9/18/2018
Today from Hiiraan Online:  _
Wararka Maanta- Talaado, May 15, 2012
Dowladda KMG Soomaaliya oo Beesha Caalamka ka dalbatay inay bixiyaan yaboohii dhaqaale ee ay horay u ballanqaadeen


Talaado, May 15, 2012 (HOL) — Dowladda KMG ah ee Soomaaliya ayaa sheegtay in aysan wax taageero ah oo la taaban karo ka helin beesha caalamka, iyadoo kaddib muddo saddex bilood ah la filayo in looga gudbo marxalada ku-meel-gaarka.

Warsaxaafadeed ay dowladdu soo saartay ayay ku sheegtay inay ku tilaabsatay dhameystirka howlaha heshiiskii Roadmap-ka sida diyaarinta dastuurka oo sugaya ansixin, wax-ka-qabashadda ammaanka iyo dowlad-wanaaga oo guulo laga gaaray.

"Caqabado badan kaddib, dowladdu waxay muujisay inay ka go'an tahay in natiijo laga gaaro howlaha socda wakhtigan muhiimka ah, iyadoo ay oday-dhaqameedyada dadaal ugu jiraan sidii looga arrinsan lahaa aayaha ummadda Soomaaliyeedm," ayay dowladdu ku tiri warsaxaafadeedkeeda.

Sidoo kale, waxay dowladdu warsaxaafadeedkeeda ku tiri: "Dadaallada ay dowladdu waddo waxaa ka dhashay natiijooyin shacabka Soomaaliyeed galiyay kalsooni ku aaddan wax-qabadka dowladooda. Taasi waxay abuurtay dareenkii shacabka oo wax iska-badalay, maadaama ay dowladdu heshay kalsooni, balse waxaa meesha ka maqan kaalintii beesha caalamka."

Dowladda Soomaaliya waxay sheegtay in bishii September ee sanadkii hore beesha caalamku waxay yaboohday dhaqaalihii lagu meel marin lahaa fulinta heshiiska Roadmap-ka, balse wali kharashkaas masoo gaarin DKMG.

"Taageerada beesha caalamka waxay aasaas u ahayd horumarintii iyo waxqabadkii DKMG ee sanadihii lasoo dhaafay taasoo shacabka Soomaaliyeed ay abaal-weyn uga hayaan. Waxaa suurogal ah in dib-u-dhigida kharashka loo ballan-qaaday DKMG ay keeni karto hakad ku yimaada waxqabadkii iyo horumarkii la gaaray," ayay ku tiri dowladdu warsaxaafadeedkeeda.

Sidoo kale, dowladdu waxay sheegtay inay diyaar u diyaar-garowday dhameystirka howlaha geedi-socodka Roadmap-ka, iyadoo ay jirto caqabado dhaqaale, iyadoo xustay inay khasaare tahay inaan la dhameystirin heshiiskii la gaaray.

"Marka la eego dhinaca siyaasadda; dowladdu waxay abuurtay jawi cusub oo ay shacabku ku qanacsan yihiin kaasoo nabad ku dhameynaya xiliga kala-guurka ah. Oday-dhaqameedyada waxaa ka go’an horumuud inay ka noqdaan dadaalka nabadda iyo dhameystirka howlaha geedi-socodka iyo wakhtiga ka danbeeya," ayaa lagu yiri warka kasoo baxay dowladda KMG ah ee Soomaaliya.

Dowladdu waxay sheegtay in dalku ku socdo waddada horumarka, balse ay habboon tahay in dadaalka dowladda uu daba-socdo taageero dhaqaale si loo xaqiijiyo dhameystirka howlaha harsan ee geeddi-socodka qorshaha Roadmap-ka.

Ugu dambeyn, warsaxaafadeedka xukuumadda waxaa lagu sheegay in Beesha caalamka ay fahamsan tahay marxalada uu ku sugan yahay dalka, gaar ahaan waqtiga kala guurka, kaasoo aan lagu maareyn karin yabooh aan wali la bixin.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/15/2012 4:11 PM EST
Talaado, May 15, 2012(HOL): Madaxweynaha Soomaaliya Shiikh Shariif Shiikh Axmed ayaa maanta khudbad ka jeediyay Golaha Ammaanka ee Qaramada Midoobay, iyadoo khudbaddiisana ay dhinacyo badan taabaneysay.

