11/16/2018
Today from Hiiraan Online:  _
Wararka Maanta- Talaado, May 15, 2012
Munaasabad lagu xusayay Maalinta Dhallinyarada Soomaaliyeed ee 15-ka May oo lagu qabtay Muqdisho (SAWIRRO)



Talaado, May 15, 2012 (HOL) — Munaasabad lagu xusayay maalinta dhallinyarada Soomaaliyeed ee 15-ka May ayaa maanta lagu qabtay magaalada Muqdisho, taasoo ay ka qaybgaleen wasiirro, xildhibaano, qaybaha bulshada iyo dhallinyaro isugu jiray wiilal iyo gabdho.

Hay'adda wada-hadalka bulshada ee CCD ayaa soo qaban-qaabisay munaasabadan, iyadoo lagu soo bandhigay boor ka turjumaya doorka dhalinyarada Soomaaliyeed ay ku leeyihiin horumarinta dalkooda, sidoo kale waxaa boorarka ku jiray mid lagu soo bandhigay sawirrada 13-kii dhallinyaro ee hoggaaminayay ururkii gobonimo-doonka SYL.

Munaasabadda ayaa waxaa lagu furay aaydo Qur'aan ah, waxaana intaas kaddib hadal ku furay wasiir-u-dowlaha wasaaradda shaqada, shaqaalaha, dhallinyarada iyo isboortiga C/llaahi Sheekh Cali (Qaloocow) isagoo sheegay in maanta ay tahay maalin weyn oo ay dhalatay fikradda xoreynta Soomaaliya.

"Maalinta waa maalin weyn waa maalintii ay 13-dhalinyaro ah u kaceen inay dalka xorriyad gaarsiiyaan, dhallinyaradii shalay ma aysan haysan waxbarasho, sare sidoo kale ma aysan gaarsiinayn halka ay kuwa maanta gaarsiisan yihiin, laakiin way ku guuleysteen inay dalkan xorriyad gaarsiiyaan," ayuu yiri C/llaahi Qaloocow.

Sidoo kale, Qaloocow wuxuu sheegay in farqiga u dhaxeeya dhallinyaradii shalay iyo kuwa maanta ay tahay in dhallinyaradii shalay ay ahaayeen kuwo wadaniyiin ah, isla markaana aan qabiil ku dhaqamin, hase kuwa maanta ay yihiin kuwo sidii la doono loo adeegsan karo.

Xildhibaan Maxamed Cabdi Yuusuf oo isna hadlay munaasadda ayaa ka sheekeeyay taariikhihii ay soo martay xorriyadda Soomaaliya, wuxuuna xusay in aabbihii uu ka mid ahaa dadkii ku dhintay xorriyad raadinta.

"Maalintii dhagaxtuur ay dhacday waa maalin taariikh ku leh Soomaalida, markaan dib ugu laabano taariikhdii hore ee Soomaali-weyn ay qaybsadeen dalalka Ingiriiska, Faransiiska, Talyaaniga iyo Itoobiya," ayuu yiri xildhibaan Maxamed Cabdi oo intaas ku daray inuu ka mid ahaa dad ay Talyaanigu xireen xilligii uu socday halgalkii xorriyadda dalka.

Mar uu ka hadlay aasaaskii SYL ayuu sheegay in sanadkii 1943-kii ay si hoose ah u aasaaseen SYC, xilligaas ay qarinayeen iyaga nadafkooda siyaasada ahaa, balse ay dadka u bisleynayeen in xisbi siyaasadeed oo gobonimo-doon uu ahaa, wuxuuna tilmaamay in sanadkii 1945-kii lagu dhawaaqay SYL, halkaasna ay ka wadeen halgankii gobonimo-doonka illaa bannaanbixii 1946-1949.

Sidoo kale, xildhibaanku wuxuu sheegay in dhalinyarada maanta loo adeegsado hab qabiil iyo dano gaar ah, isagoo intaas ku daray in dhallinyarada Soomaaliyeed lagu kala qaybiyay dano siyaasadeed oo gaar ah, isagoo ugu baaqay inay midoobaan isla markaana la yimaadaan wadajir.

Munaasabada ayaa waxaa dhex-taal u ahaa suugaan lagu cabirayay qaybta ay ka qaadan karaan dhallinyarada hadda jirta nabad kusoo celinta dalkooda, iyadoo ay heesaha qaadayeen gabdho maryo ka sameysatay calanka Soomaaliya.

Sheekh Axmed Abuukar Gaabow iyo Ruqiyo Cali Cabdulle oo munaasabadda ka hadlay ayaa sheegay inay lagama maarmaan tahay in dhallinyarada Soomaaliyeed ay noqdaan kuwo had iyo jaar u taagan badbaadinta dalkooda iyo dadkooda, intii loo a deegsan lahaa arrimo siyaasadeed oo aanay dani ugu jirin dalka iyo dadka.

