Madaxweyne Waare : Haddii ay ogtahay dowladda iyo haddii kale-ba amniga magaalada Muqdisho faraha ayuu ka baxay
Isniin, September, 10, 2018
(HOL)- Madaxweynaha maamul gobolleedka Hirshabeelle Maxamed Cabdi Waare oo shir
jaraa’id ku qabtay magaalada Muqdisho ayaa sheegay in amniga magaalada Muqdisho
faraha ka baxay.
Waare oo si ka duwan sidii
hore weerar culus ku qaaday dowladda federaalka Soomaaliya ayaa sheegay in
wixii ka soo hara waddada Wadnaha aysan maamulin dowladda Soomaaliya, isaga oo
digniin u diray xildhibaannada baarlamaanka federaalka.
‘’Amniga magaalada Muqdisho
faraha ayuu ka baxay dowladu haddii ay ogtahay waa mas’uuliyad darro, haddii
aysan ogeyn-na waa mas’uuliyad darro ka sii culus, xildhibaannada waxaa leeyahay
is ilaaliya xaaladu caadi ma’aha, waa hadal nin oday ah oo weyn’’ ayuu yiri
madaxweyne Waare oo ay hereerihiisa fadhiyeen madaxweyne ku-xigeenka
Hirshabeelle iyo xildhibaanno ka tirsan baarlamaanka Soomaaliya.
Sidoo kale dowladda federaalka
ayuu ku eedeeyay in burburin iyo dhibaato ku heyso sida uu hadalka u dhigay
labada maamul ee Hirshabeelle iyo Galmudug, isaga is weydiiyay su’aal aheyd wax
kaliya labadaas maamul loo bartilmaameedsanayo.
‘’Galmudug iyo Hirshabeelle
waxaa ay ka mid yihiin shanta maamul gobolleed ee dalka ka jira, waxaa moodaa
in dowladdu si gaar ah u bartilmaameedsaneyso labadan maamul ee Hirshabeelle
iyo Galmudug, dowladda waxaa leeyahay
waa la arki doonaa Hirshabeelle iyo Galmudug haddii ay Ari yihiin’’ ayuu
hadalkiisa sii raaciyay.
Mar uu soo hadal qaaday
maamulka gobolka Banaadir iyo guud ahaan-ba maqaamka Muqdisho ayuu sheegay in
gobolka Banaadir uusan ka jirin maamul la xisaabtami kara dowladda federaalka,
madaama guddoomiye walba oo ka cabsi qabo in xilka laga qaado, sidaa daraadeed
Muqdisho u baahan tahay ayuu yiri maamul ay dadku iyaga soo doortaan oo ku
yimaada rabitaankooda.
Dhinaca howlgalada ka dhanka
ah Al-shabaab ayuu sheegay in dowladda federaalka iska dhaga-marisay qorshayaal
dhowr ah oo ay u soo gudbiyeen, isaga oo sheegay in qeybta siyaasada iyo amniga
howlgalka AMISOM si wanaagsan u soo dhaweeyeen qorshahaa iyaga oo sheegay ayuu
yiri in ay baahan yihiin oo kaliya ciidamadii la howlgali lahaa kuwa midowga
Africa.
‘’Annaga dowladda federaalka
waxaa u sheegnay in aan amniga caasimada
laga sugi karin Muqdisho, laakiin loo baahan yahay in la gaaro deegaannada ka
baxsan ee fog fog, talo soo jeedinteenii
waxba lagama soo qaaday, Al-shabaab hadda Muqdisho ayeey ka soo buuxsameen,
dhawaanna amniga caasimadan wuu ka baxayaa gacanta dowladda ayuu yiri’’ Waare
oo si adag uga hadlay siyaasada dowlada ee la xiriirta sugida amniga.
Shirka jaraa’id ee
madaxweynaha maamul gobolleedka Hirshabeelle uu maanta ku qabtay magaalada
Muqdisho ayaa muujinaya sida uu u xoogeystay khilaafka ka dhaxeeya dowladda
dhexe iyo maamul gobolleedyada, iyadoo dhawaan shirkii ka dhacay Kismaayo shanta
hoggaamiye ka sheegeen in ay xiriirka u jareen dowladda dhexe ee federaalka.
C/raxmaan
Diini, Hiiraan Online
[email protected]