Maamulka Degmada Boosaaso oo sheegay in Xoriyaddiisa u dib u heli doono Nin Ajnabi ah oo lagu af-duubtay Gobolka Bari

Isniin, February 23, 2009(HOL): Maamulka Degmada Boosaaso ee Gobolka Bari ayaa wada dadaallo lagu sii deynayo nin u dhashay dalka Pakistan, kaasi oo maalintii shalay ahayd lagu af-duubtay degmada Laag oo ka tirsan gobolka bari.
 
Taliye ku xigeenka Ciidanka Booliska DGPL Maxamed Siciid Jaqanaf oo maanta saxaafadda la hadlay ayaa sheegay in ciidamo faro badan loo diray buuraha tuulada Gal Gala halkaasoo la sheegay in ninkaasi lagu haysto maalintii labaad.
 
Maxamed Siciid Jaqanaf Taliye ku xigeenka Ciidanka Poliska DGPL ayaa intaasi ku daray in laga yaabo in dib uu xoriyaddiisa uu u helo ninka ajnabiga ah,isagoo ka gaabsaday in uu ka hadlo hadii ay jiraan wax madax furasho oo ay dalbadeen kooxaha wax afduubtay.
 
Sidoo kale Guddoomiyaha Gobolka Bari Muuse Geele Faroole ayaa isna sheegay in la garanayo dadka afduubka geystay,waxaana xiligii uu afduubka dhacayay la socday ajnabiga nin Soomaali ah oo u dhashay degmada Boosaaso
 
Ugu danbayntii kooxaha afduubtay ninkaasi ajnabiga ah ayaa laga sugayaa waqtiyada soo socda in ay soo sii daayaan ninkaas xili afduubkaasi ay cambaareeyeen hayadaha samafalka ee ka hawl gala DGPL.
 
Faysal Maxamed Xasan(Boston ), Hiiraan Online
[email protected]
Bosaaso,Somalia