9/26/2018
Today from Hiiraan Online:  _
Wararka Maanta- Talaado, May 15, 2012
AMISOM oo sheegtay in Sarkaalka Ciidamada Burundi ee Al-shabaab ay soo bandhigtay la dilay Bishii Oktoobar ee Sannadkii Hore



Talaado, May 15, 2012 (HOL) — Warsaxaafadeed maanta kasoo baxay taliska AMISOM ee Muqdisho ku sugan ayaa lagu sheegay in Maj. Emannuel Bizimana oo Al-shabaab ay sheegtay inay dileen habeenkii talaadada ahaa uu ka mid ahaa saraakiil 20-kii Oktoobar 2011 lagu dilay dagaal Al-shabaab iyo AMISOM ku dhexmaray degmada Dayniile.

Xarakada Al-shabaab ayaa warbixin ay shalay soo dhigeen boggooda Twitter waxay ku sheegeen inay dileen sarkaalkii hoggaaminayay ciidamadooda ay xoogagoodu ku dileen howgal ay habeenkii talaadada ahaa ee lasoo dhaafay ka sameeyeen Dayniile.

"Maj. Emannuel Bizimana waxaa la dilay 20-kii Oktoobar 2011, xilligaasoo ay ciidamada Burundi howlgal ka sameynayeen degmada Dayniile," ayaa lagu yiri warka kasoo baxay AMISOM. Iyagoo sheegay in hadalkan uu yahay mid ay Al-shabaab ku doonayso inay cabsi ku geliso shacabka Muqdsiho.

Ciidamada Burundi ayaa bishii Oktoobar waxaa looga dilay degmada Dayniile in ka badan 70-askari, kuwaasoo Al-shabaab ay kusoo bandhigeen duleedka Muqdisho, inkastoo ay AMISOM iyo dowladda KMG ah inkireen in askar tiradaas le'eg laga dilay.

Dhanka kale, AMISOM waxay sheegtay in mid ka mid ah gadiidkooda uu shil ku galay deegaanka Nuur-Aduunyo ee degmada Dharkeynley kaasoo aan dhalin sida ay xuseen wax khasaare nafeed ah.

Taliska AMISOM waxay sheegeen in shirkaas uu ahaa mid dhacay kaddib markii ay cilladi ku timid gaariga shilka galay, waxaana taliyaha ugu sarreeya AMISOM uu sheegay inay ka taxadarayaan shilalka noocan oo kale si loo ilaaliyo ammaanka shacabka.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/15/2012 4:11 PM EST
Talaado, May 15, 2012(HOL): Madaxweynaha Soomaaliya Shiikh Shariif Shiikh Axmed ayaa maanta khudbad ka jeediyay Golaha Ammaanka ee Qaramada Midoobay, iyadoo khudbaddiisana ay dhinacyo badan taabaneysay.

5/15/2012 9:38 AM EST
Talaado, May 15, 2012 (HOL) — Munaasabad si heer sare ah oo loosoo agaasimay isla markaana uu soo qaban-qaabiyay urur dhalinyarro oo lagu magacaabo SYAO ayaa maanta lagu qabtay magaalada Beledweyne ee xarunta gobolka Hiiraan.

5/15/2012 9:17 AM EST
Talaado, May 15, 2012 (HOL) — Ururaddii siyaasaddda ee qiimaynta ku hadhay ayaa maanta ku dhowaaqay inay samaysteen dallad xaqoodda u raadisa, kuwaas oo sheegay in aanay wali ku qancin natiijaddii ay guddidda diiwaangelinta ururadda ku dhowaaqeen, isla markaana sheegay inay dadka usoo bandhigayaan cadaalad darooyinka ku dhacay ururadda hadhay.

5/15/2012 8:27 AM EST
Talaado, May 15, 2012 (HOL) — Sakaal ka tirsan ciidamada booliiska Kenya ayaa ku dhintay laba kalena dhaawacyo culus ayaa kasoo gaaray kaddib qarax miino oo maanta lagula eegtay xeryaha qoxootiga Dhadhaab ee dalka Kenya.

5/15/2012 8:10 AM EST
Talaado, May 15, 2012 (HOL) — Munaasabad lagu xusayay maalinta dhallinyarada Soomaaliyeed ee 15-ka May ayaa maanta lagu qabtay magaalada Muqdisho, taasoo ay ka qaybgaleen wasiirro, xildhibaano, qaybaha bulshada iyo dhallinyaro isugu jiray wiilal iyo gabdho.

5/15/2012 7:42 AM EST
Talaado, May 15, 2012 (HOL) — Dad shacab ah iyo ciidamada amniga Somaliland ayaa maanta dagaal waqti kooban socday wuxuu ku dhexmaray bariga magaalada Hargeysa, kaasoo sababay khasaare dhimasho iyo dhaawac ah oo soo kala gaartay labada dhinac.

5/15/2012 6:48 AM EST
Talaado, May 15, 2012 (HOL) — Ergooyinkii Puntland uga qaybgalaysay shirka odayaasha dhaqanka ee Muqdisho ayaa maanta ka dhoofay Muqdisho, iyagoo dib ugu laabtay Garoowe, waxaana afhayeenka odyaashan uu sheegay in sababta ay Puntland ugu laabteen ay tahay sidii ay wadatashi uga sameyn lahaayeen maamulkooda.

5/15/2012 6:23 AM EST
Talaado, May 15, 2012 (HOL) — Ciidamada Midowga Yurub ee ku sugan xeebaha dalka Soomaaliya oo isticmaalaya diyaaradaha qummaatiga u kaca ee Helicopter-ka loo yaqaan ayaa maanta weeraray saldhig ay burcadbadeeddu ku lahaayeen meel ku dhow degmada Xarardheere ee gobolka Mudug.

5/15/2012 3:28 AM EST
Talaado, May 15, 2012 (HOL) — Dowladda KMG ah ee Soomaaliya ayaa sheegtay in aysan wax taageero ah oo la taaban karo ka helin beesha caalamka, iyadoo kaddib muddo saddex bilood ah la filayo in looga gudbo marxalada ku-meel-gaarka.

5/15/2012 3:06 AM EST
Talaado, May 15, 2012 (HOL) — Madaafiic ayaa xalay lagu weeraray madaxtooyada Soomaaliya, sidoo kalena waxaa isla xalay ka dhacay jidka warshadaha dagaallo u dhexeeyay ciidamada DKMG ah iyo kuwa Al-shabaab.

5/15/2012 3:02 AM EST
Talaado, May 15, 2012 (HOL) — Maamulka Galmudug oo ka mid ah maamullada ka jira Soomaaliya ayaa xaqiijiyay in deegaanno uu ka taliyo ay gaareen xoogag Al-shabaab taabacsan, iyadoo maamulku uu sheegay inuu billaabay howgallo uu kaga hortagayo.