Mudanayaasha Baarlamaanka Soomaaliya oo isku raacay in la ballaariyo Baarlamaanka Soomaaliya

Guddoonka Baarlamaanka -Photo by: Maxamed Allman

Axad, January 25, 2009(HOL):  Baarlamaanka Federalka Soomaaliya ayaa wuxuu maanta cod aqlabiyad leh ku ansixiyay in la ballaariyo baarlamaanka, isla markaana lagu soo daro Xildhibaananada ka socda Isbaheysiga Dib u xoreynta Soomaaliya.
 
Kulan ay maanta ku yeesheen Mudanayaasha Baarlamaanka Guriga Umadda ee Jibouti ayaa 220 Mudane oo ka qeybgashay waxay 211 Mudane oo ka mid ah ay u codeeyeen in Baarlamaanka la ballaariyo, halka 6 mudane ay diideen, 3 mudane oo kalena ay ka aamuseen.
 
Intii aanu kulankaas furmin ayaa waxaa mudanayaasha Baarlamaanka la hadlay Ergayga Dowladda Jibouti u qaabilsan Wada hadallada Soomaalida, ahna Wasiirka Diinta iyo Awqaafta Md. Xaamid Cabdi Suldaan, wuxuuna u sheegay Mudanayaasha Baarlamaaka Soomaaliya in looga fadhiyo in ay Baarlamaanka ballaariyaan.
 

Mudanayaasha Baarlamaanka-Photo by: Maxamed Allman

“Walaalayaal waqtiga ha dheereynina, waxaan meteleysaan masiir Umadeed, sidaas darteed ansixiya in baarlamaanka la ballaariyo oo lagu soo daro mucaaradka Dowladda ka soo horjeeda”ayuu yiri Xaamid Cabdi Suldaan.
 
Maanta gelinka dambe ayaa la filayaa in ay Mudanayaasha Baarlamaanka Soomaaliya kulan kale isugu yimaadaan, isla markaana ay ka doodaan in waqti lagu daro mudadii doorashada madaxweynaha oo aad u soo dhawaatay, waxaana la sheegayaa in lagu dari doono todobaad ama toban maalmood.

Salaad Iidow Xasan (Xiis), Hiiraan Online
[email protected]
Mogadishu, Somalia