11/15/2018
Today from Hiiraan Online:  _
Wararka Maanta- Talaado, May 15, 2012
Iskahorimaad khasaare geystay oo ciidamada Somaliland iyo dad Shacab ah ku dhexmaray Bariga Magaalada Hargeysa


Talaado, May 15, 2012 (HOL) — Dad shacab ah iyo ciidamada amniga Somaliland ayaa maanta dagaal waqti kooban socday wuxuu ku dhexmaray bariga magaalada Hargeysa, kaasoo sababay khasaare dhimasho iyo dhaawac ah oo soo kala gaartay labada dhinac.

Dagaalkan ayaa waxa uu ka dhashay dad shacab ah oo sheegay inay dhul ay leeyihiin xoog kaga haystaan ciidamadda milatira iyo ciidamadda amniga oo iyana ku doodaya inay dhulku yahay mid dan guud oo xerana u ahayd ciidanKa.

Ilaa hadda si cad looma sheegin khasaaraha dhabta ah inta uu leeg yahay, inkastoo laba dhimasho iyo afar dhaawac ah la soo gaadhsiiyey cisbitaalka guud ee magaaladda Hargeysa oo ka mid ah dadkii shacabka ah sida hawl-wadeenadda cisbitaalku noo xaqiijiyeen,.

Warar kalana waxa ay sheegayaan in dhaawacu intan ka badan yahay balse dadku gaysteen cisbitaalo gaar loo leeyahay, taasina ay keenayso in si dhaba loo ogaado khasaaruhu inta uu leeg yahay.

sidoo kale, ciidamada booliska iyo Milatariga ayaa dhaawac iyo dhimasho ka soo gaadhay rabshadahaasi, waxaana wararka aanu ka helayno ciidamadda amnigu sheegayaan in afar askari halkaasi ku dhinteen, dhaawacanu intaas ka badan yahay, haseyeeshee, dhaawaca iyo dhimashadda waxa la geeyey cisbitaalka ciidamadda milatariga, waxaana ilo u dhow dhowi sheegayaan in afarta askari saddex ka mid ahi yihiin milatariga, halka midna yahay booliska.

Meeshan dagaalku ka dhacay ayaa ah bariga magaaladda Hargeysa oo ah meel ciidanku milatariga leeyihiin, balse dad shacab ahi ku doodayaan in wakhtigii dawladii hore ee Siyaad Bare xoog kagaga qaaday xero ciidanna ka dhigay.

Wasiir ku xigeeenka Amniga Cabdilaahi Abokor Cismaan oo xafiiskiisa warbaahinta kula hadlayey ayaa sheegay in aanay wali kala cadayn khasaaraha dhabta ah ee labadda dhinaca soo kala gaadhay, balse ay jiraan dhimasho iyo dhaawac labadda dhinac ah.

Wasiirku xigeenku waxa uu xusay in dhibaatooyinka ugu badan ee amni darada ka dhaliya somaliland yihiin arrimaha dhulka oo mar kasta la isku qabsado, arrintana uu khasaaruhu ka dhashayna ay tahay arrimahaasi oo ay dad shacab ahi sheegayaan dhul xero milatari ah.

Sidoo kale, Maayarka magaaladda Hargeysa Xuseen Maxamuud Jiciir ayaa isna sheegay in afar qof ka dhinteen dadkii weerarka soo qaaday, saddex kalana askarta ka dhinteen, dad lagu qiyaasay 12 qof oo uu sheegay inay ku eedeysan yihiin dadkii rabshadahan ka dambeeyeyna la xidhay.

Dadkan dhintay ayaa waxa ku jiray haweenay uur leh oo la garan waayey eheladoodda oo aan ku jirin dadka meesha isku haystay, balse la sheegayey in iyadoo meesha maraysa ay qabsaday xabad habow ahi, waxaana la dhigay qolka maydka ee cisbitaalka magaaladda Hargeysa, iyadoo dad badani ku xoonsanayeen si loo garto.

Barkhad-Ladiif M. Cumar, Hiiraan Online
[email protected]
Hargeysa, Somaliland







Click here
5/15/2012 4:11 PM EST
Talaado, May 15, 2012(HOL): Madaxweynaha Soomaaliya Shiikh Shariif Shiikh Axmed ayaa maanta khudbad ka jeediyay Golaha Ammaanka ee Qaramada Midoobay, iyadoo khudbaddiisana ay dhinacyo badan taabaneysay.