5/15/2012 9:38 AM EST
Talaado, May 15, 2012 (HOL) — Munaasabad si heer sare ah oo loosoo agaasimay isla markaana uu soo qaban-qaabiyay urur dhalinyarro oo lagu magacaabo SYAO ayaa maanta lagu qabtay magaalada Beledweyne ee xarunta gobolka Hiiraan.

5/15/2012 9:17 AM EST
Talaado, May 15, 2012 (HOL) — Ururaddii siyaasaddda ee qiimaynta ku hadhay ayaa maanta ku dhowaaqay inay samaysteen dallad xaqoodda u raadisa, kuwaas oo sheegay in aanay wali ku qancin natiijaddii ay guddidda diiwaangelinta ururadda ku dhowaaqeen, isla markaana sheegay inay dadka usoo bandhigayaan cadaalad darooyinka ku dhacay ururadda hadhay.

5/15/2012 8:27 AM EST
Talaado, May 15, 2012 (HOL) — Sakaal ka tirsan ciidamada booliiska Kenya ayaa ku dhintay laba kalena dhaawacyo culus ayaa kasoo gaaray kaddib qarax miino oo maanta lagula eegtay xeryaha qoxootiga Dhadhaab ee dalka Kenya.

5/15/2012 8:10 AM EST
Talaado, May 15, 2012 (HOL) — Munaasabad lagu xusayay maalinta dhallinyarada Soomaaliyeed ee 15-ka May ayaa maanta lagu qabtay magaalada Muqdisho, taasoo ay ka qaybgaleen wasiirro, xildhibaano, qaybaha bulshada iyo dhallinyaro isugu jiray wiilal iyo gabdho.

5/15/2012 7:42 AM EST
Talaado, May 15, 2012 (HOL) — Dad shacab ah iyo ciidamada amniga Somaliland ayaa maanta dagaal waqti kooban socday wuxuu ku dhexmaray bariga magaalada Hargeysa, kaasoo sababay khasaare dhimasho iyo dhaawac ah oo soo kala gaartay labada dhinac.

5/15/2012 6:48 AM EST
Talaado, May 15, 2012 (HOL) — Ergooyinkii Puntland uga qaybgalaysay shirka odayaasha dhaqanka ee Muqdisho ayaa maanta ka dhoofay Muqdisho, iyagoo dib ugu laabtay Garoowe, waxaana afhayeenka odyaashan uu sheegay in sababta ay Puntland ugu laabteen ay tahay sidii ay wadatashi uga sameyn lahaayeen maamulkooda.

5/15/2012 6:36 AM EST
Talaado, May 15, 2012 (HOL) — Warsaxaafadeed maanta kasoo baxay taliska AMISOM ee Muqdisho ku sugan ayaa lagu sheegay in Maj. Emannuel Bizimana oo Al-shabaab ay sheegtay inay dileen habeenkii talaadada ahaa uu ka mid ahaa saraakiil 20-kii Oktoobar 2011 lagu dilay dagaal Al-shabaab iyo AMISOM ku dhexmaray degmada Dayniile.

5/15/2012 6:23 AM EST
Talaado, May 15, 2012 (HOL) — Ciidamada Midowga Yurub ee ku sugan xeebaha dalka Soomaaliya oo isticmaalaya diyaaradaha qummaatiga u kaca ee Helicopter-ka loo yaqaan ayaa maanta weeraray saldhig ay burcadbadeeddu ku lahaayeen meel ku dhow degmada Xarardheere ee gobolka Mudug.

5/15/2012 3:06 AM EST
Talaado, May 15, 2012 (HOL) — Madaafiic ayaa xalay lagu weeraray madaxtooyada Soomaaliya, sidoo kalena waxaa isla xalay ka dhacay jidka warshadaha dagaallo u dhexeeyay ciidamada DKMG ah iyo kuwa Al-shabaab.

5/15/2012 3:02 AM EST
Talaado, May 15, 2012 (HOL) — Maamulka Galmudug oo ka mid ah maamullada ka jira Soomaaliya ayaa xaqiijiyay in deegaanno uu ka taliyo ay gaareen xoogag Al-shabaab taabacsan, iyadoo maamulku uu sheegay inuu billaabay howgallo uu kaga hortagayo.