Axad,
Dr. Cumar Colaad oo ka qeybgelayay Dood ku saabsaneyd sicir bararka ka taagan Dalka Soomaaliya iyo wixii keenay taasi oo ay qaban qaabisay Idaacadda Horn Afrik ee Magaalada Muqdisho ayaa wuxuu sheegay in saldhigasho la’aanta sicirka raashinka iyo weliba safirka lacagaha qalaad ay yimaadeen markii ay dalka soo galeen makiinado lagu daabaco lacagta shillin Soomaaliga, kadibna si qorshe la’aan ah suuqyada dalka loo geliyay.
Dr. Cumar Colaad waxaa uu sheegay in muddo sanad ah uu cirka isku sii shareerayo qiimaha raashinka quutul-daruuriga ah ee ay dadka u baahan yihiin, kaasi oo ay ganacsatada ka baayac mushtarta ku jaan-gooyaan sarifka doollarka oo haatan qudhiisa sare u sii kacaya.
Haddaba aan eegno is-bar bar dhigga uu Dr. Cumar Colaad ku sameeyay farqiga u dhaxeeyay qiimaha la kala siisto raashinka quutul-daruuriga ah muddo sanad ah laga soo bilaabo Janaayo 2007 ilaa Janaayo 2008
|
JANAAYO 2007 |
Qiimaha uu joogay |
JANAAYO 2008 |
Qiimaha uu joogo |
|
Loor Sokor ah |
200,000 |
Loor Sokor ah |
650,000 |
|
Loor Bur ah |
200,000 |
Loor Bur ah |
650,000 |
|
Loor Bariis ah |
250,000 |
Loor Bariis ah |
700,000 |
|
Kartoon Baasto ah |
070,000 |
Kartoon Baasto ah |
240,000 |
|
Saliid Cad 10 Ltr |
300,000 |
Saliid Cad 10 Ltr |
540,000 |
|
Gasac Caano ah (2.500kg) |
200,000 |
Gasac Caano ah (2.500kg) |
440,000 |
Intaas marka laga soo tago qiimaha sarifka Doollarka ayuu sheegay Dr. Cumar Colaad inuu marayo heerkii ugu sareeyay oo ah 2.275,000 Sh. So, iyadoo bishii Janaayo 2007 uu qiimahiisa intan ka hooseeyay. Qiimo kororka ku yimid Qiimaha sarifka Doollarka ayaa qudhiisa wuxuu salka ku hayaa lacagta shillin Soomaaliga ah ee lagu sameeyo gudaha Soomaaliya, taasi oo ay dadka si weyn uga cabanayaan, gaar ahaan kuwa danta yar ee nolol maalmeedka la dagaalama.
Si kastaba arrintu ha ahaatee, sicir bararka ka taagan Soomaaliya ayaa wuxuu ku soo beegmayaa iyadoo dad badan oo ku noolaa hooska guryahooda xitaa haddii aysan helin wax ay cunaan ay haatan daadsan yihiin inta u dhaxeysa Magaalooyinka Muqdisho iyo Afgooye iyagoo weliba ku nool heer ka sii hooseeya saboolnimo, iyadoo ay xusid mudan tahay in dadkaasi ay u badan yihiin Dumar, Caruur iyo Dad Waayeello ah oo la ogyahay in ay yihiin kuwa bulshada ugu nugul oo aan duruufaha ah u adkeysan karin.
Salaad Iidow Xasan (Xiis), Hiiraan Online