2014-07-23
Today from Hiiraan Online:  _
Wararka Maanta- Talaado, Jan 22, 2013
Madaxweyne ku-xigeenkii hore ee Puntland Xasan Daahir Afqurac oo xalay ku Geeriyoodey Magaalada Nairobi


Talaado, Jannaayo 22, 2013 (HOL) — Waxaa xalay Isbitaal ku yaalla magaalada Nairobi ee xarunta dalka Kenya ku geeriyoodey AHN madaxweyne ku-xigeenkii hore ee Puntland Xasan Daahir Maxamuud Af-qurac. Marxuumka ayaa u geeriyoodey xanuun uu la jiifey 6-dii bilood ee ugu dambeysey.

Geerida Xasan Daahir waxaa ka tacsiyeeyey madaxda ugu sareysa Puntland sida madaxweyne Cabdiraxmaan Faroole, ku-xigeenkiisa Gen. Cabdisamed Cali Shire iyo gudoomiyaha golaha wakiilada Cabdirashiid Maxamed Xirsi.

Madaxweyne Faroole oo isagu xiligan booqasho ku jooga dalka Jabuuti, islamarkaana si kooban ula hadlay warbaahinta maxalliga ah ayaa ka tacsiyeeyey geerida AHN Xasan Daahir Maxamuud Af-qurac.

"Waxaa saaka nasoo gaartay in uu Nirobi ku geeriyoodey madaxweyne ku-xigeenkii hore Xasan Daahir, alle ha u naxariisto, waxan anigoo ku hadlaya magaca dowladda iyo shacabka Puntland halkan tacsi uga dirayaa ehelkii uu ka geeriyoodey" Madaxweyne Faroole ayaa yiri.

Madaxweyne ku-xigeenka Puntland Cabdisamed Cali Shire oo isna maanta shir-saxaafadeed ku qabtay magaalada Garoowe ayaa tacsi u diray umadda Puntland, gaar ahaan qoyski iyo qaraabadii uu ifka kaga tegey mudane Af-qurac.

Wuxuuna ilaah uga baryey in uu samir iyo iimaan ka siiyo isagana uu naxaristiia janno ka waraabiyo " waxaan tacsi u dirayaa umadda Puntland, gaar ahaan eheladii yo qaraabadii uu ka tegey, waxay leeyahay samir iyo iimaan alle haka siiyo isagana naxariistiisa janno haka waraabiyo"

Xasan Daahir Maxamuud Af-qurac wuxuu madaxweyne ku-xigeen kasoo noqday xukuumaddii ka horeysey midda xiligan Puntland ka arimisa ee uu hogaaminayey madaxweyne Maxamuud Muuse Xirsi (Cadde-Muuse).

Wuxuu sidoo kale muddo 6-sano ah xubin ka ahaa golaha wakiilada ee Puntland isagoo la tilmaamo inuu kamid ahaa xubnaha ugu firfircoon, islamarkaana uu ahaa nin deggen oo nabadda jecel.

Maxamed Salaad Xaaji Dirir, Hiiraan Online
xaajidirir@hiiraan.com
Puntland, Soomaaliya





Post your comments

2013-01-22 1:33 PM EST
Talaado, January 22, 2013(HOL): Kooxaha Kubadda Kolayga dalalka Soomaaliya iyo Kenya oo dalka Tanzania ayaa uga qeybgelaya tartanka Fiba Zone V ayaa ciyaar labada kooxood maanta dhexmartay waxaa ku adkaaday xulka Kubadda Kolayga dalka Soomaaliya.

2013-01-22 12:47 PM EST
Talaado, Jannaayo 22, 2013 (HOL) — Guddoomiyaha maamulka KMG ah ee magaalada Kismaayo, ahna guddoomiyaha kooxda Raaskambooni, Sheekh Axmed Maxamed Islaam (Madoobe) ayaa sheegay in la joogo xilligii maamul loo sameyn lahaa gobollada Jubbooyinka.

2013-01-22 12:19 PM EST
Talaado, Jannaayo 22, 2013 (HOL) — Isku-day ciidamada dalka Eritrea ay ku doonayeen inay ku afgambiyaan madaxweynaha dalkaas, Isaisa Efwerki ayaa la sheegay inuu fashilmay, kaddib markii ciidamada dowladda ay la wareegeen shalay xarunta wasaaradda warfaafinta.

2013-01-22 11:43 AM EST
Talaado, Jannaayo 22, 2013 (HOL) — Ra’iisal wasaaraha Soomaaliya, Cabdi Faarax Shirdoon (Saacid) ayaa maanta xafiiskiisa ku qaabilay wakiilka xoghayaha guud ee Qaramada Midoobay u qaabilsan arrimaha Soomaaliya danjie Augustine Phillip Mahiga.

2013-01-22 7:17 AM EST
Talaado, Jannaayo 22, 2013 (HOL) — Maxkamadda darajada koowaad ee ciiidamada qalabka sida ee dowladda Somalia ayaa maanta xukunno isugu jira dil iyo xabsi ku ridday askar ka tirsan ciidamada dowladda oo ku kala eedeysnaa dil iyo dhibaato ay shacabka u geysteen.

2013-01-22 7:14 AM EST
Talaado, Jannaayo 22, 2013 (HOL) — Jaamacadda Bariga Afrika faraceeda Buuhoodle ayaa imtixaankii ugu horreeyay u soo gabagabeysay ardayda wax ka dhigta, kuwaasoo tiradoodu ay ka badan boqol arday.

2013-01-22 6:21 AM EST
Talaado, Jannaayo 22, 2013 (HOL) — Xildhibaan Cabdiraxmaan Maxamed Jaamac ( Cabdiraxmaan Xoog) oo ka mid ah golaha Wakiiladda Somaliland, ayaa sheegay in aanu la shaqayn dawladda Soomaaliya, balse ay jirtay inuu wasiirka Arrimaha dibadda Soomaaliya Foosiya Yuusuf uu madaarka Berbera kula kulmay sifiican usoo dhoweeyey.

2013-01-22 4:55 AM EST
Talaado, Jannaayo 22, 2013 (HOL) —Madaxweeyne Dalka Mareykanka Brack Obama ayaa xalay markale loo caleemo saaray xilka madaxtinimo ee dalka Mareeykanka, iyadoona xafladda caleemo-saarka ay kasoo qeybgaleen kumaannaan qof oo u dhalatay dalkaasi.

2013-01-22 3:03 AM EST
Talaado, Jannaayo 22, 2013 (HOL) — Hay’adda qoxootiga adduunka ee UNHCR ayaa sheegtay inay dowladda Kenya ka ogolaatay inay joojiso in qoxootiga ay si khasab ah uga saarto magaalooyinka waaweyn ee dalka Kenya.

2013-01-22 2:58 AM EST
Talaado, Jannaayo 22, 2013 (HOL) — Nin waxyaabaha qarxa ay ku xiran yihiin ayaa xalay ku qarxay degmada Jowhar ee xarunta gobolka Shabeellada dhexe, iyadoo qaraxaas uusan geysan wax khasaare nafeed ah oo dhaafsiisan ninkii qarxay.