6/21/2018
Today from Hiiraan Online:  _
Wararka Maanta- Khamiis, Jan 11, 2018
Muxuu uga dhiggan yahay madaxweyne Farmaajo socdaalka uu ku marayo Puntland


 

Khamiis, Janaayo, 11, 2018 (HOL)-  Ma’aha socdaalkiisii ugu horeeyay ee madaxweyne Farmaajo oo uu ku tago meel ka baxsan caasimada tan iyo markii 08 bishii Febarayo ee sanadkii tagay 2017 loo doortay madaxweyne, laakiin waa socdaalkii ugu horeeyay masaafo dheer uu ku safro dhulka isaga oo sii maraya deegaanno kala duwan.

Horey suurtagal uma aheyn in madaxweynuhu socdaal xagga dhulka ah uu ku tago magaalooyinka dalka marka laga reebo Afgooye oo caasimadda u jirta 30km oo kaliya.

Puntland oo ah dowlad gobolleed fac-weyn waxaa ay muhiiim u tahay kaabayaasha dhaqaale oo ay ku tiirsan tahay Dowladda Federaalka waxaana ku taala Dekedda Boosaaso oo ah il dhaqaale oo siweyn loogu xisaabtamo marka laga soo tago Dekedda Xamar.

Inkastoo Puntland ay dagaal adag kula jirto Ururrada Al-shabaab iyo Daacish hadana waxaa ay daruuftu u saamaxday in madaxweynaha iyo wafdigiisu socdaal dhulka ah ku maraan magaalooyin kala duwan oo kulaalaya gobollada Nugaal, Bari iyo Karkaar.

Waa dhul Geedku aad ugu yar yahay, Buuraley ah,  laakiin dadkiisu ku faanaan dhulkii Beey’ada iyo Xijijga, waxaana lagu tilmamaa kaydka kheyraadka dabiiciga ah oo aanan wali la soo fagin.

Puntland laftirkeeda muhiim ayuu u yahay socdaalka madaxweynaha Soomaaliya oo waxaa jira mashaariic fara-badan oo qaarna la daah furay kuwa kalana la dhax-dhigayo sida Garoonka diyaaradaha Garoowe oo xariga la jaray iyo madaxweynaha oo dhagax dhiggay Waddo Laami oo isku xiri doonta deegaannada Dan-Goronyo iyo Eyl.

Booqashadan xitaa marka la eego waxaa ay uga duwan tahay kuwii ka horeeyay ee madaxweyuhu ku tagay gobollada kale ee dalka sida uu bulshada u dhax-galay iyo Bulshada reer Puntland laftirkooda oo madaxweynaha u muujiyay soo dhaweyn Gacaltooyo.

Garoowe iyo magaalada Qardho waxaa ay isku jiraan qiyaastii illaa 240km oo ah masaafo dheer marka baabuur lagu marayo,  iyadoo waliba maanka lagu hayo xaaladaha ammaanka ee dalka.

Magaalada Qardho ayaa la filayaa in uu uga sii gudbo dhinaca gobolka Bari gaar ahaan magaalada Boosaaso oo siweyn isugu diyaarisay soo dhaweynta madaxweynaha iyo wafdiga la socda waana halka ugu muhiimsan safarka madaxweynaha marka laga soo tago magaalada Garoowe ee xarunta u ah dowlad gobolleedka Puntland

Marka uu gobolka Bari u gudbo madaxweyhuhu waxaa uu sii mari doona Buuraha Galgala oo caan ku ah dagaallada u dhaxeeya Puntland iyo Kooxaha ku abtirsada Al-shabaab iyo Daacish waxaana la socda oo Amaanka sugaya ciidamo ka raacay magaalada Muqdisho iyo kuwa dowlad gobolleedka Punland.

Boosaaso waayadii ugu danbeeyayba waxaa ka taagnaa qalalaase u dhaxeeya Ganacsatada iyo maamulka Puntland gacan ka hadal ka dhashayna waxaa uu sababay in dad ay ku dhintaan, sidaa daraadeed waxaa la filayaa in madaxweyne Farmaajo uu arintaa kala hadlo Ganacsatada magaalada, isaga oo sidoo kalana tagi doona Dekedda Weyn ee Boosaaso.

Lama oga halka madaxweynuhu u jiheysan doono booqashadiisa Boosaaso kaddib waloow wararka qaar sheegayaan in madaxweynuhu ku soo wajahan yahay dhinaca magaalada Gaalkacyo ee gobolka Mudug iyo deegaanno ka tirsan gobollada Bartamaha Soomaaliya.

