Arbaco, September 30, 2009(HOL): Maamulka Naadiga Ardayda Soomaaliyeed ee Waddanka Masar ayaa waxay caawa ku qabteen Xaflad qalin jabin ah oo aad u ballaaran Xarunta Jaamacada Al-azhar ee Magaalada Qaahira.
Xafladdaas ayaa waxaa ka soo qayb galeen Mas’uuliyiin iyo Dadweyne aad u fara badan oo deggan Waddanka Masar, waxaana halkaas lagu guddonsiiyay Ardayda qalin-jebisay Shahaaddooyin kuwaasi oo ay tiradoodu ahayd 52 arday oo ka kala socday Jaamacadaha Al-azhar iyo Cairo University,
Ardaydaas ayaa waxay ka qalin jebiyeen oo ay barteen Cilmiyada (Social Work, Law, Commerce, Islamic Religion, Computer science, Engineering, Agriculture iyo takhasusyo kale.
Waxaa kaloo halkaasi lagu guddonsiiyay shahaaddooyin dhallinyaradii ku guuleystay Tartankii quraanka kariimka ee bishii Ramadaanka iyo dhallinyaradii sida weyn wax uga qabtay Jaaliyadda Soomaaliyeed ee Waddanka Masar.
Xafladdaasi oo uu naadigu si weyn u soo diyaariyay waxaa qudbooyin tusaale iyo guubaabo leh ka jeediyay dhammaan Mas’uuliyiintii ka soo qaybgalay Xafladdaas.
Maxamed Cabdi
[email protected]
Cairo, Egypt