5/15/2012 9:38 AM EST
Talaado, May 15, 2012 (HOL) — Munaasabad si heer sare ah oo loosoo agaasimay isla markaana uu soo qaban-qaabiyay urur dhalinyarro oo lagu magacaabo SYAO ayaa maanta lagu qabtay magaalada Beledweyne ee xarunta gobolka Hiiraan.

5/15/2012 9:17 AM EST
Talaado, May 15, 2012 (HOL) — Ururaddii siyaasaddda ee qiimaynta ku hadhay ayaa maanta ku dhowaaqay inay samaysteen dallad xaqoodda u raadisa, kuwaas oo sheegay in aanay wali ku qancin natiijaddii ay guddidda diiwaangelinta ururadda ku dhowaaqeen, isla markaana sheegay inay dadka usoo bandhigayaan cadaalad darooyinka ku dhacay ururadda hadhay.

5/15/2012 8:27 AM EST
Talaado, May 15, 2012 (HOL) — Sakaal ka tirsan ciidamada booliiska Kenya ayaa ku dhintay laba kalena dhaawacyo culus ayaa kasoo gaaray kaddib qarax miino oo maanta lagula eegtay xeryaha qoxootiga Dhadhaab ee dalka Kenya.

5/15/2012 8:10 AM EST
Talaado, May 15, 2012 (HOL) — Munaasabad lagu xusayay maalinta dhallinyarada Soomaaliyeed ee 15-ka May ayaa maanta lagu qabtay magaalada Muqdisho, taasoo ay ka qaybgaleen wasiirro, xildhibaano, qaybaha bulshada iyo dhallinyaro isugu jiray wiilal iyo gabdho.

5/15/2012 6:48 AM EST
Talaado, May 15, 2012 (HOL) — Ergooyinkii Puntland uga qaybgalaysay shirka odayaasha dhaqanka ee Muqdisho ayaa maanta ka dhoofay Muqdisho, iyagoo dib ugu laabtay Garoowe, waxaana afhayeenka odyaashan uu sheegay in sababta ay Puntland ugu laabteen ay tahay sidii ay wadatashi uga sameyn lahaayeen maamulkooda.

5/15/2012 6:36 AM EST
Talaado, May 15, 2012 (HOL) — Warsaxaafadeed maanta kasoo baxay taliska AMISOM ee Muqdisho ku sugan ayaa lagu sheegay in Maj. Emannuel Bizimana oo Al-shabaab ay sheegtay inay dileen habeenkii talaadada ahaa uu ka mid ahaa saraakiil 20-kii Oktoobar 2011 lagu dilay dagaal Al-shabaab iyo AMISOM ku dhexmaray degmada Dayniile.

5/15/2012 6:23 AM EST
Talaado, May 15, 2012 (HOL) — Ciidamada Midowga Yurub ee ku sugan xeebaha dalka Soomaaliya oo isticmaalaya diyaaradaha qummaatiga u kaca ee Helicopter-ka loo yaqaan ayaa maanta weeraray saldhig ay burcadbadeeddu ku lahaayeen meel ku dhow degmada Xarardheere ee gobolka Mudug.

5/15/2012 3:28 AM EST
Talaado, May 15, 2012 (HOL) — Dowladda KMG ah ee Soomaaliya ayaa sheegtay in aysan wax taageero ah oo la taaban karo ka helin beesha caalamka, iyadoo kaddib muddo saddex bilood ah la filayo in looga gudbo marxalada ku-meel-gaarka.

5/15/2012 3:06 AM EST
Talaado, May 15, 2012 (HOL) — Madaafiic ayaa xalay lagu weeraray madaxtooyada Soomaaliya, sidoo kalena waxaa isla xalay ka dhacay jidka warshadaha dagaallo u dhexeeyay ciidamada DKMG ah iyo kuwa Al-shabaab.

5/15/2012 3:02 AM EST
Talaado, May 15, 2012 (HOL) — Maamulka Galmudug oo ka mid ah maamullada ka jira Soomaaliya ayaa xaqiijiyay in deegaanno uu ka taliyo ay gaareen xoogag Al-shabaab taabacsan, iyadoo maamulku uu sheegay inuu billaabay howgallo uu kaga hortagayo.