C/raxmaan Diini, Hiiraan Online
[email protected]







Click here
1/11/2018 1:38 PM EST
Khamiis, Janaayo, 11, 2018 (HOL)–Madaxweynaha Soomaaliya Maxamed Cabdullaahi Farmaajo ayaa uga mahad-celiyey shacabka iyo Dowlad Goboleedka Puntland sida wanaagsan ee ay u soo dhaweeyeen isaga iyo wafdigiisa.

1/11/2018 1:19 PM EST
Khamiis, Janaayo, 11, 2018 (HOL) – Madaxweynaha maamul gobolleedka Hirshabeelle Maxamed Cabdi Waare ayaa maanta si rasmi ah u furay Kalfadhiga 3aad ee Baarlamaanka Dowlad Goboleedka Hirshabeelle.

1/11/2018 11:18 AM EST
Khamiis, Janaayo, 11, 2018 (HOL) - Ra’iisal Wasaaradda Xukuumadda Soomaaliya Xasan Cali Kheyre, ayaa maanta shir guddoomiyey kulanka Khamiislaha ah ee Golaha Wasiiradda Soomaaliya oo looga hadlay qodobo ay kamid yihiin Xaaladda Amniga dalka, Sharciga Shaqaallaha Rayidka ah iyo arrimo kale, waxaana warbixino looga dhageystay kulankaasi Wasiirka Amniga gudaha iyo Wasiirka Gaashaandhigga dalka.

1/11/2018 11:06 AM EST
Khamiis, Janaayo, 11, 2018 (HOL)- Wasaaradda Amniga Soomaaliya ayaa sheegtay in cafis sharuud ku xiran u fidineyso siyaasiyiinta mucaaradsan dowladda Soomaaliya.

1/11/2018 10:07 AM EST
Khamiis, Janaayo, 11, 2018 (HOL) - Khamiis,January 11,2018 (HOL)- Shirkii golaha Wasiiradda Somaliland ayaa maanta lagaga dooday xiisadda ka soo cusboonaatay deegaanka Tukko Raq, waxaana laga soo saaray go’aan ah in la ilaaliyo xuduudda,isla markaana aan cidna laga ogolaan inay ku soo xadgudubto taako ka mid ah dhulka Somaliland.

1/11/2018 6:19 AM EST
Khamiis, Janaayo, 10, 2018 (HOL) - Golaha Iskaashiga dowlad goboleedyada ayaa war murtiyeed ka soo saaray kuraasta Xildhibaanada ee ka banaan baarlamaanka 10aad, muddo lix bilood ka badan, iyadoo Golaha walaac ka muujiyay, kana soo horjeestay go’aanka Maxkamadda sare ee gal dacwadeed ugu furtay kuraasta Xildhibaanada ee bannaan.

1/11/2018 3:55 AM EST
Khamiis, Janaayo, 11, 2018 (HOL)– Madaxweynaha Mareykanka Donald Trump ayaa sheegay inuu wadahaddalo la billaabi doono Dowlada Kuuriyada Waqooyi marka la gaaro xilliga ay ku habboon tahay.

1/11/2018 3:38 AM EST
Khamiis, Janaayo, 11, 2018 (HOL) – Dowladda Soomaaliya ayaa markii ugu horeysay magaalada Muqdisho hergalisay xarun dhalinyarada looga wacyi-galinayo ku biirista kooxaha Xag-jirka sida Al-shabaab iyo Daacish, iyadoo la adeegsanayo Internet-ka

1/11/2018 3:10 AM EST
Khamiis, Janaayo, 11, 2018 (HOL) –Madaxweynaha dowladda Soomaaliya Soomaaliya Maxamed Cabdullaahi Farmaajo oo booqasho ku jooga dowlad goboleedka Puntland xalayna ku hoyday magaalada Qardho ee Gobolka Bari ayaa maanta wuxuu gaari doonaa magaalo Xeebeedka Boosaaso.

1/11/2018 12:34 AM EST
Khamiis, Janaayo, 11, 2018 (HOL)-Hay’adda Sirdoonka iyo Nabadsugidda Qaranka Soomaaliyeed ee NISA ayaa u dabaal degtay 08 01 2018 oo ku beegneyd 48 guuradii ka soo wareegatay markii la aas aasay 8-dii Janaayo 1970-kii.