Ugu dambeyn, waxaa kulanka ka hadlay xildhibaannada kala ah Aamino Saciid Cali iyo Sahro Maxamuud Amiin iyagoo ku guubaabiyay dhallinyarada Soomaalida rag iyo dumar inay danta dalkooda ka shaqeeyaan ayna isku duubnaadaan, loogana baahan yahay in inay ka baxaan kala qoqobka.







Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/15/2012 4:11 PM EST
Talaado, May 15, 2012(HOL): Madaxweynaha Soomaaliya Shiikh Shariif Shiikh Axmed ayaa maanta khudbad ka jeediyay Golaha Ammaanka ee Qaramada Midoobay, iyadoo khudbaddiisana ay dhinacyo badan taabaneysay.

5/15/2012 9:38 AM EST
Talaado, May 15, 2012 (HOL) — Munaasabad si heer sare ah oo loosoo agaasimay isla markaana uu soo qaban-qaabiyay urur dhalinyarro oo lagu magacaabo SYAO ayaa maanta lagu qabtay magaalada Beledweyne ee xarunta gobolka Hiiraan.

5/15/2012 9:17 AM EST
Talaado, May 15, 2012 (HOL) — Ururaddii siyaasaddda ee qiimaynta ku hadhay ayaa maanta ku dhowaaqay inay samaysteen dallad xaqoodda u raadisa, kuwaas oo sheegay in aanay wali ku qancin natiijaddii ay guddidda diiwaangelinta ururadda ku dhowaaqeen, isla markaana sheegay inay dadka usoo bandhigayaan cadaalad darooyinka ku dhacay ururadda hadhay.

5/15/2012 8:27 AM EST
Talaado, May 15, 2012 (HOL) — Sakaal ka tirsan ciidamada booliiska Kenya ayaa ku dhintay laba kalena dhaawacyo culus ayaa kasoo gaaray kaddib qarax miino oo maanta lagula eegtay xeryaha qoxootiga Dhadhaab ee dalka Kenya.

5/15/2012 7:42 AM EST
Talaado, May 15, 2012 (HOL) — Dad shacab ah iyo ciidamada amniga Somaliland ayaa maanta dagaal waqti kooban socday wuxuu ku dhexmaray bariga magaalada Hargeysa, kaasoo sababay khasaare dhimasho iyo dhaawac ah oo soo kala gaartay labada dhinac.

5/15/2012 6:48 AM EST
Talaado, May 15, 2012 (HOL) — Ergooyinkii Puntland uga qaybgalaysay shirka odayaasha dhaqanka ee Muqdisho ayaa maanta ka dhoofay Muqdisho, iyagoo dib ugu laabtay Garoowe, waxaana afhayeenka odyaashan uu sheegay in sababta ay Puntland ugu laabteen ay tahay sidii ay wadatashi uga sameyn lahaayeen maamulkooda.

5/15/2012 6:36 AM EST
Talaado, May 15, 2012 (HOL) — Warsaxaafadeed maanta kasoo baxay taliska AMISOM ee Muqdisho ku sugan ayaa lagu sheegay in Maj. Emannuel Bizimana oo Al-shabaab ay sheegtay inay dileen habeenkii talaadada ahaa uu ka mid ahaa saraakiil 20-kii Oktoobar 2011 lagu dilay dagaal Al-shabaab iyo AMISOM ku dhexmaray degmada Dayniile.

5/15/2012 6:23 AM EST
Talaado, May 15, 2012 (HOL) — Ciidamada Midowga Yurub ee ku sugan xeebaha dalka Soomaaliya oo isticmaalaya diyaaradaha qummaatiga u kaca ee Helicopter-ka loo yaqaan ayaa maanta weeraray saldhig ay burcadbadeeddu ku lahaayeen meel ku dhow degmada Xarardheere ee gobolka Mudug.

5/15/2012 3:28 AM EST
Talaado, May 15, 2012 (HOL) — Dowladda KMG ah ee Soomaaliya ayaa sheegtay in aysan wax taageero ah oo la taaban karo ka helin beesha caalamka, iyadoo kaddib muddo saddex bilood ah la filayo in looga gudbo marxalada ku-meel-gaarka.

5/15/2012 3:06 AM EST
Talaado, May 15, 2012 (HOL) — Madaafiic ayaa xalay lagu weeraray madaxtooyada Soomaaliya, sidoo kalena waxaa isla xalay ka dhacay jidka warshadaha dagaallo u dhexeeyay ciidamada DKMG ah iyo kuwa Al-shabaab.

5/15/2012 3:02 AM EST
Talaado, May 15, 2012 (HOL) — Maamulka Galmudug oo ka mid ah maamullada ka jira Soomaaliya ayaa xaqiijiyay in deegaanno uu ka taliyo ay gaareen xoogag Al-shabaab taabacsan, iyadoo maamulku uu sheegay inuu billaabay howgallo uu kaga hortagayo.