Khamiis, September, 06, 2018 (HOL) – Guddoomiyaha
degmada Xamar –Weyne Cumar Shariif Maye ayaa lagu soo oogayaa dacwad ka dhan ah
in uu gafay Booliiska Soomaaliyeed iyo xukuumadda uu madaxda ka yahay ra’iisal
wasaare Xassan Cali Kheyre.
War-qad uu ku saxiixan yahay ku-simaha
guddoomiyaha gobolka Banaadir Xusseen Maxamed Nuur ayaa shaqada looga joojiyay
Shariif Maye, oo galinkii danbe ee shaleyna su’aalo lagu weydiiyay xarunta CID.
Guddoomiyaha shaqo joojinta lagu sameeyay ayaa ku
eedeysan in uu "si bareer ah uga been sheegay booliska Qaranka, kuna
tilmaamay in aan lagu aamini karin amniga dalka, ayna iyagu keenaan
qaraxyada".
Waxaa kale oo qoraalka lagu sheegay "in
maamulka gobolka Banaadir uu ka jiro musuqmaasuq, xukuumadda ra'iisul wasaare
Xasan Cali Khayre-na uu ku tilmaamay in ay tahay xukuumadda ugu musuqmaasuqa
badan & in dalka aysan wax dawlad ah ka jirin".
Guddoomiyaha oo cod laga duubay lagu baahiyay
baraha bulshada, ayaa weerar afka ah ku qaaday ciidamada Booliiska Soomaaliyeed
oo uu ku tilmaamay in aysan u qalmin ciidamo Qaran lana aamini karin.
C/raxmaan Diini, Hiiraan
Online
[email protected]