7/22/2019
Today from Hiiraan Online:  _
Wararka Maanta- Arbaco, Jun 12, 2019
Baaritaan lagu sameynayo habka uu u dhacay dilka taliyihii Booliiska gobolka Hiiraan


 

Arbaco, June, 12, 2019 (HOL) – Waxaa soconaya baaritaan la xiriira habka uu u dhacay dilka taliyihii Booliiska gobolka Hiiraan Maxamed Macow Xalane oo ku dhintay iska horimaad ka dhacay deegaanka Kala-Beyr ee gobolka Hiiraan.

Col Cali Dhuux Cabdi Mahad Alla oo horay u soo noqday taliyaha Booliiska degmada Beleweyne ayaa sheegay in ay wadaan baaritaan la xiriira dilka taliyaha, hasse ahaatee waxa uu dhinaca kale sheegay in si hor dhac ah ay u ogaadeen in taliyaha iyo ku-xigeenkiisa si toos ah loo toogtay iyaga oo aan wax rasaas ah ridin.

‘’Waxa aan ognahay ilaa iyo hadda waa in taliyaha iyo ku-xigeenkiisa si toos ah loo bartilmaameesaday iyadoo aysan wax xabad ah ridin ciidamadii la socday, arintaasina waxa ay aheyd xad gudub iyo qalad weyn oo la galay’’ ayuu yiri Col Cali Dhuux.

Laakiin waxaa uu sheegay in baaritaanku intaa ka badan yahay oo wali la raadinayo macluumaad la xiriira sida falku u dhacay.

‘’Dabcan marka goob lagu dagaalamo warar kala duwan ayaa ka soo baxay, wali baaritaanku waa uu socdaa, marka macluumaadka oo dhan la helo ayaan soo bandhigi doonnaa’’ ayuu hadalkiisa sii raaciyay.

Taliyaha dhintay ayaa dhawaan loo dalacsiiyay xilka qeybta Booliiska gobolka Hiiraan isaga oo horay u ahaa taliyaha saldhiga Booliiska magaalada Beledweyne.

C/raxmaan Diini, Hiiraan Online
[email protected]  
 
 










Click here
6/12/2019 4:51 PM EST
Arbaco, June, 12, 2019 (HOL) – Madaxweynaha dowlad gobolleedka Hirshabeelle Maxamed Cabdi Waare oo galabnimadii maanta gaaray magaalada Beledweyne iyo guddoomiyaha cusub ee maamulka gobolka Hiiraan Cali Maxamed Caraale ayaa goor dhaw [Caawa] si wada jir ah warbaahinta ula hadlay iyaga oo ku sugan xarunta maamulka gobolka Hiiraan.

6/12/2019 3:57 PM EST
Arbaco, June, 12, 2019 (HOL)- Ra’iisul Wasaaraha xukuumadda federaalka ee Soomaaliya, Xasan Cali Khayre ayaa Xerada Tababarka Jen. Gordan Ku booqday ciidamo ka tirsan Xoogga dalka oo loo diyaarinayo howl-gallo ay argagaxisada uga xoraynayaan deegaannada ay uga dhuumaalaysanayaan dalka.

6/12/2019 12:50 PM EST
Arbaco, June, 12, 2019 (HOL) - Khilaaf ayaa ka taagan sida loo buuxinayo booskii uu ka geeriyooday Xildhibaan Cali Aaareeyo oo ka tirsana golaha Wakiiladda Somaliland.

6/12/2019 12:24 PM EST
Arbaco, June, 12, 2019 (HOL) Madaxweynaha Soomaaliya Maxamed Cabdullaahi Farmaajo ayaa Madaxtooyada Qaranka munaasabad dhiirrigelin iyo maamuus ah ugu sameeyey Orodyahanno Soomaaliyeed oo billado ka soo hooyay tartanno heer Gobol iyo heer Caalami ah oo la qabtay bilowga sanadkan.

6/12/2019 12:21 PM EST
Arbaco, June, 12, 2019 (HOL)-Madaxweynaha dowlad gobolleedka Hirshabeelle Maxamed Cabdi Waare ayaa galabnimadii maanta ka degay magaalada Beledweyne ee xarunta gobolka Hiiraan.

6/12/2019 6:00 AM EST
Arbaco, June, 12, 2019 (HOL) – Taliyaha Ciidammada Asluubta Soomaaliyeed, Bashiir Maxamed Jaamac Goobe ayaa sheegay in maxkamadda ciidammada qalabka sida lagu wareejiyay baaritaan uu guddi uu magacaabay madaxweyne Farmaajo ay ka sameeyeen iska hor imaad billowgii bishan ka dhacay degmada Xamar weyne ee gobolka Banaadir.

6/12/2019 3:41 AM EST
Arbaco, June, 12, 2019 (HOL) – Maraykanka ayaa Talaadadii sheegay in ay sii wadi doonaan howlgallada amniga ee lagu taageerayo xasillinta Soomaaliya iyo dagaalka al-Shabaab.

6/12/2019 3:16 AM EST
Arbaco, June, 12, 2019 (HOL) – Ilmo shan jir ah oo qaba cudurka Ebola ayaa laga helay gudaha dalka Uganda, sida ay xaqiijisay hay'adda caafimaadka adduunka ee WHO.

6/12/2019 2:59 AM EST
Arbaco, June, 12, 2019 (HOL) – Madaxweyne ku-xigeenka Puntland,Axmed Cilmi Cismaan Karaash ayaa booqashadii u horreysay ku tagay deegaanka Af Urur ee gobolka Bari, halkaa oo labadii toddobaad ee u dambeysay ay maamullayeen ururka al-Shabaab.

6/12/2019 2:05 AM EST
Arbaco, June, 12, 2019 (HOL) –Wasaaradda Amniga Xukuumadda Soomaaliya ayaa War ka soo saartay iska horimaad shalay ka dhacay deegaanka Kalabeyr ee Gobolka Hiiraan,kaas oo uu ku geeriyooday Taliyihii qeybta Booliska Gobolka Hiiraan Gaashaanle Dhexe Maxamed Macow Xalane.

6/12/2019 1:30 AM EST
Arbaco, June, 12, 2019 (HOL) – Waxaa isa soo taranaya baaqyo kala duwan oo loo jeedinayo dhinacyada isku haya siyaasadda gobolka Hiiraan, gaar ahaan guddoomiyihii hore ee gobolka Yuusuf Axmed Hagar Daba-geed oo wali ku adkeysanaya in uu yahay gudoomiyaha gobolka kaddib markii wareegto ka soo baxday madaxweynaha Hirshabeelle xilkii looga qaaday.