhaawac ah oo soo kala gaartay labada dhinac.

5/15/2012 6:48 AM EST
Talaado, May 15, 2012 (HOL) — Ergooyinkii Puntland uga qaybgalaysay shirka odayaasha dhaqanka ee Muqdisho ayaa maanta ka dhoofay Muqdisho, iyagoo dib ugu laabtay Garoowe, waxaana afhayeenka odyaashan uu sheegay in sababta ay Puntland ugu laabteen ay tahay sidii ay wadatashi uga sameyn lahaayeen maamulkooda.

5/15/2012 6:36 AM EST
Talaado, May 15, 2012 (HOL) — Warsaxaafadeed maanta kasoo baxay taliska AMISOM ee Muqdisho ku sugan ayaa lagu sheegay in Maj. Emannuel Bizimana oo Al-shabaab ay sheegtay inay dileen habeenkii talaadada ahaa uu ka mid ahaa saraakiil 20-kii Oktoobar 2011 lagu dilay dagaal Al-shabaab iyo AMISOM ku dhexmaray degmada Dayniile.

5/15/2012 6:23 AM EST
Talaado, May 15, 2012 (HOL) — Ciidamada Midowga Yurub ee ku sugan xeebaha dalka Soomaaliya oo isticmaalaya diyaaradaha qummaatiga u kaca ee Helicopter-ka loo yaqaan ayaa maanta weeraray saldhig ay burcadbadeeddu ku lahaayeen meel ku dhow degmada Xarardheere ee gobolka Mudug.

5/15/2012 3:28 AM EST
Talaado, May 15, 2012 (HOL) — Dowladda KMG ah ee Soomaaliya ayaa sheegtay in aysan wax taageero ah oo la taaban karo ka helin beesha caalamka, iyadoo kaddib muddo saddex bilood ah la filayo in looga gudbo marxalada ku-meel-gaarka.

5/15/2012 3:06 AM EST
Talaado, May 15, 2012 (HOL) — Madaafiic ayaa xalay lagu weeraray madaxtooyada Soomaaliya, sidoo kalena waxaa isla xalay ka dhacay jidka warshadaha dagaallo u dhexeeyay ciidamada DKMG ah iyo kuwa Al-shabaab.

5/15/2012 3:02 AM EST
Talaado, May 15, 2012 (HOL) — Maamulka Galmudug oo ka mid ah maamullada ka jira Soomaaliya ayaa xaqiijiyay in deegaanno uu ka taliyo ay gaareen xoogag Al-shabaab taabacsan, iyadoo maamulku uu sheegay inuu billaabay howgallo uu kaga hortagayo.