Khamiis, Maarso, 21, 2019
(HOL)- Bandhig aqooneed socday muddo saddex cisho ah ayaa lagu soo gebagebeeyey
xarunta kambaska Dr. Shahiid ee Jaamacadda Benaadir oo ku yaalla degaanka km-13
ee duleedka magaalada Muqdisho.
Waxaa bandhigan ka
faa'iideystay arday ka badan 3,000 kun oo sanadkan dhameystay dugsiyada Sare ee
gobolka Banaadir, iyadoo bandhigan ujeedadiisu aheyd sidii ardaydu u kala xulan
lahaayeen kuliyadaha ku haboon, una heli lahaayeen macluumaad la xiriira tayada
waxbarasho iyo qalabka ay leedahay Jaamacadda.
Munaasabada xiritaanka
bandhigan oo lagu qabtay xarunta Jaamacada ee Km-13 ayaa waxaa ka qeyb galay
arday, waalidiin xubno ka tirsan Maamulada Jimciyadaha iyo dugsiyadaha
Muqdisho, Masuuliyiinta, Mu'asasada iyo hormuudyada Jaamacada Benaadir qaarkood
iyo xubno kale.
Gudoomiye ku-xigeenka dhinaca
Waxbarashada ee Jaamacadda Benaadir Khaliif Muuse Warsame oo ka hadlay
Munaasabada ayaa ka waramay muhimada uu leeyahay barmaamijkan iyo qaabka looga
soo shaqeeyey, isagoo xusay in maamulka iyo mu'asasada Jaamacada ay mar kasta
yihiin kuwo waxqabadkooda ku dabaqa horumarinta waxbarashada.
Hormuudka Kuliyadda beeraha ee
Jaamacadda Benaadir Maxamed Shiikh Cabdi oo isna munaasabadan ka hadlay ayaa ka
waramay Sooyaalka Jaamacada, xiligii la aasaasay, marxaladaha ay soo martay,
qeybaha ay ka kooban tahay, guulaha ay gaartay mudadii ay jirtay iyo waxyaabaha
ay higsaneyso mustaqbalka dhow.
Guddoomiye ku-xigeenka
Mu'asasada Banaadir C/risaaq Xasan Cali oo isna ka hadlay Munaasabada ayaa
sheegay in jaamacadu ay qabatay bandhigan iyadoo ka duuleysa baahida ardayda
dhameysata dugsiyada sare u qabaan iney helaan xog ku saabsan tayada Jaamacadda
ay ku biiri lahaayeen, isagoo xusay in ardayda ka qeyb qaadatay ay wax badan ka
korosadeen.
Guddoomiyaha Jaamacadda
Benaadir Dr. Maxamed Max'uud Biday oo gebagebadii Munaasabada ka hadlay ayaa
sheegay iney ku guuleysteen hadafkii laga lahaa bandhiga ay qabatay Jaamacada,
isagoo xusay kumanaan ka tirsan ardayda dhameysatay dugsiyada sare ee dalka ay
haatan xog ka heystaan xog ku aadan tayada tacliinta taalla jaamacada, ayna
iyagu leeyihiin go'aanka ugu dambeeya.
"Waxaan aad ugu mahad
celinayaa Mu'asasada Banaadir, guddiyada ardayda Jaamacadda iyo hormuudyada
kaalinta weyn ka geystay taabagalka bandhigan iyo dhamaan ardayda iyo maamulada
dugsiyada ka qeyb qaatay, waxaana balan-qaadaynaa inaan mustaqbalka sii xoojino
barnaamijyada noocan ah" ayuu yiri Dr. Biday oo dhinaca kale ku dheeraaday
waxqabadka jaamacada mudadii ay jirtay.
Gudoomiyaha jaamacada ka hor
waxaa munaasabada hadalo qiimo badan ka jeediyey masuuliyiin ka socotay
dalladaha Waxbarashada ee SOFE iyo FPENS, qaar ka mid ah maamulada iskuulada ka
qeyb qaatay bandhigan, Waalidiin, Macalimiin iyo xubno kale oo Jaamacada
Benaadir ku amaanay dedaalka aan kala joogsiga laheyn ee ay ugu jirto
horumarinta tacliinta sare, iyagoo ku booriyey iney soo xoojiso, waxayna
munaabaddaas ku dhamaatay jawi aad u farxad badan.
C/raxmaan Diini,
Hiiraan Online
[email protected]
