Axad, Feberaayo, 24, 2019 (HOL)-Taliska Booliiska Soomaaliyeed ayaa faah faahin dheeraad ah ka bixiyay dilkii shalay galinii danbe degmada Kaaraan loogu geystay xildhibaan Cismaan Cilmi Boqorre.
newsinside Jenaraal C/llaahi Xasan Bariise oo ah taliyaha Hoggaanka Canshuuraha ee ciidamada Booliska ahna madaxa Warfaafinta ee booliska oo shir jaraa’id xalay ku qabtay magaalada Muqdisho ayaa sheegay in ay sameeyeen howlgal lagu baadi goobayo soo qabashada Kooxihii dilka geystay.
Waxaa uu sheegay in ciidamada booliska ay gacanta ku soo dhigeen gaari ay tuhunsan yihiin inuu yahay midkii ay wateen ragga dilka geystay, sidoo kale howlgalka ayuu tilmaamay iney ku soo qabteen laba qof oo mid uu ahaa darawalka gaariga la soo qbatay.
Wuxuu sheegay in ay xabsiga dhigeen eedeysanayaasha la hayo, iyagoo filaya inay bixiyaan xog horseedi karta in cadaalladda la horkeeno kooxdii dishay marxuum Boqore.
Marxuumka la dilay oo ahaa Xildhibaanka ugu da’da weyn golaha Shacabka ee baarlmaanka Soomalaiya, waxaa uu soo noqday guddoomiye ku-xigeenkii Baarlamaankii KMG.
C/raxmaan Diini,
Hiiraan Online
[email protected]