Jubbaland oo ku gacanseyrtay Warkii ka soo baxay Wasaaradda Arrimaha Gudaha Dowladda Federaalka
Isniin, October, 07, 2019 (HOL)- Maamulka Jubbaland ayaa jawaab adag ka bixiyay qoraal xalay ka soo baxay Wasaaradda Arrimaha Gudaha Dowladda Federaalka Soomaaliya oo lagu sheegay in Dowladda qorshe cusub u diyaarisay soo xulista iyo doorashada madaxweynaha Jubbaland loo dhan yahay.
Wasiirka Wasaaraadda Warfaafinta
Jubbaland Eng Cabdi Xusseen Sheekh Maxamed oo la hadlay BBC ayaa sheegay in ay
u arkaan qoraalka ka soo baxay Wasaaradda Arrimaha Gudaha arin sharciga
baalmarsan oo dhinaca kale la oran karo waa nasiib darro kale oo u soo hooyatay
umadda Sooomaaliyeed.
‘’Annaga Qoraalkaasi waxaa u
aragnaa qeyb ka mid ah hab dhaqankoodii hore oo ay ku cadaadinayeen bulshada ku
dhaqan deegaannada [Jubbaland] waana ogtihiin doorashadii halkan ka dhacday ee
lagu soo doortay madaxweyne Axmed Madoobe Wasaaradda Arrimaha Guduhu wax raad
ah kuma laheyn, sidaa daraadeed ma jirto sabab ay hadda u soo fara-galiso’’
ayuu yiri Wasiirka.
Wasiirka ayaa intaa ku daray in
dowladda si ku tala-gal ah u baalmareyso sharciga iyo Dastuurka dalka u yaala
isaga oo yiri’’ Dadka Soomaaliyeed cid aan waxba akhrin karin wey yar tahay,
sidaa daraadeed waxaa loo baahan yahay in dadku arkeen waxa uu Dastuurku
dhigayo iyo in ay is waafaqsan yihiin tallaabooyinkan ay dowladdu qaadeyso’’
waxaana uu intaa ku daray in dadka reer Jubbaland leeyihiin maamul ay soo
doorteen oo cidna is hortaagi karin.
Dowladda Soomaaliya ayaa sheegtay
in ay qorshey-neyso dhismaha maamul
cusub oo ay heshiis ku wada yihiin dadka degga deegaannada Jubbaland.
C/raxmaan Diini, Hiiraan Online
[email protected]
